كوليكشن مشروبات ترطب عليك في الحر

بمناسبة الجو الحر اللي هجم.. وطبعا مضطرين ننزل نشوف مصالحنا.. فاحنا نشرب مياه كتير زي مانتوا عارفين ومحتاجين مشروبات تانية ترطب علينا.. عشان كده بنقدملكم 12 مشروب هيخليك تستحمل الحر ويروق عليك كمان:

1- ماء جوز الهند:

يعتبر من أشهر المشروبات الصيفية في البلاد الاستوائية شديدة الحرارة.. وده  لأنه بيحتوي على نسبة عالية من معادن البوتاسيوم والصوديوم والمنجنيز اللي بيرطبوا ويبردوا الجسم.. وفي نفس الوقت طعمه حلو وفريش

2- عصير بطيخ:

البطيخ من أفضل الفواكه للصيف وطعمه حلو وماحدش بيختلف عليه.. ومن الناحية الطبية غني بالإلكتروليتات ومضادات الأكسدة.. وممكن يتشرب فريش أو سموزي مع التلج وهيرطب جسمك وهينسيك الحر اللي شوفه.

3- عصير الليمون:

عصير الليمون مشروب للأشخاص الكلاسيكية.. معروف من زمان أنه منعش وجميل ولاذع.. وبيساعد في إزالة السموم والتغلب على الإجهاد الحراري وبيهدي الأعصاب وياحبذا لو عليه نعناع فريش.

4- شاي مثلج:

وده لعشاق الشاي بقى.. بشوية ثلج ممكن نحول الشاي من مشروب بيدفي لمشروب صيفي منعش ينزل درجة حرارة الجسم.. ولزوم الانتعاش أكتر ممكن يتضاف عليه تاتش نعناع هيوديه في حتة تانية خالص

5- اللبن:

اللبن هو مشروب صيفي تقليدي يُستهلك لتبريد درجة حرارة الجسم.. وبيزود الجسم بالإلكتروليتات الضرورية والمعادن اللي بتزود ترطيب الجسم.. ومعروف أكتر عن البدو والعرب قديمًا كان بيشربوه عشان يستحملوا حر الصحراء

6- عصير الخضروات:

لأن معظم الخضار مليان بالمعادن والماء اللي هترطب الجسم.. وممكن العصير ده يتعمل مع اضافة السكر حسب الرغبة وتبريده.. زي عصير الخيار وهو مشروب صحي ومرطب.. وعصير الطماطم لأنها مضادة للأكسدة وبيحمي من أشعة الشمس.. وكمان عصير الجزر والبنجر.

7- الكركديه البارد:

وده ميزته مش بس أنه بيرطب الجسم لا ده رخيص وكمان كويس لمرضى الضغط .. فهو كوكتيل فوايد

8- مشروب الزبادي بالفواكه:

من المشروبات المنعشة وبتساعد فى تنظيم الهضم وبيتعمل بأي نوع فاكهة.. ويعتبر بمثابة وجبة خفيفة للي بيفقدوا الشهية في الحر.

9- قهوة مثلجة:

المشروب لأصحاب المزاج العالي وعشاق الكافيين وبيتقدم بالثلج.. فهو له وظيفتين هيرطب عليك ويظبط دماغك.. يعني من الأخر هتضرب عصفورين بحجر واحد

10- ماء التفاح والقرفة:

وده مياه متدلعة.. خد معاك وانت نازل مياه وحط عليها شريحة قرفة وقطع شرائح تفاح.. وهتتبسط عشان هترطب عليك وهتساعك على نزول الدهون اللي قرفاك كمان

11- عصير العنب:

العنب فاكهة محبوبة عند معظمنا.. كمان العصير بتاعها لو ساقع واتشرب في الحر هيفرق معانا كتير

12- مشروب السموزي الفواكه:

المشروب الذي لا يموت وابسط الامكانيات اي نوع فاكهة بتحبه مع شوية سكر وتلج واضرب في الخلاط وهتتبسط.