بمناسبة ذكرى ميلاده.. شوية معلومات عن الجنرال “محمود الجوهري” كلاعب ومدرب
![](https://theglocal.com/wp-content/uploads/2024/02/الجوهري.png)
بمناسبة ذكرى ميلاده.. شوية معلومات عن الجنرال “محمود الجوهري” كلاعب ومدرب
مدربين كتير عملوا بصمة مع منتخب مصر.. ولاعيبة كتير كمان عملت بصمة مع فرقها والمنتخب بتاعهم بس بيكون يا إما في الفرقة لوحدها أو في المنتخب لوحده أو حتى كلاعب بس في الفريق والمنتخب.. لكن الكابتن محمود الجوهري كان مميز شوية بإنه حقق إنجازات سواء كلاعب أو مدرب وكمان مع الفرقة أو المنتخب.. تعالوا نشوف شوية معلومات عنه كلاعب ومدرب..
بدايته
بدأ مشواره مع النادي الأهلي سنة 1955 وكمل لحد 1966 وكسب مع النادي 6 ألقاب دوري و3 كاس ودوري منطقة وكأس الجمهورية المتحدة.. وفي نفس الوقت كان مشواره بدأ مع المنتخب وكسب أول بطولة معاه كلاعب في 1959 ودي كانت تعتبر تاني بطولة أمم أفريقيا للمنتخب وقتها وكمان كان هداف البطولة..
الجنرال
مسيرة الجوهري كرويًا كلاعب ماخدتش وقت طويل وده بسبب الإصابة وكمان بالتزامن مع نكسة 1967 وتوقف النشاط الرياضي بسبب الحرب.. خد لقب جنرال عشان شارك في حرب أكتوبر سنة 73 لأنه كان مقدم في الجيش وكمان خرج برتبة عميد في سلاح الإشارة ومن هنا جه لقب “الجنرال” ومن بعد الحرب رجع للكورة ولكن ب زي تاني وهو “المدرب”
..إنجازاته
1- مع الأندية
في فترة قبل مايبقى مدرب للأهلي رسميًا سنة 1982 كان في شوية انتقالات مابين مساعد مدرب لمدرب الأهلي وكمان مدرب لفريق تحت 21 سنة.. لكن أول إنجاز مهم كان مع الأهلي بتحقيق لقب دوري أبطال أفريقيا بمسماه وقتها “بطولة الأندية الإفريقية أبطال الدوري” وده كان سنة 1982 لأول مرة في تاريخ النادي و1984 و1989 وكمان كأس مصر 1983 و1985.. كمان حقق مع الزمالك نفس البطولة “بطولة الأندية الإفريقية أبطال الدوري” سنة 1993 وكأس السوبر الإفريقية 1994 وبكده يكون أول مدرب حقق بطولة أفريقيا مع قطبي الكورة المصرية “الأهلي والزمالك”..
2- مع المنتخبات
فاز ببطولة أمم أفريقيا مع مصر سنة 1998 عشان يبقى أول واحد حقق البطولة مع المنتخب كلاعب ومدرب.. كمان اتأهل بالمنتخب المصري لكأس العالم 1990 وبكده بيكون أول مدرب مصري يوصل بالمنتخب لكأس العالم.. رجع للمنتخب مرة تانية 1991 وخد معاه ذهبية دورة الألعاب العربية 1992 في سوريا.
منتخب الأردن وصل لأعلى تصنيف عالمي له مع كابتن محمود الجوهري “37” اللي درب المنتخب من 2002 لحد 2007 وأسس كمان “مراكز الواعدين” اللي كانت سبب في تطور المنتخب الأردني.. بعدها اشتغل مستشار اتحاد الكرة المصري من 2007 لـ 2009.. وعلى مدار حوالي 10 سنين كان متصل بشكل ما مع المنتخب الأردني.. وفي النهاية اشتغل مستشار اتحاد الكرة الأردني من 2009 لحد وفاته سنة 2012 وساب بصمة كبيرة في الكرة الأردنية لدرجة إنهم عملوله جنازة عسكرية تكريمًا له.. وبكده تكون انتهت مسيرة شخصية رياضية كبيرة.