7 حاجات لو عملتها شغفك هيرجعلك من تاني
أوقات كتير بتعدي علينا بنحس إننا مش قادرين نعمل حاجة حتى أبسط الحاجات اللي كنا بنحب نعملها .. وبنلاقي نفسنا مثقلين وحتى الشغل مش قادرين نعمله ..
لو حاسس إنك معندكش طاقة تعمل حاجة وكل الحاجات بايظة من حواليك دي شوية نصايح تشجعك ترجعلك شغفك وفقا لموقع verywellmind
1-اعمل إن عندك شغف:
بس كده؟ ايوه بس كده ..في مثل أجنبي كده بيقول fake it till you make it ده بالظبط اللي هتعمله هتحاول تقنع نفسك إنك متحمس لأنك لما تضحك عليها هتلاقي واحدة واحدة مشاعرك بتتغير.. يعني لو مثلا مكسل تنزل ونايم على السرير
حاول تفاجأ نفسك وتقوم تغير وتستعد تنزل حتى لو مشوار قريب وهتلاقي مع الوقت تحفيزك إنك تعمل الحاجات بيزيد.
2-حاول تعمل عكس أفكارك:
لما بنكون منطفيين أول حاجة بتيجي في دماغنا كلمة “لا” على كل حاجة جرب تقول “اه” شوية وتجرب تعمل حاجة حتى لو بسيطة وبدل ماتفكر بشكل سلبي في عواقب الحاجات لو عملتها.. جرب تفكر في فوايدها اللي هتعود عليك وإزاي هتغير في نفسيتك.
3-خليك طيب مع نفسك وتعاطف معاها:
ماتقعدش تضغطها أكتر وتقولها أنت السبب في كل حاجة يا نفسي.. لا تعاطف معاها شوية.. في دراسة اتعملت في جامعة كاليفورنيا سنة 2011م لقوا إن التعاطف مع النفس يزيد من الدوافع اللي بتشجعنا نتعافى من الفشل والأخطاء..
وكمان في دراسة تانية أتعملت سنة 2012 م في مجلة علم النفس السريري لقوا إن التعاطف مع النفس بيحسن الصحة العقلية وبيقلل من الضيق النفسي و أعراض القلق والاكتئاب والتوتر.. عشان كده مهم تكون طيب مع نفسك
4- رتب الحاجات اللي عليك بشكل منطقي:
لما الحاجات اللي علينا والشغل بيكون مش متقسم صح وعشوائي ده بيحسسنا بانهيار لأن بيبقى الظاهر إنها حاجات كتير ومش هتخلص.. لكن لو بدأنا نرتبه على حسب المهم والأولوية وخلينا لكل حاجة وقتها هنلاقي الدنيا بدأت تمشي بسلاسة أكتر وده هيشجعك تشتغل وتنجز أسرع
5-اهتم بنفسك:
هيبان كلام كليشيه بس صحتك النفسية والجسدية مرتبطة بكل حاجة عشان كده لازم تنام كويس وتريح جسمك.. وتاكل كويس وتهتم بنفسك وكمان تلعب رياضة عشان جسمك يكون صحي ونشيط
6-اعمل حاجة بتحبها وأنت بتعمل حاجة لازم تعملها:
مشاعرنا بتأثر على مستوى تحفيزنا عشان كده حاول على قد ماتقدر حاول تعمل حاجة بتحبها وأنت بتعمل حاجة مش فادر تعملها أو ماعنكش طاقة ليها.. زي الشغل مثلا
فممكن تسمع اغاني بتحبها عشان تشجعك تشتغل.. تكلم حد من صحابك وأنت بتنجز حاجة.. تقعد في مكان مريح ليك.. بس المهم ماتخليش الحاجات دي تشتتك وخليك مركز لو بتتشتت بلاش أفتكر إني قولتلك بلاش
7- حاول تكافئ نفسك:
لو لقيت نفسك بدأت تعمل حاجات حتى لو كانت بسيطة خالص ابدأ كافيء نفسك ودلعها كده.. خرجها خروجة حلوة كده وفسحها وهاتلك حاجة كان نفسك فيها
وطبعا لو حاولت تعمل كل الحاجات اللي فوق دي وحسيت إنك لسه فاقد الشغف ومش قادر تقوم من تاني.. يبقى لازم تستعين بمتخصص يساعدك تستعيد شغفك ويعرف حالتك.
