أين يذهب الإنسان عندما يجد أن جميع الأماكن لا تناسبه؟
معظمنا بييجي عليه وقت كده بيحس إن الدنيا كلها متفقة عليه.. الفترة بتبدأ بإنها تبوظ من جزء في حياتك زي الشغل وواحدة واحدة حياتك الاجتماعية وبعدها بالتدريج بتحس إن كل حاجة مش ظابطة معاك ولا عايزاك
حسب psychologytoday و positivepsychology و verywellmind
1- إحساس عدم الانتماء
- بتيجي فجأة كده تحس إنك مش لاقي نفسك في أي حاجة ولا مع أي حد ولا في أي مكان.. وده في الغالب هيوديك لنقطة إنك تختار تكون لوحدك وتبعد شوية
- والحل هنا بيكون إنك تبدأ تتعرف على المشاعر دي وتشوف أسبابها إيه لأن مش بالضرورة تكون حاسس حاجة وتبقى حقيقية.. ولو حقيقية محتاج تبدأ تشوف أسبابها وتفهمها وبعد كده تتعامل معاها سواء لوحدك أو بمساعدة من الآخرين
2- قوة الاستبطان “Introspection”: تبص جواك
- وفي العموم الحل هيبدأ من جواك وعشان كده بتبدأ بالاستبطان.. وده بإنك تبص على نفسك من جوه وتراقب كويس العمليات العقلية والشعورية “بتفكر إزاي وحاسس بإيه”
- بيساعدك تفهم نفسك وتدير عواطفك وساعتها هتاخد قرارات أفضل
- وده بيتعمل عن طريق إنك تخصص شوية وقت ومكان هاديين وتكتب كل اللي في دماغك وفكّر فيه بتركيز وكمان اطلب تعليقات الناس حواليك وفي النهاية أكيد هتوصل لحاجة وتلخصها قدامك وتكون عارف تحطها في إطار مش حاجة عشوائية.. وهنا كمان ممكن تاخد وقتك عادي في الإنعزال بعيد عن الناس
3- حدود الاستبطان أو إمتى تقول كفاية عليه كده؟
- لو أفورت في التفكير: أما تلاقي نفسك خلاص بدأت تفكر في تفاصيل التفاصيل ودماغك هتسيح منك من كتر التفكير ورايح لسكة أوحش من اللي انت فيها “الدنيا بتتوه أكتر مش بتوضح أكتر”
- وعشان تبعد ده محتاج تفكر من غير ما تصدر أحكام على نفسك.. معاك صلاحية تسامح نفسك على كل حاجة عشان ده مش وقت “لوم”.. ممكن تسيب اللوم لوقته
- فكّر شوية بروقان ومزاج وأهم حاجة الموضوعية عشان تقدر تتعامل مع الأفكار.. واستخدم ردود الأفعال الخارجية من الناس اللي حواليك في بتعمله
4- إمتى ترجع للطبيعي؟
- بعد ما تعمل كل الحاجات دي بالتدريج ساعتها هتكون خدت الوقت الكافي عشان الخطوات دي كلها هتاخد شوية وقت.. وده مؤشر إنك متكروتش الدنيا وترجع للطبيعي فجأة عشان مايبقاش كل ده على الفاضي
- قبل ما ترجع أو تاخد قرار بالرجوع.. هتحس إنك على طبيعتك وشعورك بالانتماء أو إن ليك عزوة كده انت وسطها هتديها واحدة “عودة العلاقات” وهنا هتلاقي نفسك شويتين
5- فيه طرق علاجية داعمة:
- زي العلاج الوجودي وده هيساعدك تعالج القلق والتوتر الناتجين عن “البحث عن معنى الوجود”
- العلاج المعرفي السلوكي “CBT” وده بيغير أشكال التفكير السلبي عن الآخرين وعن نفسك
- كمان العلاج النفسي – الوجودي / الإنساني واللي بيركز على الحرية واكتشاف نفسك الحقيقية
- كل واحد من دول ممكن تقرأ عنه وتشوف هو مناسب ليك ولا لأ وتعمله ولو محتاج دعم من متخصص أكيد اعمل ده عشان تقدر تستفاد كويس وتطبق الحاجة بشكل صح
في الآخر الشعور ده بييجي كل فترة في حياتك والحل المناسب لده هو إنك تديره أو تتعامل معاه بشكل سليم عشان تطلع منه سليم وأحسن من الأول ومستعد لأي حاجة بعد كده
