هو اللي يشوف بلاوي الناس.. المفروض يحس بإيه؟

كتب: علي طارق 

اللي يشوف بلاوي الناس تهون عليه بلوته.. كلمة أكيد سمعتها في وقت ما في حياتك.. ودايمًا بتتقال عشان تهون عليك.. تحسسك إن في ناس حالتهم أسوأ منك وإنك المفروض تكون راضي وماتشتكيش كتير.. بس تفتكر أثر ده عليك إيه؟ 

ده نوع من أنواع قمع أو تجاهل المشاعر.. في مقالة اتنشرت على “Psychology Today” بتقول دكتورة علم النفس “هولي باركر” إن إنكارك لمشاعرك ورفضها بشكل مستمر بيخليك تحس مع الوقت تتعامل مع ذاتك بشكل أقل من اللي تستحقه.. وبتلاقي نفسك واقع في فخ إنك ماتستحقش التقدير الكافي.

مهما كان نوع المشاعر.. سواء حب أو كره أو غضب أو حزن أو حتى فرح.. لو فضلت تنكرها كتير وتتجاهلها هتعاني أكتر في إنك تقبل نفسك ومع الوقت هتحس إنك ماتستاهلش حتى إن الناس تشوفك أو تحس بيك.

رغم إن الأبحاث اللي في المقال لسه أولية.. بس تعالى نفكر فيها.. إيه فايدة إنك تحس إن مشاعر إنسان تاني أهم من مشاعرك؟
طيب ليه لو حصلتلك مشكلة بتبسطها زي علاقة فشلت وماكملتش أو تيشيرت بتحبه اتقطع.. هل دي حاجة ماتستحقش الاهتمام؟ 

وهنا أنا مش بقولك احزن أو ماتبقاش راضي بحالك.. بس على الأقل ماتقللش من حاجة دايرة جواك.. ماترفضش جزء منك.. 

بس برضه خليك قادر توازن وتفرق بين اللي انت حاسس بيه وبين اللي انت المفروض تعمله.. يعني لو انت غضبان ماتقللش من ده.. بس ماتخليش ده مبرر لسلوك سيء يطلع منك تجاه حد.. مشاعرك جزء مهم منك بس مش كل حاجة فيك.