“أنا كوكب ماشي لوحده ومافيش للوحده حدود”.. جولة داخل كوكب “عمر طاهر”
![](https://theglocal.com/wp-content/uploads/2024/07/644.png)
“مش كل مرة هتتعب فيها هتوصل للي إنت عايزه.. بس عمرك ماهتوصل للي إنت عايزه من غير ماتتعب”
النهاردة عيد ميلاد “عمر طاهر” اللي اتولد في محافظة سوهاج 23 يوليو 1975 وهو خريج تجارة جامعة حلون بس اشتغل صحفي ومحرر وكاتب وشاعر وكمان مؤلف.. عمر طاهر اتشهر بأسلوبه الساخر في الكتابة وبدايته السينمائية كانت بفيلم “عمليات خاصة” في 2007.. فا تعالوا ناخد لفة كده في الأعمال بتاعته
1- الصحافة
اشتغل صحفي في مؤسسة الأهرام “مجلة نصف الدنيا” و”جريدة اضحك للدنيا” و”مجلة علاء الدين” وكمان مسك رئيس قسم الفن في “جريدة صوت الأمة” ومراسل لـ “إذاعة النور” في القاهرة بين 2000 و2001
كتب في جرايد تانية زي جريدة الدستور المصرية وجريدة المصري اليوم ومجلة مزيكا ومجلة إحنا.. وبيكتب دلوقتي في جريدة التحرير مقال يومي بعنوان “مصري أصلي”
2- الكتب
وهنا بندخل في لعبته المفضلة وهي “الكتابة” اللي كان بيعملها بسلاسة كبيرة جدا وبيوصل الفكرة بكل بساطة.. ودول شوية من أفضل الكتب اللي عملها ونبذة صغيرة عنها أو اقتباسات صغيرة منها:
- صنايعية مصر
بيقول عن الكتاب ده في برنامج “باب الخلق” مع الإعلامي محمود سعد إن فكرة الكتاب ماجتش من منطقة الشغل أصلا ولكن جت من حتة الشغف والفضول ناحية اللي سماه “منتج صُنع في مصر” وبدأ يدور بقى مين اللي شارك في صناعة المنتج ده ومين كمان ساهم في إنه يكون ذوقه بشكل عام ويشرّبه الثقافة سواء الغنى أو الشعر أو غيرهم من الحاجات اللي بتشكل حياته.. وده تقريبًا هو هو وصف الكتاب ووصف الموضوع اللي بيتناوله
- أثر النبي
متأثرا بالأستاذ والكاتب الكبير عباس العقاد وعائشة عبدالرحمن حاول ياخد الموضوع من نقطة التوثيق والكتابة لمنطقة الأدب وتحليل الشخصيات والمواقف والأحداث.. ويعتبر الكتاب ده واحد من أكتر الكتب مبيعًا واللي بيقول إنه أكيد من أجمل كتب عمر طاهر وهنا بيحكي فيها عن 12 راجل وست كانوا حول الرسول صلى الله عليه وسلم وإزاي اتأثروا بشخصية النبي ووجودهم حواليه
- كحل وحبهان
“فسدت شهيتي أنا الذي كنت أرى في الطعام مابعد الطعام. لا يوجد ما هو أشهى من طعام استقر لفترة داخل فخارة في النار.. تمامًا كالتجارب التي تسوي جاذبية الواحد على مهل. الفاكهة التي أعود بها من السوق لا ضامن لها… وهي غدَّارة مثل اختيارات الواحد العاطفية”
هنا بيحاول يقدم طعم كل التجارب وريحتها باستخدام الأكل.. من تجارب حياتية يومية وتجارب عاطفية وغيرها من التجارب إزاي تدوق طعم التجربة وتستفيد منها وتفهمها كويس
- من علم عبد الناصر شرب السجائر
وإنت قاعد مع نفسك كده ساعات بتتسائل في أسئلة وجودية كتير وأسئلة حتى عادية الفضول بيخليك عايز تعرف إجاباتها وأسباب إنها حصلت.. وهنا الكاتب جاله تساؤلات كتير بدأ يدور عليها وكمان لفت انتباهه أسئلة تانية جديدة ماكانش متوقعها واللي منها:
عنوان الكتاب وكمان “ما الذي يدفع الملك فاروق لصداقة كهربائي؟” و”لماذا قام محمد علي بتأميم البن؟” وشوية أسئلة كتير موجودة حاول يدور عليها في هوامش الكتب وعرف يوصل لإجاباتها وهو مش بيجاوب على الأسئلة على طول لكن بياخد القارئ في رحلة كده لعالمه وكمان في الأحداث السياسية والاجتماعية والثقافية في أول فصل وبعد كده بيبدأ يجاوب على الأسئلة
3- السينما
بدايته كانت مع فيلم “عمليات خاصة” في 2007 بكتابة السيناريو والحوار وبعدها بيألف “سوبر هنيدي” وكمان فيلم “طير إنت” اللي كان في 2009 بالسيناريو والحوار وتأليف فيلم “نظرية عمتي” وفيلم “كابتن مصر” و”يوم مالوش لازمة” وعندنا بعض المسرحيات اللي من تأليفه زي “شغل عفاريت ولما كنت مراهق ويا طالع القلعة”
4- الإذاعة والتليفزيون
بالنسبة للإذاعة والتليفزيون بيقدم فقرة كلام جرايد في برنامج “مساءك سكر زيادة” وكتب للمحطات الفضائية حاجات تانية زي “شباب أون لاين” بالتعاون مع ناس تانية وحاجة اسمها “حلقات هادي وفادي” وبرنامج “FM tv” و”ايه اللي بيحصل ده” وحلقات “راديو ستار” وبرنامج “أخر كلام” و”جو فنانين” و”مصري أصلي”
5- الأغاني
كتب أغاني أغلبها للفنان رامي صبري وهي “حبيبي الأولاني وساكت ليه ووجه كريم وكلمة” وعنده أغنية مع الفنانة أصالة اسمها “خليها على الله” ومع الفنان حمزة نمرة كتب “احكيلك خوفي وأغنية 6 صباحا ولعله خير” وكمان لمدحت صالح كتب “يا أبو بالطو أبيض” ولعزيز الشافعي أغنية “جد الحسن”
6- الدواوين:
بالنسبة للشعر في بعض الدواوين اللي كتبها وهي “مشوار لحد الحيطة” و”عرفوه بالحزن” و”لابد من خيانة” وديوان “وضع محرج”
7- الاقتباسات:
- “مش مهم إنك تغير الكون.. المهم إنك تخلي الكون مايغيركش”
- “الحياة كوميدية بالنسبة للناس اللي دماغهم عالية ومأساة بالنسبة للناس اللي إحساسهم عالي”
- “إزاي الخوف وصلني لدرجة إني ماخافش؟ ياللي فرقتوا الحب أنا قلبي بجد ماخدش”
- “استمتع بالحاجات الصغيرة بكرة هتعرف إنها كانت كبيرة”
- “الأشخاص كالألوان.. إذا رحل عن حياتك اللون الأحمر قد يهون عليك اللون الأخضر بعض الألم لكنه مهما كان مخلصا لن يصبح أحمر في يوم من الأيام”
في النهاية عمر طاهر مؤلف وكاتب شاطر ومتميز بأسلوبه اللي أضاف للأدب والصحافة المصرية من خلال كتبه ورواياته ودواوينه الشعرية ومقالاته وقدر يعبر عن التجارب اليومية في الحياة بصدق وبشكل ساخر وده اللي خلاه قريب بشكل كبير من قرائه وكمان قدر يتواصل مع جمهور واسع ومتنوع.. مع استمراره في الكتابة هيفضل رمز لللإبداع والتجديد في الأدب المعاصر وبيوصل رسايل كتير.