بلاي ليست: أغاني رايقة مناسبة لجو الخريف تسمعها في الطريق

الخريف من ألطف فصول السنة، لطيف حرفيًا يعني، حرارة جو الصيف بتنكسر ويبدأ يبقى في نسمة هوا باردة رقيقة بالليل وأنت ماشي في الشارع أو حتى الصبح بيبقى الجو معتدل أكتر، والجو ده بيبقى عايزله مزيكا وأغاني تليق عليه وعلى روقانه عشان كدة عملنا لكم البلاي ليست دي لأغاني رايقة تليق بالأجواء الخريفية الجميلة دي…

1- عبد الباسط حمودة “الجو هادي”:

رائعة الحكمندار عبد الباسط حمودة، أغنية تليق بليلة رومانسية الجو فيها هادي خالص والدنيا هسهس، تسمعوها سوا وأنتوا مرتبطين وبتتمشوا بالشارع أو لوحدك وسينجل وتحاول تنبسط برضه بالجو الهادي خالص..

 

2- محمد رشدي “طاير يا هوا”:

رائعة صوت رشدي الأعذب من ليالي الخريف “طاير يا هوا” وقصة الهوا اللي راح فتن على الاتنين الحبيبة قصتهم لأهاليهم في تصرف عيب خالص من الهوا الصراحة، إخص عليك يا هوا!

ودي نسخة متسجلة بجودة أعلى ولكن نسخة الفيلم من وجهة نظرنا أحلى

   

3- فيروز “نسّم علينا الهوا”:

وماينفعش نفتكر نسمة هوا الخريف من غير صوت فيروز وهي بتغني للهوا اللي النسمات بتاعته من كتر ماهي انبسطت بيها راحت مفكراها ببلادها وقالت “يا هوا دخل الهوا خدني على بلادي”، شوية هوا حلويين ليهم تأثير سحري حتى على فيروز.

4- عبد الحليم “الهوى هوايا”:

وهنا العندليب شوية هوا خلوه يسرح بخياله لحبيبته ويبدأ بقى يقولها هيعمل ويسوي إيه عشانها، هو يقصد طبعًا “الهوى” اللي هو الحب بس طبعًا هنا في جناس يخلينا نسمعها بالمعنيين شوف الراجل”الهوى هوايا ابني لك قصر عالي واخطف نجم الليالي واشغلك عقد غالي يضوى احلى الصبايا دا انا الهوى هوايا هوايا” شايفين الروقان؟! الله عليك يا حُلم

 

5- عبد الحليم “جانا الهوا”:

ولسه مكملين مع حليم وجاتله نسمة هوا كمان وهو قاعد مع حبيبته فراح مسلطنّا بجانا الهوا “جانا الهوا جانا ورمانا الهوى رمانا ورمش الاسمرانى شبكنا بالهوى” الهوا كان عنيف شوية معاه المرة دي رماه وشبكه وكدة بس المهم إنه جيه لعبد الحليم، عقابلنا يارب!

6- أم كلثوم “هو صحيح الهوى غلاب”:

وطبعًا مانقدرش ننسى رائعة الست “جاني الهوى من غير مواعيد وكل مادا حلاوته تزيد ” ماينفعش تتفوت في ليالي الخريف الظريفة دي

                                                     

ونختم بالست البلاي ليست الرايقة دي، يا ترى أغاني إيه تاني ممكن تسمعها في الخريف وأنت ماشي ع الطريق؟

أبقى قولولنا في الكومنتات.. نتمنى لكم سلطنة سعيدة مع هذه البلاي ليست..

 

Related Articles

Back to top button