أغاني حمزة نمرة.. والحرب الوحيدة التي لا يراها أحداً!

عادة الأغاني بتكون بتتكلم عن الحب الشوق الهجر الفراق وكل المشاعر اللي بينهم أو شبههم.. أو عن مراحل ما قبل الحب وحلاوة البدايات أو قسوة النهايات والحزن.. وكل ما يتعلق بقصص الحب بين راجل وست سواء نجحت وننزل بأغنية “لما نعيش في تبات ونبات” زي ما قال محمود العسيلي وبشرى.. أو ماكملتش وعملت تروما  ونطلع بـ “بتمنى أنساك” وملامحك من بالي تزول وليلة كبيرة سعادتك زي ما قالت شيرين

حتى لما ظهر لاين كده بيتكلم عن الصحاب بالذات في الأغاني الشعبي كانت النسبة الأكبر .. عن غدر الصحاب والصحاب يلا مش جدعان يلا وأندال أندال

وما بين ده وده.. قليل أوي لما كنا بنلاقي حد بيعمل أغاني عن الحرب التي يخوضها الجميع.. ولا يعرف الجميع برضه عنها شيء.. أو زي ما قولنا عليها في العنوان “الحرب الوحيدة التي لا يراها أحداً”.. وهي حرب الإنسان مع نفسه وخناقاته معاها في مراحل حياته المختلفة.. مع إن دي أهم علاقة في العلاقات كلها لأن دي العلاقة الوحيدة اللي معاك من أول لآخر لحظة ليك في الدنيا 

وده اللي حاول “حمزة نمرة” يوصله من خلال أغانيه.. واللي هتلاقيها دايمًا خبطت في حتة إنت مريت أو بتمر أو هتمر بيها.. كأن حد بيفكر معاك بصوت عالي وبيشاركك خوفك ووجعك ووحدتك.. وأحيانًا قلقك وضعفك من اللي جي أو ندمك وحزنك على اللي راح.. وكمان أحلامك باللي جي.. وساعات هتلاقيه بيشرح صدمتك في الناس.. وبعدها محاولاتك إنك تصبر نفسك وتحاول ترجع رايق تاني.. وفي كل مرة بيفكرك إن “ولا صحبة أحلى صحبة أحلى من تجلي الذات..ولا حضن أدفى من ونس في النفس” 

في عيد ميلاده الـ 44.. اختارنالك 9 أغاني لحمزة نمرة بيعبروا عن كل الحاجات اللي لسه قايلينها دي.. واللي ممكن تلاقي إنك  عيشت مع نفسك وجربت تجارب من اللي اتقالت فيهم 

1-فاضي شوية

2-داري يا قلبي 

3-تسمحي 

4-الوشوش 

5-صوت 

6-كله بيعدي 

7-معلش 

8-رايق 

9-ولا صحبة أحلى 

كل سنة وإنت طيب يا فنان.. وكل سنة وإنت بتعبر عن أهم وأصعب حرب بنخوضها في حياتنا.. والحرب الوحيدة التي لا يراها أحداً!