أنواع النباتات اللي ممكن تزرعها في البيت بسهولة وإزاي تاخد بالك منها

ناس كتير مننا بتحب الزرع والنباتات والزراعة بشكل عام بس ماعندهمش فرصة كويسة عشان يزرعوا خصوصا إن أغلب الناس بقت تعيش في المدينة وقليل لما بتلاقي حد عنده مساحة أو جنينة يزرع فيها.. بس طبعا فيه ناس مفيش حاجة بتوقفها وبتمارس هوايتها في الزراعة والاهتمام بالنباتات عندها في البيت في البلكونة.

فلو حسيت إنك عايز تزرع في بيتك سواء عشان شكل البيت يبقى حلو أو تنقي الهوا وتخلي الجو مريح في بيتك أو أنت أصلا نفسك تهتم بنبات وأنت لسه مبتدئ.. فتعالى نقولك على شوية نباتات سهل تزرعها في بيتك غير طبعا زرعة الفول اللي كنت بتعملها وأنت صغير في نشاطات المدرسة حسب ما قال موقع “The Spruce” وموقع “Gardening Know How”:

1- الصبار (Aloe Vera):

الصبار من النباتات المفيدة جدا للجلد والجروح وعلاج حاجات في الشعر والبشرة وعشان كده مهم يبقى في بيتك ولما بتزرعه حجمه بيوصل لحد 60 سم، وبيكبر بسرعة لو اهتميت بيه، لكن من مشاكل زراعته إنك محتاج تاخد باله من المياه اللي بتديهاله لإن لو الورق بقى لونه بني فده معناة إن فيه مياه زيادة.. فتعالي نقولك بقى تعتني بيه إزاي لو عايز تزرعه في البيت:

الضوء: محتاج ضوء شمس مش مباشر

الري: لما التربة تنشف تمامًا

التربة: تكون بتصرف المياه كويس

2- نبات التعبان (Snake Plant):

النبات ده من النباتات اللي بينقي الهواء في البيت لإنه بيمتص ثاني أكسيد الكربون بالليل.. وبيكبر لحد ما يوصل لمتر وأوقات أكتر كمان بس للأسف بيكبر ببطء.. ومن ضمن مشاكلها إن برضه لو سقيتها مياه كتير فالورق بتاعها بيصفر.. ولو عايز تزرعه دي نصايح عشان تهتم بيه:

الضوء: بيتحمل الإضاءة الضعيفة أو المتوسطة عادي

الري: مرة كل أسبوعين، وياريت بلاش مية كتير

التربة: تربة خفيفة وبتصرف المياه

3- نبات البوثوس (Pothos):

يمكن نبات البوثوس من أكتر النباتات اللي بتدي شكل حلو للبيت وللمكان المزروع فيه ويمكن دي أكتر فايدة له.. بس لو برضه مصمم عليه وعايز تزرعه فتعالى نقولك بقى ممكن تهتم بيه إزاي:

الضوء: بيحب الضوء الغير مباشر لكن بيستحمل الضوء الضعيف

الري: بتديله مياه لما التربة تكون شبه ناشفة

التربة: خفيفة وبتصرف المياه

4- الريحان (Basil):

وده من أحسن النباتات اللي ممكن تزرعها في البيت عندك عشان بتستخدمه في الأكل وفي وصفات كتير طالعة تريند زي المكرونة بالريحان والبانية بالريحان والحاجات دي كلها.. فتعالي نقولك لو نويت تزرعه ممكن تهتم بيه إزاي:

الضوء: وده بقى بيحتاج ضوء شمس مباشر

الري: حافظ على التربة رطبة وارويه بانتظام

التربة: محتاج تربة تكون غنية بالمغذيات

5- النعناع (Mint):

وده كمان من النباتات المهمة إنها تتزرع في أي بيت عشان كوباية الشاي بالنعناع اللي بتبقى بعد الغدا أو بليل في البلكونة يادوب تقطف من الزرعة وتغسلها وتحطها في الشاي أو الأكل وبيبقى فريش وبيدي طعم أقوي وقتها.. فلو عايز تزرعه برضه تعالي نقولك تهتم بيه إزاي:

الضوء: بيحب الضوء الكويس بس برضه بيقدر يستحمل الضل

الري: عايز ري منتظم والتربة تكون دايمًا رطبة

التربة: بيحتاج تربة غنية بالمغذيات

وعموما لو نويت تزرع أي حاجة في البيت فتعالي نقولك شوية نصايح عامة عشان تاخد بالك من الزرع بتاعك:

1- اختيار القصيص المناسب: وخلي بالك لازم يكون فيه فتحات لتصريف المياه.

2- تنضيف الورق: مهم أوي تمسح التراب اللي على الوريق عشان النبات يستفيد من الضوء.

لف القصيص: غير مكان النبات كل فترة عشان يكبر بشكل متساوي.

التسميد: حاول على قد ما تقدر تستخدم سماد عضوي أو متوازن مرة كل شهر حتى.