اعرف أكتر عن منتخب مصر للتنس وتأهله لأول مرة للمجموعة العالمية الأولى لكأس ديفيز “كأس العالم للتنس”

يوم السبت 3 فبراير حصل إنجاز تاريخي لأول مرة لما منتخب مصر للتنس رجال تأهل للمجموعة الأولى العالمية في كأس العالم للتنس “كأس ديفيز”.. وبالمناسبة دي تعالوا نعرف أكتر عن المنتخب المصري وعن بطولة كأس ديفيز.

(مصر VS الإكوادور)

منتخب مصر للتنس للرجال حقق فوز كبير على منتخب الإكوادور في إطار تصفيات بطولة كأس العالم للتنس “كأس ديفيز”، واتأهل لأول مرة في تاريخ التنس المصري لمنافسات المجموعة الأولى العالمية.

(مصر من المركز 55 لـ المركز 43)

وبسبب تأهل منتخب مصر للتنس للرجال للمجموعة الأولى العالمية، المنتخب تخطى 12 مركز في تصنيف الاتحاد الدولي لمنتخبات التنس، ومن المركز الـ55 احتل المركز الـ 43 في الترتيب الدولي لمنتخبات الرجال، وده يعتبر تصنيف دولي أول مرة يوصله منتخب مصر.

(مصر VS المجر)

مصر هتقابل المجر في كأس ديفيز، والمجر يعتبر واحد من أهم المنتخبات في لعبة  التنس، وده هيحصل خلال شهر سبتمبر 2024، ومصر هي اللي هتحتضن منافسات البطولة العالمية.

(لاعبي منتخب مصر للتنس)

بتضم قائمة منتخب مصر من اللاعبين: محمد صفوت وكريم مأمون وعمرو العصراوي وأكرم السلالى وفارس زكريا.

(كأس العالم للتنس – كأس ديفيز)

كأس ديفيز هو كأس العالم للتنس وهو الحدث الدولي الرئيسي في التنس للرجال، وتعتبر واحدة من أهم الألقاب في تنس الرجال، جنب بطولات الجراند سلام. 

اتأسس سنة 1900، وبيديره الاتحاد الدولي للتنس (ITF). وبيشارك في الكأس فرق من مختلف البلاد بتتنافس في نظام البطولة بالإقصاء.

الماتشات بتحصل بنظام الأفضل من خمس ماتشات، بما فيها الماتشات الفردية والزوجية. وبيتقدم الفريق الفائز في كل ماتش للجولة اللي بعدها لحد ما يبقى فيه فريق واحد فائز في النهائي. 

وبالنسبة للمجموعة الأولى اللي مصر فيها هتكون بالشكل ده:

ماتشات المجموعة الأولى هتكون في الفترة من 13 لـ 14 سبتمبر 2024 أو من 14 لـ 15 سبتمبر 2024، وكل بلد مضيف هو اللي هياخد القرار بخصوص التواريخ.

اللقاء بيتقسم على يومين:

اليوم الأول: ماتشين فرديين (لاعب من مصر قصاد لاعب من المجر)

اليوم التاني: ماتش زوجي (اتنين من مصر قصاد اتنين من المجر) وماتشين فرديين (لاعب من مصر قصاد لاعب من المجر بس اللاعيبة بيتغيروا بمعنى إن ماينفعش نفس اللاعيبة اللي لعبوا قصاد بعض في اليوم الأول يلعبوا قصاد بعض تاني)

بشكل عام، رياضة التنس من أكتر الرياضات اللي بيحصل فيها طفرة وبتتطور بمرور الوقت، وبشكل خاص، منتخب مصر للتنس بيحقق إنجازات كبيرة ومهمة وبيحقق مراكز متطورة سواء على المستوى المحلي في مصر أو المستوى الدولي أفريقيا أو عالميا.