أكلات تخلي ريحتنا حلوة.. وأكلات العكس!

بمناسبة إن الجو بدأ يحرر جمعنالك شوية أكلات تساعدك تحافظ على ريحة جسمك تكون كويسة وكمان تحسنها.. وأكلات حاول تتجنبها عشان الناس ماتهربش منك بسبب الريحة!

حسب دراسة لجامعة كاليفورنيا كل حد فينا له ريحة جسم مميزة.. وده بيرجع لشكل حياتك وأكلك والهرمونات وطبعًا الصحة والنظافة الشخصية

قبل ما نقول الأكل اللي بيساعد على كده خلونا الأول نوضح “الفيرمون” وعلاقته بريحة الجسم.. الفيرمون ده نوع من الهرمونات لكن بيختلف عنهم بإنه بيتم إفرازه خارج الجسم غالبًا عن طريق الجلد وعشان كده هو له علاقة بريحة الجسم 

الأكلات اللي بتساعدك تحافظ على ريحتك حلوه:

1- التفاح

من الحاجات اللي بتخلي ريحة بوقنا حلوه لأنه فيه عامل مضاد للبكتيريا

2- الحمضيات

 زي البرتقال والليمون وغيرهم.. الجسم نفسه بيمتص الروايح الطبيعية وده بيخلي البشرة رايقة وفريش

3- الزبادي

فيه بكتيريا مفيدة في الزبادي لأنها بتكافح السموم وده بيمنع البكتيريا اللي بتعمل ريحة مش حلوة

4- الشاي الأخضر

عنده مادة جدعة أوي اسمها “البوليفينول” ودي عبارة عن مضادات أكسدة بتقلل الحاجات اللي بتسبب ريحة وحشة في الجسم 

5- في بقى حاجات تانية زي الكرفس ومياة الليمون والقرفة والطماطم وزيت جوز الهند والبقدونس 

6- المياة

ودي مش محتاجين نوصي بيها مهمة لكل الجوانب الصحية بس هنا مهمة عشان بتمنع تراكم السموم في الجسم

يعني الأكل اللي بيساعد على الريحة الحلوة هو الأكل الفريش والفاكهة والخضروات ده طبعًا بالإضافة لروتين النظافة الشخصي اللي كل حد فينا عارف هو بيمشيه إزاي عشان يتعامل مع الجو اللي إحنا بقينا فيه ده

الأكلات اللي بتخلي ريحة الجسم مش كويسة:

التوم والبصل طبعًا مش محتاجين كلام.. وفي شوية خضروات زي القرنبيط والكرنب وبعض اللحوم الحمرا والسمك والأكيد هو الأكلات السريعة والحاجات اللي فيها طعم صناعي