8 حاجات لازم تاخد بالك منهم لو ناوي تسكن “إيجار جديد”

عزيزي القارىء أهلًا بيك..
مبدأئيًا لازم نتفق إن لكل واحد فينا ظروفه المختلفة عن التاني.. يعني مش شرط الكلام اللي هقوله ده يكون مناسب ليك.. لكني أتمنى إنه يساعدك بشكل أو بأخر..

من واقع تجربتي الشخصية هحاول أقولك كام حاجة لازم تاخد بالك منهم لو نويت تاخد شقة إيجار جديد

– أولًا كدة وفي البداية خالص نبدأ من عند السمسار.. يعني لو أنت مش عارف مالك تأجر منه مباشرة، هتبقى مضطر تشوف السماسرة ودول أنواعهم كتير.. اللي هيحاول يقلبك ويقلب صاحب الشقة في شهر عمولة من كل واحد فيكوا.. واللي هيتفق معاك على مبلغ من البداية.. نصيحتي ليك قبل ما يفرجك على أي شقة اتفق معاه على نص شهر عمولة.. وده أنسب حاجة ليك دلوقتي وفي نفس الوقت مش هتكون ظلمته لإنه بياخد عمولة من صاحب الشقة برضه.

– حاول تحدد متطلباتك من الشقة من البداية للسمسار عشان توفر على نفسك وقت ومجهود.. يعني عايزها تشطيب سوبر لوكس ولا مقبول؟ أدوار عالية ولا قريب من الأرضي وهكذا..

– لو أنت عريس جديد وعفشك كله جديد.. أوعى تقبل إنك تقعد في شقة إيجار جديد بعقد أقل من 3 سنين.. ولو 5 سنين هيبقى أفضل لان موضوع النقل والعفش ده مُرهق جدا في بداية حياتك وكمان حاجتك هتتبهدل منك في كل مرة تنقل فيها..

– المرافق مهمة جدًا في الشقة لازم تتأكد إنها في حالة جيدة ومش هتبهدلك.. الصرف والمياه والكهرباء عشان مشاكلهم وحوارتهم كتير

– وطبعًا الجيران.. زي ما المثل بيقول الجار قبل الدار، اسأل عن العمارة اللي هتقعد فيها وهل هي كويسة ولا فيها مشاكل وجيرانك في حالها ولا هيسودوا عليك عيشتك.. وده ممكن تعمله عن طريق إن تصاحب جار مثلأ وهو هيحكيلك كل حاجة أو تدخل جروبات المنطقة على السوشيال ميديا وتفهم منها.

– وأنت بتأجر تعمل حسابك على شهر مقدم ونص شهر للسمسار وشهرين تأمين في حالة إن الشقة تشطيبها كويس.. لو التشطيب مش أحسن حاجة هتدفع شهر واحد تأمين

– تاخد بالك إن مبلغ التأمين اللي دفعته ممكن مايرجعلكش لو بعد ما خلصت سنين الإيجار الشقة ماكنتش في حالتها أو بهدلتها، وده حق أصيل لصاحب الشقة.
– لو قررت في أي وقت إنك ماتكملش مدة العقد بتاعك وتنقل شقة تانية.. الموضوع ده بيتم بالتراضي مع صاحب الشقة يعني لازم تبلغه على الأقل قبلها بشهر أو بشهرين عشان يعمل حسابه ويوافق يرجعلك التأمين.

Related Articles

Back to top button