تعمل إيه لو مرتبك خلص في العيد.. نصايح من رحم المعاناة 

كتبت/ آية زكي

شركات كتير قبضت الناس قبل العيد ومش بس الشركات دي أغلب المعاشات قبضت برضه قبل العيد ولكن اللي ماقبضوش بقي قبل العيد فهما استلفوا برضه عشان يقضوا العيد ولما المرتب ينزل هيبقى كأنه خلصان برضه.. وده لإن العيد كان فرحة وخروجات وسفر وعيديات ولحمة وأكل وأي حاجة من اللي محتاجين صرف وفلوس عشان تتبسط يعني.

وبما إن إحنا كمان لسه في أول الشهر فغالبا كده الفلوس اللي معاك يا مش هتقضي لأخر الشهر أو هتقضي بس في أضيق الظروف.. وعشان كلنا في الهوا سوا دلوقتي وبنعاني من نفس المعاناة تعالى نقولك تتصرف إزاي عشان شهر 7 يعدي من غير أي أزمات مادية:

1- شوف المبلغ اللي  معاك قد إيه وقسمه على عدد الأيام اللي هتنزل فيها وخلي لنفسك زي مصروف معين في اليوم

2- استغنى عن شوية خروجات وقلل الرفاهيات على قد ما تقدر

3- تابع كام مسلسل واعمل ليست بأفلام عايز تشوفها عشان الحاجات دي اللي هترجعك البيت فلو ماعملتش كده هتخرج مع أي حد يقولك تعالى ننزل 

4- استفيد بأكل البيت الصحي الجميل ومش لازم تأكل من برا وأهو منها عشان صحتك برضه 

5- خلي اختيار إنك تستلف من حد أخر اختيار عشان دي  دوامة مش هتخلص منها في الشهور اللي بعد كده 

6- ماتتكسفش تقول مش معايا فلوس أو إنك خلصت فلوسك لإن الكلمة دي هتلحقك من حاجات كتير ممكن تتدبس فيها 

7- لو عندك حد بيصرف عليك أوعى تتخانق معاه اليومين دول واكسبه هو ورضاه على قد ما تقدر.. واطلب منه فلوس عشان هتزينوا المكتب في الشغل عادي 

 8- بلاش تتضايق وتحسس نفسك بالفقر عشان المشكلة مش متعلقة بقلة مرتبك أو تبذير منك.. عشان أنت اتبسط بس فقير

9- خليك فاكر إنك محتاج تبدأ تحوش عشان الأزمات اللي زي دي من الشهر الجاي جامد.. جامد أوي