10 نصائح عشان من أول يناير تكون إنسان جديد

بما إن أهداف 2023 خلاص في ذمة الله وراحت علينا.. فـ إحنا محتاجين نعوضها السنة الجديدة.. وعشان 2024 ماتبقاش كربونة من السنة اللي خلصت.. وعشان تبقى من أول يناير إنسان جديد زي الأستاذ شعبان عبد الرحيم.. بنقدملك 10 نصائح هتساعدك في تحقيق أهدافك وفقًا لموقع betterup و greatist

1- كتابة الأهداف:

لما تكتب أهدافك بتكون أكثر واقعية.. وبتقدر ترجعلها في أي وقت تحتاج فيه للتذكير أو جرعة تحفيز.. وتقدر تحتفظ بيها في شنطتك أو كتاب، أو ممكن تحطها على Sticky Notes في أوضتك عشان تشوفها كل يوم.

2- أخذ العبرة من السنوات الماضية

إننا نرجع شريط الأحداث ونفتكر أهدافنا وعملنا إيه عشان نحققها.. ده ضروري وفرصة نعرف إحنا محتاجين نعدل إيه ونقدر نحققه في المستقبل..
واسأل نفسك الأسئلة دي:
هل كانت واسعة جدًا ومحتاجة تتقسم إلى لأهداف أصغر؟
هل عملت خطة للوصول للهدف ده؟
هل فيه عامل خارجي خلى هدفي صعب التحقيق؟
هل كانت عندي الموارد المناسبة لتحقيق هدفي؟
هل لسه عايز الأهداف دي؟

3- تحديد الأولويات

حدد أهمية كل هدف وحدد الأولويات بناء عليه.. وركز على عدد قليل من الأهداف الرئيسية بدل تشتيت المجهود في أكثر من حاجة.. لأن التركيز هيساعدك تستثمر أكبر قدر من الوقت والجهد لتحقيق أهداف ممكنة وهيساعدك على التأكد من عدم إهمال المهام بأنك تعطي كل هدف أهمية متساوية.

4- تصنيف الأهداف

نظم أهدافك في فئات زي الوظيفة والصحة والتنمية الشخصية والعلاقات والهوايات.. بمعنى تحط ليست لك جانب من جوانب حياتك عايز تحقق فيه حاجة معينة.

5- اختيار الأهداف الذكية

وده معناه أنك تشتغل بشكل أكثر ذكاءً، وليس بجهد أكبر عن طريق 3 أشكال للأهداف:

– محددة: تجنب الأهداف العامة وغير المحددة. حوّل الأهداف طويلة المدى إلى عدة أهداف قصيرة المدى وتحديد الموارد اللازمة لتحقيق كل هدف للحفاظ على تركيزك.

– قابلة للقياس: تقدر تقيس فيها مستوى التقدم والنجاح. لأنك لو ماعرفتش مدى تقدمك هيكون من الصعب إنك تفضل متحفز.

– قابلة للتحقيق: فكر بشكل نقدي وصادق في اللي أنت قادر على تحقيقه مع الأخذ في الاعتبار كل الالتزامات والقيود.. والتأكد من وجود المهارات اللازمة للوصول للإنجاز ده.

6- تقسيم الأهداف والمكافأة

قسّم الأهداف لمهمات أصغر يمكن التحكم فيها.وده بيسهل عليك الإنجاز ويساعدك في الحفاظ على الحافز من خلال تحقيق النجاح المتزايد عشان مع تقسيم كل هدف بتقدر تحتفل بالانتصارات الصغيرة لتحفيز نفسك.

7- إنشاء خطة لها معالم واضحة

وضع خطة عمل مفصلة لكل هدف وتحديد الخطوات المحددة المطلوبة وتحديد معالمها والمواعيد النهائية عشان تحمل نفسك المسؤولية..
وتراقب إنجازك بشكل مستمر لإكمال أهداف معينة عشان يكون عندك الفرصة لمكافأة نفسك.

8- مشاركة الأهداف مع شخص يشجعنا

شارك أهدافك مع صديق أو أحد أفراد العائلة أو معلم أو مديرك أو شخص بتثق فيه يقدر يساعدك وينصحك.. أو تدور على صديق له أهداف مماثلة عشان تشجعوا بعض. بس خد بالك ماتقولش اللي انت عايزه أو اللي بتعمله للي رايح واللي جاي.

9- التحلي بالمرونة والصبر

النجاح مش بييجي في يوم وليلة… في كثير من الأحيان بتستغرق الأهداف وقت أطول مما نتوقع… عشان كده خليك مرن في تعديل الأهداف مع تغير الظروف.. وتعديل خططك حسب الحاجة .. وخليك فاكر أن الرحلة ممكن تكون مختلفة عن اللي كنت متوقعه.. وده عادي.

10- التعاطف مع النفس

خليك لطيف مع نفسك في مواجهة النكسات أو التحديات، مارس التعاطف مع الذات…وطبطب على نفسك ماتقساش عليها.. واتعلم من التجارب وبص للتحديات على أنها فرص للنمو الشخصي.

وفي الأخر عايزين نفكرك لو قدرت تحقق أهداف السنة دي خير وبركة.. ماقدرتش عادي إحنا في رحلة خليك فريش