أهلًا أهلًا بالعيد.. حكاية عيد العمال

كلنا بنستنى يوم واحد في شهر مايو وبندعي إنه ييجي في لونج ويك إند ونقرأ كلمة “إجازة بمناسبة عيد العمال” .. ونحتفل مع بعض بالعمال في البيت أو في البحر.. بس هو ليه يوم واحد مايو وليه بنحتفل بالعمال؟

الحكاية ابتدت في أمريكا وبالأخص في شيكاجو في أواخر القرن التاسع عشر وخصوصًا بعد الثورة الصناعية ودي اللي حصلت بعد اختراع الآلات وبسببها تحول الاقتصاد للمصانع الحديثة والآلات أكتر من الزراعة واللي العالم كان معتمد عليها قبل كده 

بسبب الثورة الصناعية بقى فيه عمال بالتبعية وفي أمريكا كان أغلب العمال دول من المهاجرين وفي أواخر القرن الـ 19 العمال النقابية الأمريكية قرروا يبدأوا يتكلموا عن ظروف العمل الصعبة وعدد ساعات العمل الكبيرة وفي سنة 1884 اجتمعت النقابات العمالية في شيكاجو وكانت طلباتهم هي ” 8 ساعات عمل.. 8 ساعات راحة.. 8 ساعات لما نشاء”

في 1 مايو 1886 قرر حوالي 300 ألف عامل الإضراب عن العمل لتنفيذ مطالبهم وبعدها بدأت الإضرابات في دول تانية كمان لنفس المطالب.

بعد شهر من الإضرابات قررت الحكومة الأمريكية إنها تنفذ مطالب العمال وتطبق قانون العمل بـ 8 ساعات شغل.. ومن ساعتها واحنا بنأجز كل يوم 1 مايو وبنأنتخ في البيت ماعدا الناس اللي بتنزل الشغل في الإجازات وبتتبسط بس إن الطريق فاضي.. كل سنة وانتم طيبين