أغاني تبان رومانسية بس ليها معنى سياسي ووطني
كل أغنية بتسمعها بتديك شعور معين وبتعيش فيه.. فيه اللي تحسسك إنك بتعيش قصة حب وفيه اللي تسمعها تحس بعدها إنك عاوز ترمي نفسك من البلكونة.. بس فيه أغاني تانية بتدندنها وبتغنيها بشجن وحب بس اللي ماتعرفوش بقى عنها إنها اتكتبت لأحداث سياسية.. وهنا هنحكيلك قصص شوية منهم
-
قولوا لعين الشمس
بعد حادثة دنشواي سنة 1910 فيه شاب مصري اسمه “إبراهيم الورداني” وكان لقبه “غزال البر” راح وقتل رئيس الوزراء ساعتها “بطرس باشا غالي” اللي صادق على إعدام 6 فلاحين مصريين قتلوا جنود بريطانيين بعد قتلهم فلاحة مصرية في حادثة دنشواي.. واتحكم على “الورداني” بالإعدام بالرغم من عدم موافقة المفتي ساعتها.. فخرج الشعب في مظاهرات بيقولوا “قولوا لعين الشمس ما تحماشي.. أحسن عزيز البر صابح ماشي”.. ومن هنا الجملة دي بقت جملة وداع الأحباب.. عشان في سنة 1919 بعد قرار اعتقال سعد زغلول خرج الشغب برضه وقالوا “قولوا لعين الشمس ما تحماشي.. أحسن زعيم الوفد صابح ماشي”.. وفي سنة 1966 طلب بليغ حمدي من الكاتب مجدي نجيب يكتب أغنية لشادية فاستخدم الجزء ده من الأغنية
2. الليلة يا سمرا
الأغنية اتولدت جوه زنزانة في بدايات ستينيات القرن اللي فات.. لما كتبها الشاعر فؤاد حداد في عيد ميلاد المناضل زكي مراد وكان معاه في السجن الملحن “أحمد منيب” والمغني “محمد حمام”.. ولما خرجوا من السجن قرر “محمد حمام” تسجيل الأغنية في الإذاعة المصرية واتشهرت ساعتها بس بمرور الأيام الأغنية راحت عليها.. ورجعت تاني لما غناها محمد منير بصوته في نفس السنة اللي استردينا فيها طابا فارتبطت بعودة الأرض وده ظهر في “البنت قالت فستاني منشور على الشط التاني.. خدني المراكبي وعداني ورجعت في القمراية الليلة”.. فكان فيه إشارة لمصر إنها البنت اللي فستانها منشور على الضفة التانية اللي استرديناها من العدو
3. شادي
قصة الأغنية بتعبر عن هجرة الأطفال الفلسطينيين والواقع المؤلم اللي بيعيشه الأطفال هناك وضياع برائتهم..مش عن حبيب لفيروز… ومن بعدها بقت الأغنية تعبير عن الفقد عند السوريين من خلال جملة “ضاع شادي”
4. شبابيك
اتولدت الأغنية في المعتقل على إيد الشاعر محمد نجيب عشان يعبر بيها عن اشتياقه للحياة بره السجن وحبه للوطن اللي مش عارف يشوفه غير من ورا الشبابيك.. وعن حبه للرئيس الراحل جمال عبد الناصر اللي كان شايفه الأمل وقرر يحبسه وده ظهر لما قال “واللي كان خايف عليك انتهى من بين إيدك”
5. شجر الليمون
الأغنية ليها تفسيرات كتيرة ولكن كلها ارتبطت بالأرض والوطن.. فبسبب اسم الأغنية ارتبطت بأشجار الليمون اللي فلسطين مشهورة بيها ولما قال “شجر الليمون دبلان على أرضه” رغم إن أشجار الليمون مابتتدبلش إلا إنه كان يقصد بيها معاناة الفلسطينيين مع الاحتلال واشتياقهم لأرضهم.. تفسير تاني هو ارتباط الأغنية بالمغتربين المصريين في الخليج عشان في فترة التمانينات كانت الإعارة نظام منتشر بين المصريين عشان يدوروا على شغل فكانت الأغنية بتعبر عن إحساس الشباب المغترب اللي سايب بلده وبيهاجر.. وتفسير تالت للأغنية وهو تفسير ضعيف بيقول إن الأغنية ارتبطت بتهجير النوبيين اللي حصل في فترة بناء السد العالي في عهد جمال عبد الناصر وده بعد ما وزعها أحمد منيب ليها اللي له لكنة نوبية ودخل عليها آلات نفخ نوبية
