دليلك للأسئلة الشائعة والتبريرات اللي بيسألها جارك الأبيض على الإنترنت

مع انتشار الوعي بالقضية الفلسطينية في العالم كله لسه فيه بعض الناس في الغرب عندهم نفس القناعات والأفكار اللي اتزرعت في دماغهم من زمان وبالتالي بيبقوا مش مقتنعين وعندهم شوية أسئلة وتبريرات للي بيحصل في فلسطين واللي احتمال تتعرضلها في أي مناقشة سواء على الإنترنت أو في الحقيقة لو بتتعامل مع أجانب كتير.. فجمعنالك وجمعنالك الردود المناسبة على كل سؤال وجدال ومبرر عشان تذاكر كويس قبل ما تدخل أي مناقشة

الاسرائيليين هم أصحاب الأرض وهم اللي ليهم الحق الأول فيها…هم الفلسطينيين محموقين ليه؟

مش من حق أي حد إنه يهجر إنسان من مكانه مهما كان.. ده معناه إن مثلاً سكان الولايات المتحدة مش من حقهم يطردوا بريطانيين من بيوت أجدادهم بحجة إنهم كانوا ساكنين هنا زمان…

 ثانياً في فرق كبير بين الديانة والمكان…صحيح اليهودية هي أول الأديان الابراهيمية في الظهور بس بعد كده باقي الأديان اتوجدت على نفس الأرض، ومرت عليها الدولة البيزنطية والمصرية والفارسية والرومانية والإسلامية.. سنة 1922 فلسطين كان فيها حوالي نص مليون مسلم وحوالي 85 الف يهودي وحوالي 70 الف واحد مسيحي…

باقي اليهود اللي في البلد جم في الحرب العالمية التانية كلاجئين عشان الظروف اللي مروا بيها وقتها…

حماس هي اللي بدأت واسرائيل من حقها تدافع عن نفسها…

كلمة رئيس الأمم المتحدة “انتونيو جرتيراز” بترد عالتبرير ده لما قال” إن أفعال حماس لم تحدث من فراغ”.. وراجع ليها الأوضاع المعيشية اللي الشعب الفلسطيني كان عايش فيها قبل يوم 7 أكتوبر، وأعداد القتلى والأسرى ونسب الأطفال اللي في السجون الإسرائيلية 

اللي الاحصائيات بتقول عددهم في سنة 2022 بس وصل لـ  7000 أسير بينهم 62 أسيرة ومفيش أعداد دقيقة عن الأسرى الأطفال  

ليه الدول العربية مش عاوزة الشعب الفلسطيني؟

كل الدول العربية فيها لاجئين فلسطينيين ولكننا عاوزين الفلسطينيين ياخدوا أراضيهم ويكون ليهم دولة مستقلة لأن ده حقهم

 الفلسطيني مهم عنده جداً إنه يتمسك بأرضه والموت عليها أهون من إنه يسيبها

المسلمين مش بيحبوا اليهود وعاوزين يخلصوا منهم كلهم

المسلمين مش بيحبوا الصهاينة ولكن بيحبوا اليهود ومتعايشين معاهم في أماكن كتير جداً من العالم…وخصوصاً اليهود الغير داعمين للفكر الصهيوني والدليل على ده إن عدد اليهود اللي كانوا عايشين في الدول العربية قبل سنة 1948 مع المسلمين والمسحيين كان عدد كبير ووفقا لإحصائية نشرتها يديعوت أحرونوت عن عدد اليهود اللي هاجروا لإسرائيل من الدول العربية فى الفترة  من سنة 1948 لـ  1951 فاللي هاجروا من الجزائر عددهم كان 3810 ومن مصر 16٫024 ومن العراق 123٫371 ومن لبنان 235 ومن ليبيا 30٫972 ومن المغرب 28٫263 ومن سوريا 2678 ومن تونس 13٫293 ومن اليمن 48٫315 ومن إيران كمان هاجر في الفترة دي 21,910

أنت كده معادي للسامية عشان واقف في صف فلسطين…

اللي يقولك كده تقوله أنا بحب السامية موت بس حبي ليها لا يشمل قذف المستشفيات وقتل الأطفال والمدنيين.. لإن المادة 18 في القانون الدولي بتقول “لا يجوز بأي حال الهجوم على المستشفيات المدنية المنظمة لتقديم الرعاية للجرحى والمرضى والعجزة والنساء النفاس، وعلى أطراف النزاع احترامها وحمايتها في جميع الأوقات” وبكده تبقى إسرائيل بتنفذ جرائم حرب مالهاش أي علاقة بأي دين

ده غير إن اليهودية ملهاش أي علاقة بالصهيونية…وإن كل ديانة وبيكون في مجموعة راديكالية بيتاجروا بإسم الدين ومن ضمن المجموعات دي الناس اللي بتتبنى الفكر الصهيوني.

الحرب موجودة من زمان ومش لازم ناخد صف حد…

عشان نطلق على اللي بيحصل اسم حرب لازم يكون في جبهتين متساويتين أو على الأقل في جيوش منظمة بتدافع عن كل جبهة.. بس اللي حاصل دلوقتي هو إن جيش الاحتلال هو رقم 18 في العالم وفلسطين مالهاش جيش أصلاً يدافع عنها.. ده غير إن الاحتلال هو المسيطر الأساسي على موارد فلسطين من أكل ومياه وكهرباء واقتصاد فالمياه اللي موجودة في غزة 98% منها ملوث وغير قابل للشرب والكهرباء بتقطع في غزة بأعداد ساعات بتوصل لـ 20 و22 ساعة كمان ده غير إن الاحتلال هو اللي بيسمح لهم بالدخول أو الخروج من القطاع أو الضفة وعامل نقاط تفتيش مابتسمحش غير للحالات الإنسانية والعاملين في المنظمات الدولية والدبلوماسيين إنهم يروحوا أي قطاع تاني تابع للاحتلال 

ليه الفلسطينيين مش بيسمعوا الكلام ويخلوا منطقة الشمال مع إن إسرائيل بتحذرهم من كل شوية…

ده لأن الفلسطيني عارف إنه أول ما يسيب أرضه وبيته عمره ما هيعرف يرجعلهم تاني وإن موته فيهم هو الحل الأخير ليه في النضال والدليل على كده هو  إن 7 من كل 10 فلسطينيين في غزة مسجلين كلاجئين ومعظمهم من عائلات تم إجبارها على التهجير من قراهم سنة 1948 

 ده غير إن جيش الاحتلال بيفجر الأماكن اللي جنوب القطاع برضه زي خان يونس وزي المناطق القريبة من معبر رفح.