لو بتحس إن اللي ظلمك بينام من غير تأنيب ضمير.. إزاي تتخطى الظلم ده؟

ساعات قبل ما ننام دماغنا بتسحلنا شوية مع الحاجات اللي قابلناها في اليوم أو حتى في حياتنا قبل كده.. وبنقعد نفتكر ونفكر في الحاجات اللي اتظلمنا فيها وضايقتنا وهل هي تستاهل ولا لأ ونتعامل معاها إزاي؟ 

فا تعالوا نشوف شوية حاجات ممكن تفكر فيها عشان تتعامل مع الموضوع ده..

إزاي تبص للظلم اللي اتعرضلته وتتعامل معاه بأنهي طريقة؟

ماتخليش دماغك تسوحك

أول حاجة بنقابلها هي “الغضب”.. بنتضايق ونغضب وساعتها ممكن نكون مندفعين والفترة المفضلة للشعور ده بتكون بالليل لأنك بالنهار بتكون مشغول ومش مركز أوي للحاجات اللي ضايقتك.. وعشان كلنا بنميل للتفكير في الجانب السيء من المواضيع وناخد الحاجات اللي تزعلنا واللي ممكن تكون غلط أو رد الفعل عليها مبالغ فيه.. فا الأفضل إننا نفكر في الأمور بشكل إيجابي لكن مش بهبل وسذاجة وساعتها مش كل حاجة هتحصل هنتأثر بيها بشكل كبير وتتعبنا وهنا ييجي دور “التأمل”

التأمل – Meditation

من الوسائل المهمة اللي بتساعدك تتجاهل الدوافع وتخليك تكون مركز وهادي وتقدر تدير الموضوع بشكل كويس

تحديد الأولويات

في الأول محتاج تعرف وتحدد أهمية الشخص بالنسبالك والعكس.. انت ممكن تكون بتعتبر فلان قريب ليك بشكل كبير ولكن على الناحية التانية هو بيعتبرك شخص عادي أو مش بنفس درجة القرب اللي بتشوفه بيها وساعتها تقدير الزعل هيكون مختلف من الطرفين.. انت هتزعل اوي عشان هو قريب بالنسبالك وهو هيبان عادي أو مش فارق معاه لأنك مش بنفس درجة القرابة له وهنا انت محتاج برضه تعمل إعادة تقييم للعلاقة اللي بينك وبين الشخص عشان ماتتأثرش بزيادة وهو يبقى مش فارق له حاجة!

تاني حاجة محتاج “تتواصل”

مش كلنا بنشوف الموضوع من نفس الزاوية ونفس الشكل.. ممكن يكون في سوء تفاهم كبير بإنك شايف الموضوع غلط أو الشخص التاني مش شايف الحاجة اللي انت شايفها وهنا “التواصل” هو الحل.. تتكلم مع الشخص وتشوف وجهة نظره ايه وتعبر عن اللي جواك وماتتوقعش إنه يفهمك لوحده وفي نفس الوقت تفهم وجهة نظره وتفهمه عشان ممكن يكون هو أصلًا اللي زعلان وانت غلطان.. بس في النهاية التواصل هيخليكوا توصلوا لإن محدش فيكم يكون مضايق أو زعلان

في حاجات مابنقدرش نتحكم فيها:

الحاجات اللي بنقدر نتعامل معاها بنفكر فيها ونشوف حلها ايه وناخد فيها خطوة.. بس في حاجات خارجة عن إرادتنا لأسباب كتير ومنها إننا مش متحكمين في الشخص التاني ولا في تصرفاته وتفكيره وحاجات تانية كتير مابنقدرش نتحكم فيها.. فا بتحتاج تركز على الحاجة اللي تقدر تفكر وتاخد خطوة فيها وتحلها وماتعلقش نفسك جوا أفكار ماتقدرش تتحكم فيها

في النهاية زي ماقولنا مافيش حاجة بنتحكم فيها 100% ممكن تكون زعلان وفاكر الشخص التاني مش فارق معاه ولا متأثر والموضوع يكون العكس.. ممكن يكون مايعرفش إن هو غلطان أو عمل حاجة تزعلك.. في حاجة مفيدة كلنا بنتكبر عليها بس هي بتساعد وهي إنك تكلم الشخص اللي حصل بينكم مشكلة وتشوف إذا كان ممكن توصلوا لحل وتخلص من المشاعر السلبية وماتنامش بيها.. أو لو مش متاح تعمل كده ممكن تاخد وقت وتهدى ولما تكون هادي ترجع تشوف المشكلة تاني بمنظور تاني.