أول ست تلعب مع الرجالة.. حكاية “كيلسي ويتمور” اللي غيرت تاريخ البيسبول

مين قال إن أي رياضة في الدنيا حكر على الرجالة بس؟ في ملاعب البيسبول.. المكان اللي طول عمرنا بنشوف فيه اللاعبين دايمًا رجالة ظهرت “كيلسي ويتمور” أو “Kelsie Whitmore” عشان تقلب الموازين وتثبت للعالم كله إن الموهبة مالهاش جنس.. وإن الإرادة بتكسر أي حواجز

• أول ست وسط الرجالة.. الخطوة اللي عملت قلق:

قصة كيلسي مش مجرد قصة لاعبة شاطرة دي حكاية تاريخية.. كيلسي لاعبة بيسبول أمريكية عندها 27 سنة بدأ حبها للبيسبول من والدها.. اللي كان بيلعب بيسبول في الجنينة كل يوم و ده كان حسب ما هي قالت “أكتر حاجه بتحب تعملها في العالم كله” و شغفها للعبة كان بيزيد يوم عن يوم.. 

كيلسي لعبت في الثانوية والجامعة مع الرجال لحد التخرج وقابلت هناك عقبات كتير لأن خصائصها الجسمانية أكيد بتختلف عنهم وفي نفس الوقت نظرة الرجالة ليها كانت عبارة عن “استهزاء” بس.. يعني هي ليه بتلعب معانا هنا وإيه اللي جابها في الملعب وحاجات زي كده.. لكنها ماستسلمتش وقالت إنها دايمًا كانت بتشتغل علي نفسها بإنها مش بس تسدد زي الرجالة ولكن تسدد أقوى وأبعد منهم.. ماكنتش ببص علي خصائصي ومميزاتي أنا ولكن إزاي أبقي أحسن منهم وده أنا ندمانة عليه ومن هنا كانت بداية الرحلة.. في 2016 كانت برضو بتصنع التاريخ لما لعبت مع فريق “سونوما ستومبرز”.. وكانت وقتها جزء من أول تجربة نسائية في دوري المحترفين المستقل

• تاريخ من “التكسير” والأرقام القياسية

الحدث الأهم اللي خلى اسم كيلسي ويتمور يتصدر العناوين كان لما وقعت عقد احترافي مع فريق Oakland Ballers سنة 2024.. الخبر ده ماكنش عادي لأن الفريق ده بيلعب في “Pioneer League” وده دوري شريك رسمي للدوري الأمريكي للمحترفين (MLB).

وبكده.. كيلسي بقت رسميًا أول سيدة في التاريخ تبدأ ماتش في التشكيلة الأساسية في دوري مرتبط بالـ MLB وتلعب جنبًا إلى جنب مع الرجالة.. وكمان نافستهم بقوة مش مجرد “شو إعلامي”.

كيلسي ويتمور تقدر تقول عليها لاعبة “جوكر”: كيلسي بتلعب في مركزين صعبين جداً (Pitcher و Outfielder).. يعني بترمي الكرة وكمان بتلعب في الدفاع الخارجي وده بيحتاج لياقة ومهارة عالية.

أما بقى مع المنتخب الأمريكي فـ كيلسي هي كابتن ونجمة منتخب أمريكا للبيسبول للسيدات وحققت معاهم الميدالية الذهبية في دورة الألعاب الأمريكية وخدت جائزة أفضل لاعبة (MVP).

كيلسي مابتلعبش لنفسها بس دي شايلة على كتافها حلم ملايين البنات.. هي تعتبر حالياً من أهم المساهمين والداعمين لتأسيس وتطوير فكرة “دوري بيسبول خاص بالسيدات”. كيلسي مكانتش بتحلم وبس دي كانت بتشتغل عشان اللحظة دي تيجي.

 وبالفعل في نوفمبر 2025 العالم كله شاف الحلم بيتحول لواقع مع الإعلان الرسمي عن تأسيس دوري البيسبول الأمريكي للسيدات ومش بس إنها ساهمت في خروج الدوري ده للنور.. لأ دي كمان فضلت “نمبر وان”. 

كيلسي ويتمور كانت أول لاعبة يتم اختيارها في “الدرافت” للبطولة.. عشان تكون هي الوجه الرسمي والأسطورة اللي هيتبني عليها مستقبل اللعبة دي للبنات واختيارها كأول اسم في الدوري هو تكريم لمسيرتها.. وإثبات إنها فعلًا “الأساس” اللي اتبنى عليه كل ده.. وهي حاليًا شغالة بقوة مع مؤسسات زي “Baseball For All” عشان تخلي الطريق يكون أسهل للجيل الجديد من سيدات البيسبول وإنهم ما يعانوش نفس معاناتها في تحقيق شغفهم وحلمهم

• الخلاصة.. “مفيش مستحيل”

قصة كيلسي ويتمور هي قصة إعجازية بكل المقاييس هي ما استسلمتش لكلمة “دي لعبة رجالة” ولا خافت من فرق القوة الجسمانية.

كيلسي بتقدم رسالة لكل بنت وست في العالم وحتى الرجالة سواء عايز تلعب أو تلعبي رياضة أو تنجحوا في أي مجال: “مفيش حاجة مستحيلة طول ما انت مصدق نفسك.. احلم وعافر.. وهتكسر الدنيا”