في يوم التنوع الثقافي.. بلاي ليست بأغاني بتوضحه في الفلكلور المصري 

مصر بلد فيها تعدد ثقافات كتير ومختلفة عن بعض بتظهر في حاجات كتير زي لهجة الكلام والفلكلور واللبس التقليدي لكل مكان فهنلاقي مثلا فيه اختلافات في الحاجات دي بين الصعيد والفلاحين والبدو ومدن القناة وإسكندرية وهنلاقي حاجات مختلفة كتير برضه.

وفي اليوم العالمي للتنوع الثقافي عملنالك بلاي ليست من الترث المصري اللي بيعبر عن تنوع الثقافات فيها:

1- فلكلور الصعيدي:

من أهم الحاجات اللي بتميز الفلكلور الصعيدي في الغناء هو المزمار والربابة ده غير طبعا أغاني ومواويل السيرة الهلالية اللي هي “سيرة بنى هلال” واللي كانت بتتحكي على لسان الراوي وهو بيعزف على الربابة مع فرقة من اللي بيضربوا على الرق والدف والطبلة ومعروفة عند أهل الصعيد بفن الواو زي ما قال الكتاب محمد هادى في كتابة “الفلكلور الصعيدي تنوع وثراء” .. ودي مجموعة مختلفة من أغاني وتراث أهل الصعيد:

2- فلكلور الفلاحي:

أول ما بنفكر في أغاني الفلكلور الفلاحي المصري بنفتكر أغنية “أيوه يا واد يا ولعة” بس مش دي بس أغاني الفلكلور الفلاحي.. وفيه نوعية منه بتعتمد على الطابع الهادي البعيد عن الإيقاعات السريعة والآلات الموسيقية اللي بيتم استخدامها أغلب الوقت فيها هي الناي والعود والكمان وبتعتمد على القصص الشعبية أو من التراث الاجتماعي أو عن علاقات الناس ببعض ده غير فن المديح والابتهالات الدينية.. ودي مجموعة مختلفة من الأغاني والتراث الفلاحي المصري: 

3- فلكلور النوبي:

مين فينا ماحضرش أي مناسبة نوبي ورقص على الأغاني النوبية وكان منبهر قد إيه المزيكا والأغاني مختلفة وحلوة في نفس الوقت.. الفن النوبي له نوعين في الغناء وهم غناء فردي واللي بتكون في إطار مفتوح وبتظهر موهبة المطرب وبتكون أغاني فيها غزل وارتجال وممكن مطرب تاني ينافسه والنوع ده اسمه جر النميم”.. أما النوع التاني بيكون غناء جماعي وبتكون الأغاني دي ليها طابع المرح والجمل القصيرة والإيقاع السريع..  ودي مجموعة مختلفة من الأغاني والتراث النوبي:

4- فلكلور السيناوي:

لو روحت دهب أو شرم الشيخ مرة في حياتك هتبقى حضرتك أي قعدات بدوي وسمعت فيها أغاني من التراث السيناوي اللي اسمه السامر عند البدو بس السامر في سيناء مختلف عن مناطق البدو التانية في مصر بسبب قرب سيناء من الحدود.. وأهل سيناء مشهورين بحب الغناء والشعر واستخدام الآلات موسيقية زي الربابة والناي والأرغول والتسقيف ودق الرجلين عشان يظبطوا الإيقاع ده غير إن أغلب الغناء عندهم بيكون بشكل جماعي وأغلب الأغاني التراثية السيناوية بتتسم بالهدوء والجمل الموسيقية القصيرة والمتكررة المصورة بالحركة.

لكن بسبب الموقع الجغرافي فبيكون فيه اختلاف عند أهل شمال سيناء عن جنوب سيناء يعني مثلا في الشمال فيه تأثر برقصات الدبكة (الطيارة والمجْوز)، بس ده مش موجود في الجنوب.. بس الجنوب متأثر أكتر بفنون السعودية.. ودي مجموعة مختلفة من الأغاني والتراث السيناوي:

6- فلكلور السمسمية في القناة:  

مناطق قناة  السويس وبورسعيد والإسماعيلية أغاني الفلكلور فيها مشهورة بآلة السمسمية واللي شبه آلة “الطنبورة” وطورها أهل القناة وابتكروا السمسمية منها وأشهر أغاني القناة هي “الضمة” وعبارة عن طقس شعبي بيتقابل فيه الناس وبيغنوا على السمسمية والرق والطبول والدف والمثلث.. ومغنين الضمة والعازفين بيبقى اسمهم “الصحبجية” وبيرقصوا رقصات فلكورية اسمها البمبوطية، والأغاني في الضمة بتختلف بقي بين الطقطوقة والموشح والموال والأدوار الفكاهية..  ودي مجموعة مختلفة من الأغاني والتراث البورسعيدي والسويسي والإسماعيلي: 

7- فلكلور سيوي: 

بدو سيوة التراث الفني والغنائي عندهم مختلف عن بدو سيناء.. فالغناء عندهم بيكون في حلقات ودواير كبيرة وبيسقفوا وبيستخدموا الطبلة واللي اسمها “طوبيل” والمزمار والمقرونة وهي آلة نفخ فيه منها نوعين نوع اسمه الستاوية ونوع اسمه الخمساوية والطار اللي هو الدف والشبابة واسمها باللغة السيوية ” تيجعبت – تشيبت ” وهي آلة شبه الناي شوية.. وباستخدام الآلات دي بيبدأ الناس تغني والشباب والرجال يرقصوا الرقصة الشهيرة “الزجالة أو الزقالة” 

وبيكون فيه مجموعتين من الناس المجموعة اللي بتغني وباقي الناس بيردوا عليهم وهما بيسقفوا معاهم.. ودي مجموعة مختلفة من أغاني التراث السيوي: