أفلام فلسطينية مهمة تقدر تتفرج عليها
بنرشحلك مجموعة مختلفة من الأفلام الفلسطينية اللي اتكلمت عن فلسطين والقضية والاحتلال والحياة اليومية هناك والتفاصيل الإنسانية والحرب والحب والتفاصيل اللي بيعيشها الفلسطينيين في حياتهم اليومية تحت الاحتلال
The place – المكان
فيلم قصير لا يتعدى الدقيقة ونصف بيشرح ويلخص القضية الفلسطينية للعالم.
Eyes of a Thief – عيون الحرامية
الفيلم بيحكي عن طارق اللي بيخرج من السجن بعد مدة طويلة قضاها فيه وبيرجع للضفة الغربية علشان يدور على بنته اللي ميعرفش مكانها وخلال الفيلم في عقبات كتير بتواجهه وأسرار كتير بنعرفها عنه.
It must be heaven – إن شئت كما في السماء
الفيلم بيتتبع المخرج “إيليا سليمان” وسفرياته من الناصرة لأوروبا في رحلة تأمل وبحث وبيمر على باريس ونيويورك وفي خلال رحلته بيكتشف تشابهات كتيرة غير متوقعة بين وطنه فلسطين وبين البلاد التانية.
Between Heaven and Earth – بين الجنة والأض
الفيلم بيحكي عن تامر وسلمى اللي متجوزين بقالهم خمس سنين وعايشين في فلسطين.. وأول مرة تامر بيحصل على تصريح بدخول المناطق المحتلة بتكون عشان يقدموا أوراق طلاقهم في المحكمة بالناصرة.. وفي المحكمة بيفاجئهم اكتشاف أسرار كتير عن ماضي والد تامر.
Omar – عمر
الفيلم بيحكي عن شاب فلسطيني اسمه “عمر” بيناضل علشان يوصل لحرية وطنه.. وبيحب بنت عايشة في الجانب التاني من الجدار الفاصل، وعشان يقابلها لازم يعدي الجدار ويتفادى رصاص جنود الاحتلال كل مرة، وقبل ما يتجوزوا بيتم اعتقال عمر بسبب تورطه في هجوم على جيش الاحتلال قتل فيه جندي.. وبيتعرض للتعذيب في السجن عشان يقول أي معلومات وبعد كده بيضغط عليه عشان يبقى مخبر.. وبنشوف إيه اللي هيحصل.
Gaza Mon Amour – غزة مونامور
الفيلم بيحكى عن الصياد عيسى وقصة حبه السرية وفي يوم من الأيام بيلاقي تمثال بيغير حياته تماما والمشاكل بتبدأ لما الحكومة بتعرف موضوع التمثال.
The Present – الهدية
فيلم قصير بيحكي عن يوسف وبنته الصغيرة اللي بيروحوا في رحلة للضفة الغربية علشان يشتروا هدية لمراته بمناسبة عيد جوازهم وبنشوف خلال رحلتهم الصعوبات اللي بيتعرضولها ونقاط التفتيش الكتيرة لمجرد إنهم رايحين بس يشتروا حاجة.
Farha – فرحة
الفيلم بتدور أحداثه سنة 1948م وبيعرض قصة حياة فرحة وهى بنت عندها 14 سنة نفسها تتعلم وتبدأ حياة مختلفة لكن بتحصل النكبة الفلسطينية في نفس الوقت وبيدخل الاحتلال قريتها والقرى المجاورة وبنشوف إزاي فرحة هتحاول تنجو بحياتها وسط كل ده.
Bonbone – بونبونة
فيلم قصير بيحكي عن زوجين فلسطينيين بيحاولوا يلاقوا طريقة إنهم يخلفوا بيها على الرغم من الصعوبات اللي بتواجهم وهى اعتقال الزوج وبنشوف خلال الفيلم بيعملوا ده إزاي.
Divine Intervention – يد إلهية
الفيلم بيحكي عن شخص من القدس معجب ببنت من رام الله وبتفصل بينهم الحدود ونقاط تفتيش الاحتلال وبنشوف العقبات اللي بيمر بيها المخرج” إيليا سليمان” خلال رحلته علشان يقابل حبيبته وبنشوف حياة الناس اللي حواليهم بطريقة فيها كوميديا سوداء.
200 Meters – 200 متر
الفيلم بيحكي عن مصطفى، أب أتحاصر عند الجدار العازل وبنشوف العقبات اللي بيواجها علشان يقدر يوصل المستشفى لابنه.
PARADISE NOW – الجنة الآن
الفيلم بيحكي عن أصدقاء الطفولة سعيد وخالد عايشين في مدينة نابلس في فلسطين بيحاولوا يعملوا عملية فدائية في الاحتلال لكن الأمور مبتمشيش زي ما هم مخططين لها.
The Flag – علم
الفيلم بيحكي عن المراهق الفلسطيني “تامر” اللي بيعيش حياة تقليدية هو وأصحابه في المدرسة الثانوية، لحد ما تظهر زميلتهم “ميساء”.. وتامر بيعجب بيها وبيحاول يلفت نظرها ويخليها تعجب بيه فبيوافق على المشاركة في عملية غامضة تحت اسم “عَلَم” بتقلب حياته تماما.
