لف اللسان جين وراثي ولا مهارة بتطور بالتدريب؟

أكيد كان معاك حد في المدرسة وإنت صغير كان بيعرف يلوي لسانه ويعمله على شكل حرف U مثلا، أو أكيد إنت مرة حاولت تقف قدام المرايا وتلوي لسانك بأي شكل من الأشكال، وطبعا لو عرفت تعملها من أول مرة هتبقى مبسوط بنفسك، ولو ماعرفتش هتحاول مع نفسك كل ما تفتكر الموضوع ده، بس لو عرفت تعمل كده اعرف إنك واحد من ضمن حوالي 65% لـ 81% بيعرفوا يعملوا الحركة دي.

موقع “news medical” قال إن فيه أنواع كتير للف اللسان زي مثلا:

1- لف اللسان: وهو لف حرف اللسان وده ممكن ناس تعمله عن طريق مساعدة سنانها 

2- دحرجة اللسان: وده ممكن عن طريق إن الشخص يلف أطراف لسانه الجانبية لفوق ويعملها على هيئة أنبوبة، وده أكتر أنواع اللف انتشار.

3- قلب اللسان: لو الشخص قدر يلف الحواف الجانبية للسان فبيخلي اللسان مقلوب، بمعنى إن ضهر لسانه هو اللي فوق ووش لسانه تحت، ودي صعبة جدا بالنسبة لمعظم الناس.

4- تشكيل اللسان على شكل البرسيم: وده أصعب أنواع الألتواء في اللسان لإن الشخص بيعمله أطراف لسانه فيها ثنيات شبه ورقة البرسيم، وممكن بعض الأشخاص يعملوا 3 منحنيات، وفيه ناس تانية تقدر تعمل 4.

وبالرغم من تنوع أشكال لف والتواء اللسان إلا إن مش كل الناس تقدر تعمل كده مهما حاولت واتدربت وده لسبب علمي وهو الجينات الوراثية اللي بياخدها الأنسان من أهله وهي اللي بتخليه قادر يلف لسانه أو لا، فلو إنت مابتعرفش تعمل الحركة دي اعرف إنك ماورثتش الجين ده.

ولف اللسان ممكن أي شخص عنده نسخة أو نسختين من الجين ده يقدر يعمله، لكن لما شخص بيتولد عنده الجين ده متنحي من الأب والأم، وللسبب ده لو الأب والأم أو واحد منهم بيقدر يلفل لسانه الأطفال كمان هيقدروا يعملوا الحركة دي.

ولكن لو فيه واحد من الأطفال مابيعرفش يلف لسانه لإن الجين ده متنحى عنده مش لازم يبقى باقي الأطفال عندهم الجين متنحي، فممكن يبقى الطفل التاني بيعرف يعمل الحركة دي.

لكن موقع “bbc” قال إن عالم الوراثة “ألفريد ستورتيفانت” هو اللي اقترح سنة 1940 إن صفة لف اللسان بترجع للجينات ومزيج بين جينات الأب والأم زي لون العين والبشرة ووجود نمش مثلا، وقال إنه عمل تجربة على مجموعة من الأطفال والأطفال اللي رفضوا يفتحوا بوقهم اعتبرهم مش قادرين يعملوا كده لكن الأطفال اللي فتحوا بوقهم طلعوا فعلا بيعرفوا يلفوا لسانهم، ولقى منهم 4 أطفال بالرغم إن مفيش حد من أهلهم كان بيعرف  يلف لسانه، وفي الأخر وصل إن لف اللسان بيبقى مشروط جزئيا ً بالوراثة.

ولو كان ده صح فمعنى كده إن التوائم المتطابقة لازم يبقوا بيعرفوا يعملوا الحركة دي أو مابيعرفوش يعملوها هما الأتنين وده لإن الجينات بتبقى متطابقة، ولكن في دراسة في الخمسينات اتعملت على 33 توأم متطابق، وطلع مافيش منهم إلا 7 بس متطابقين في حركة اللسان والباقي بيبقى واحد وواحد.

وبعدها “ألفريد ستورتيفانت” لما شاف البحث ده أعلن في كتاب له سنة 1965 إن لف اللسان مش جينات وراثية ولكن ده مامنعش من تدريس النظرية اللي بتقول إن لف اللسان مبني على الجينات الوراثية.

وفي الآخر حابين نقولك سواء كنت بتعرف تعمل المهارة دي أو لا فهي أصلا مهارة مش مهمة ومش مفيدة وده السبب اللي بيخليها مثيرة لاهتمام الناس.