أعراض لو ظهرت عليك.. فأنت محتاج تطلب مساعدة نفسية
كلنا بنواجه ضغوطات ومشاكل مختلفة في حياتنا بشكل شبه يومي وبسبب الضغوطات والمشاكل دي ممكن نتعرض لاضطرابات نفسية كتير تأثر علينا بشكل سلبي، وممكن الموضوع يتطور لمرض نفسي ونبقى فعلا محتاجين تدخل طبي أو مساعدة من حد مختص وإحنا مش واخدين بالنا.
وعشان صعب تتعرف على الأعراض اللي تقولك إنك محتاج مساعدة من شخص متخصص لوحدك هنقولكم في الموضوع ده على أغلب الأعراض والمشاكل المنتشرة اللي ممكن تحصلنا فنحتاج بسببها نروح لدكتور نفسي أو نخضع لعلاج نفسي، وخلينا نتفق قبل أي حاجة طبعا إن ده مش عيب ولا وصمة ولا الشخص اللي بيمر باضطرابات نفسية مجنون، ولكن كل الفكرة إنه محتاج حد مسؤول أو متخصص يساعده يلاقي حل في الاضطرابات أو المشاكل النفسية دي، عشان يرجع يكمل حياته عادي وماتبقاش بتأثر عليه.
وطبقا لموقع Forbes و GoodTherapy و Healthline الأعراض دي بتكون زي:
-
لو بتحس إن عندك شعور طول الوقت أو أغلب الوقت إنك عايز تموت أو بتفكر في الموت كتير أو حابب الفكرة أو لو عندك أفكار انتحارية بتجيلك أوقات كتير.
- لو عند شعور طول الوقت بالوحدة أو بتميل للعزلة والوحدة أو بتقطع علاقتك بالناس اللي حواليك من غير أسباب قوية، وتبدأ تبقى منطوي جدا وعايز تبقى بعيد عن حتى أقرب الناس ليك.
- لو بتحس بشوية تقلبات مزاج وإنك في أوقات بتبقى سعيد ومبسوط جدا وبعدين فجأة مودك يتغير لحزن شديد أو عياط وتلاقي نفسك بتنهار مع إنك من شوية كنت عادي ومبسوط.
- لما يبقى عندك أغلب الوقت دوخة أو صداع أو مشاكل صحية بتستمر لفترات طويلة، والمسكنات أو الأدوية مبتجبش معاها نتيجة، وملهاش سبب عضوي واضح.
- لما يبقى عندك اضطرابات معوية أو مشاكل في المعدة والهضم ومغص وغثيان ورغبة في القيء وحموضة وإحساس بعدم الراحة، وكل ده مايبقاش له سبب عضوي واضح.
- يكون عندك أرق أو صعوبة في النوم بشكل متكرر ومبالغ فيه، وإنك ماتبقاش عارف أو قادر تنام خالص أو على النقيض بقى تبقى بتنام كتير جدا ورغم كده حاسس بتعب وإنك عايز تنام تاني.
- الأمراض النفسية زي الاكتئاب والقلق والتوتر والوسواس القهري بيبقى ليهم تأثير واضح وكبير على أداء المخ، وممكن تلاقي نفسك مش عارف تركز أغلب الوقت وبتنسى حاجات كتير وفيه بطء أداء شديد على غير عادتك.
- يبقى عندك اضطراب شهية وتلاقي نفسك في بعض الأوقات عندك شهية كبيرة جدا وبتاكل كتير حتى وأنت مش جعان أو رافض الأكل تماما ومش عايز تاكل أي حاجة.
- لما تبدأ في إهمال تفاصيل حياتك اليومية بشكل واضح، والدنيا تبقى فوضوية أوي، وتهمل شكلك ونظافتك الشخصية ومظهرك ولبسك، ويبقى عندك شعور عام بعدم الاهتمام بنفسك واللا مبالاة.
- لو عندك طول الوقت شعور عام بالحزن والزعل والضيق والخنقة وماتبقاش بتفرح أو تتبسط بالحاجات اللي كانت في العادي بتفرحك وتسعدك.
- لو بتفقد نشاطك وتحس إن وجودك ملوش قيمة وإن مفيش حاجة بتعملها مهمة أو ليها لازمة، ويبقى عندك عدم رغبة في إنك تعمل أي حاجة، وفيه استهتار بمستقبلك وشغلك، أو تشتغل وأنت طول الوقت حاسس إن ماعندكش طاقة ومش عايز تشتغل.
- لو بتلاقي نفسك بتتعصب عصبية مفرطة وإنك بتتعصب بشكل مبالغ فيه على أبسط وأتفه الأسباب، واللي في العادي ماكنش بيعصبك.
- المعاناة من الهلاوس وإنك تبدأ تسمع وتشوف حاجات مش موجودة بالفعل أو مش واقعية، مع إنك بتعاني من الإرهاق والتعب المستمر اللي بيصاحب الهلاوس دي
كل دي وأكتر أعراض لو ظهرت عليك بشكل كبير وواضح ومتكرر، فأنت بنسبة كبيرة محتاج تبدأ تروح لدكتور أو معالج نفسي علشان يبدأ معاك رحلة علاج نفسي وتقدر تتعرف على نفسك أكتر والمشاكل اللي عندك وتبدأ تظبط كل المشاكل والاضطرابات النفسية اللي بتواجهك وتلاقي حياتك بتتظبط من أول وجديد.
وخليك دايما عارف إنك مش لوحدك.. وإنك مش السبب في أي حاجة سيئة أو صعبة بتتعرضلها.. بس أنت المسؤول إنك تعالج ده وتصلحه لما تعرف سبب المشكلة.. عشان أنت تستاهل إنك تبقى أحسن وأفضل.. لنفسك قبل ما يبقى لأي حد تاني!
