في اليوم العالمي للمتاحف.. متاحف في القاهرة والإسكندرية الدخول فيها مجانًا يوم 18 مايو
يوم 18 مايو كل سنة هو يوم المتاحف العالمي.. واحتفالًا بيه وزارة السياحة والآثار هتفتح كل متاحف الآثار والمتاحف التابعة للمجلس الأعلى للآثار مجانًا على مستوى الجمهورية للمصريين عشان يزروها ويعرفوا تاريخ بلادهم ويستمعتوا ببلادهم أكتر.
وكل سنة في اليوم ده الوزارة بتسلط الضوء على موضوع معين والسنة دي هيكون الحاجة اللي هيتلسط عليها الضوء هي “المتاحف من أجل التعليم والبحث العلمي”.. فلو أنت هتبقى فاضي يوم السبت 18 مايو وهيكون إجازة وويك إند عندك خد صحابك واتفسح أو لو عندك أطفال خدوا الإجازة فسحهم في المتاحف دي أو لو أنت بتحب المتاحف والتصوير روح لوحدك.. فتعالى نقولك تقدر تروح فين:
1- المتحف المصري
المتحف المصري بيضم مجموعة كبيرة من الآثار التاريخية في عصور الفراعنة ووقت ما قبل الميلاد ومكانه ميدان التحرير
2- متحف الفن الإسلامي
وده يعتبر أكبر وأهم متحف إسلامي في العالم.. وفيه مجموعات متنوعة من عصور مختلفة من الفن الإسلامي من بلاد كتير سواء من مصر أو السعودية أو العراق أو الصين أو الهند أو إيران كمان ومكانه في باب الخلق قدام مديرية أمن القاهرة
3- المتحف القبطي
المتحف القبطي بدأت فكرة إنشائه سنة 1898 واللي قال الفكرة مرقس باشا سميكة وتم افتتاحه سنة 1910 وبيضم مجموعة كبيرة من نوادر الفن القبطي ويعتبر أكبر متحف في العالم بيضم قطع مميزة من الفن القبطي ومكانه في منطقة مصر القديمة قريب من مسجد عمرو بن العاص
4- قصر المنيل:
وهو متحف قصر محمد اللي مكانه في المنيل والمتحف ده بيعبر عن تاريخ مصر الحديث وفيه تصميمات معمارية مميزة على الطراز الإسلامي ومقتبسه من المدارس المملوكية والفارسية، والمتحف مزين كمان بزخارف أندلسية وسورية ومغربية بروح عثمانية
5- متحف جاير أندرسون:
والمتحف ده مالوش اسم واحد معين له كذا اسم.. هو معروف باسم “بيت الكريتلية”وزمان كان اسمه سبيل ومنزل محمد بن الحاج سالم الجزار، وهو عبارة بيتين مربوطين بممر ويعتبر من الآثار الإسلامية النادرة اللي بتنتمي للعصر العثماني والمملوكي.. ومكانه بمنطقة السيدة زينب
6- متحف المركبات الملكية:
متحف المركبات الملكية يعتبر من أقدم المتاحف النوعية في العالم، وهدفه هو حفظ وعرض التراث الثقافي للمركبات الملكية اللي كانت مملوكة لأسرة محمد علي، وكمان بيسلط الضوء على تربية الخيل والاهتمام بيها.. ومكانه في منطقة بولاق أبو العلا.
7- متحف إيمحتب
متحف إيمحتب هو متحف أثري.. وفيه 6 قاعات عرض فيها مجموعة كبيرة من التوابيت واللوحات والاواني والتماثيل من نتائج حفر البعثات في منطقة سقارة.. ومكانه عند مجمع سقارة بالقرب من ممفيس بمنطقة دهشور
أما لو أنت من أهل إسكندرية أو رايح اسكندرية يومها صدر رد فتقدر تزور كمان 3 متاحف مجاني هناك:
1- المتحف اليوناني الروماني:
هو واحد من متاحف مصر الكبار وأقدم مبنى في مصر يتم تصميمه معماريًّا بغرض حفظ وعرض الآثار.. وهو المتحف الوحيد المتخصص في آثار وحضارة مصر في العصرين اليوناني والروماني.. ومكانه في محطة الرمل
2- متحف الإسكندرية القومي:
وده كان قصر لاحد اثرياء الاسكندرية وهو تاجر الاخشاب أسعد باسيلي واللي بنى القصر على الطراز الإيطالي وفضل عايش فيه لحد سنة 1954 وباعه للسفارة الأمريكية لحد ما اشتراه بعد كده المجلس الأعلى للآثار سنة 1996 وبعدين اترمم واتجدد واتحول لمتحف.. والمتحف فيه 1800 قطعة اثرية بتشمل كل العصور بدايه من الدولة القديمة ولحد العصر الحديث.. ومكانه في محطة الرمل
3- متحف المجوهرات الملكية:
تم إنشاء المتحف بهدف عرض مقتنيات الأسرة العلوية اللي أنشأها محمد علي باشا واللي حكمت مصر لأكثر من 150 سنة بداية من سنة 1805 ولحد سنة 1952.. وبيعرض المتحف الممتلكات اللي جمعتها العيلة طوال فترة حكمها في كل القاعات.. ومن ضمن المقتنيات قلادة مطعمة بالماس والزمرد بتخص مؤسس الأسرة محمد علي باشا، ورقعة شطرنج ذهبية، ومناظير ذهبية مرصعة بالماس والياقوت والزمرد، وأكواب ذهبية مطعمة بالأحجار الكريمة.. ومكانه في منطقة زيزينيا
