أضرار السكر والحلويات على الجسم.. وإيه بدايلهم الصحية!

السكر من المنتجات اللي بتتحط على أي أكله أو مشروب بيخلوا طعمهم حلو أوي مش اللي هو مسكر لا لذيذ كمان ومابتقدرش تقاومه وبالتالي هتلاقي نفسك لو قدامك أي حاجة حلوة أو مسكرة بتقاوم بصعوبة إنك تبطل تاكلها أو ماتاكلش منها أصلا.. لكن للأسف كل حاجة حلوة عمرها قصير والعلم أثبتلنا إن الحاجات الحلوة والسكر هما من أكتر الحاجات اللي بتسبب سمنة وأمراض مزمنة زي السكر مثلا.

فخلينا نقولك شوية أسباب تخليك تبطل تاكل سكر كتير أو حاجات حلوة بشراهة حسب ما قال موقع “WebMD”:

1-  زيادة الوزن:

المشروبات اللي فيها سكر تعتبر مصدر كبير للسكر المضاف، وإزازة المشروبات الغازية يوميًا لمدة 3 سنين بتزود الجسم حوالي 1.5 كيلو، وبالتالي الزيادة المفرطة في الوزن بتوصل لمشاكل صحية زي السكر وبعض أنواع السرطان.

2- أمراض القلب:

الأشخاص اللي بياكلوا سكر مضاف نسبة إصابتهم بأمراض القلب بتزيد لإن السكر بيسبب رفع ضغط الدم وبيزود دهون تانية في مجرى الدم، وممكن يسبب نوبة قلبية وسكتة دماغية وأمراض قلب تانية.

 3- مرض السكر:

المشروبات اللي فيها سكر خصوصا بتزود احتمال الإصابة بالنوع التاني من مرض السكر، وده بسبب التأثيرات السلبية على هرمون الأنسولين، اللي بيحول الأكل اللي بناكله لطاقة، ونزول الوزن حوالي 5 لـ 8 كيلو جرام ممكن يساعد في تحسين إدارة نسبة السكر في الدم.

4- ارتفاع ضغط الدم:

عادة اللي بيتظلم في موضوع الضغط العالي ده هو الملح بس لو هنتكلم عن الضغط العالي بقي فالأبحاث بتقول إن السبب كمان بلورة بيضاء تانية واللي هي السكر واحتمال تبقى مقلقة أكتر أصلا من الملح، وبيقول الباحثين إن السكر بيرفع ضغط الدم عن طريق رفعه مستويات الأنسولين، اللي بيخلي الأوعية الدموية أقل مرونة وبيخلي الكليتين يحتفظوا بالمياه والصوديوم.

5- ارتفاع الكوليسترول:

الحاجات الحلوة بتشكل خطر على القلب بغض النظر عن وزن الشخص أصلا لإن الحاجات الحلوة دي ممكن تزود مستوى الكوليسترول السيئ (LDL) وتقلل النوع “الكويس “(HDL)، وممكن ترفع نسبة الدهون الثلاثية، وتعطل عمل الإنزيم اللي بيكسرها.

6- مرض الكبد:

 معظم الأكلات المعلبة والوجبات الخفيفة والمشروبات بيتم تحليتها بالفركتوز، وهو سكر بسيط من الفواكه أو الخضار زي الذرة. فالكبد بيحويل الفركتوز ده لدهون، وبتتراكم بعضها في الكبد، ومع زيادة أكل الأكلات دي هيتصاب الشخص بمرض اسمه الكبد الدهني غير الكحولي، وأكيد طبعا تغيير النظام الغذائي كل ما يكون بدري كل ما هيساعد في تحسين الحالة، ولكن في حالة استمرار الشخص في نفس النظام الغذائي اللي بيعتمد على الإفراط في السكريات المضافة مع مرور الوقت التورم والالتهاب ده هيوصل لتلف الكبد.

7- تسوس الأسنان:

دي بديهيات كلنا عارفينها من ساعة ما وعينا على الدنيا إن السكر بيسبب تسوس سنات عشان البكتريا اللي في الفم بتتغذى عليه، واللي بتسيب بعدها حمض بيشيل مينا الأسنان. وبتعتبر المشروبات السكرية والفواكه المجففة والحلويات والشوكولاتة من أهم أسباب حالات تسوس الأسنان. فلازم الشخص يغسل بوقه بالماء بعد ما ياكل أي حلويات أو يشرب حتى شوية لبن 

8- الأرق:

تناول كميات كبيرة من السكر في اليوم بيسببب اضطرابات في مستويات الجلوكوز في الدم وبيتسبب إن يحصل طفرات في الطاقة وحالات ارتباك. فممكن لما الشخص ياكل علبة أيس كريم مثلا أو بسكوت فيه سكر بليل ده يخليه يعاني من الأرق، ده غير إنه السكر كمان بيسبب تقليل لفترات النوم العميق وده اللي بيخليك تصحى الصبح وأنت حاسس إنك تعبان ومرهق برضه.

9- تقلبات مزاجية:

الأكلات والمشروبات اللي فيها سكر مضاف بتوصل الشخص إنه يحس إن عنده اكتئاب، فيه مجموعة دراسات علمية ربطت بين مشاكل السكر والصحة العقلية وكشفت دراسة منهم إن الرجالة اللي بياكلوا أكتر من 66 جرام سكر في اليوم وده ضعف اللي المفروض ياكلوه يعني كانوا عرضة أكتر بنسبة 23٪ للإصابة بالقلق أو الاكتئاب مقارنة بالرجالة اللي  بياكلوا أكتر من 40 جرام أو أقل. والسكر الكتير بيزود نسبة الاكتئاب وده عن طريق التوروم أو الالتهاب في المخ وده شئ منتشر عند الأشخاص اللي بيعانوا من الاكتئاب.

10- النقرس:

أكل اللحوم الحمراء كتير والفركتوز بيسببوا الالتهاب المفصلي المؤلم، واللي هو اسمه النقرس، فلما الفركتوز بيتكسر في الجسمى بيخرج مادة كيميائية اسمها البيورينأت، ودي بتسبب تراكم حمض اليوريك في الدم، واللي بدوره بيتشكل في شكل بلورات خشنة في صباع الرجل الكبير وفي الركبة والمفاصل التانية.

11- حصوات الكلى:

الإنسان بيتصاب بحصوات في الكلى عموما لما بتتحول الرواسب في البول لبلورات صلبة. وبالتالي ممكن الجسم يفرز بعض حصوات الكلى بدون ألم، ولكن بعض الحصوات يمكن تلزق في جدران الكلى أو في المسالك البولية. وده اللي بيخلي ممكن الزيادة في  الفركتوز يتسبب في حصوات الكلى.

طيب لو حسيت إنك عايز تاكل حاجة حلوة أوي ومش قادر تعمل إيه؟ أكيد من الأحسن إنك تفكر في بدايل صحية للسكر وتدمجها في نظامك الغذائي، والبدائل دي زي ما قال موقع ” only myhealth” في أحد مقالاته وهما:

1- العسل:

العسل مُحلي طبيعي جميل وبديل رائع للسكر وغني بمضادات الأكسدة والفيتامينات والمعادن، ومعزز للطاقة، لكن افتكر إنه برضه شكل من أشكال السكر فلازم تستخدمه بكميات معينة.

2-شراب القيقب:

وهو بديل طبيعي برضه للسكر فيه مضادات الأكسدة والمغذيات،ومنخفض السعرات الحرارية وله مؤشر نسبة السكر في الدم أقل من السكر العادي، فده معناه إنه مش هيتسبب في ارتفاع السكر في الدم، فممكن تحطه على دقيق الشوفان أو الفطاير أو الزبادي.

3- التمر:

التمر فاكهة طبيعية فيها ألياف والفيتامينات والمعادن كتير وممكن تستخدمها بديل للسكر في وصفات كتير

4- سكر جوز الهند 

سكر جوز الهند هو سكر طبيعي مصنوع من عصارة أشجار نخيل جوز الهند. وله مؤشر منخفض على نسبة السكر في الدم وبيحتوي على الفيتامينات والمعادن ومضادات الأكسدة، وطعمه زي السكر البني.