إحصائيات عن أعداد المهاجرين في العالم عمومًا.. فلسطين خصوصًا

من زمن طويل أوي والإنسان بيهاجر وبيتنقل من بلد للتانية لأسباب كتير سواء كان عشان الشغل أو عشان التعليم أو عشان فرصة لحياة أحسن أو عشان يروح لحد من عيلته سبقه على المكان التاني ده أو لأسباب تانية زي إنه يهرب من الحروب والصراعات أو الاضطهاد أو بسبب أثار تغيير المناخ في بلده.. وكل سنة يوم 18 ديسمبر العالم هو يوم المهاجرين العالمي 

لكن في في الوقت الحالي بيعيش عدد أكبر من أي وقت قبل كده في بلاد غير اللي اتولد فيها وده ووفقًا لتقرير الهجرة العالمية لسنة 2020 الصادر عن المنظمة الدولية للهجرة، واعتبارًا من يونيو 2019، عدد المهاجرين الدوليين وصل لحوالي 272 مليون شخص على مستوى العالم، زده أزيد 51 مليون عن سنة 2010. وكان تلت المهاجرين تقريبًا من العمال المهاجرين.

ونسبة المهاجرين الدوليين وصلت 3.5% من سكان العالم في سنة 2019، وده مقارنة بنسبة 2.8% في سنة 2000 و 2.3% في سنة 1980.

وزي ما قولنا إن أوقات بتكون الهجرة لأسباب غير الهروب وقتها بتكون شكل من أشكال التنمية والتقدم لكن ده في حالة إن تم إدارة الهجرة بشكل كويس لإن الفئات المهاجرة زي العمال والطلاب ورجال الأعمال وأفراد الأسرة والفنانين بيشكلوا محركات قوية للتنمية سواء في بلادهم الأصلية أو البلد اللي بيهاجروا ليها، وغالباً المهاجرين بيحاولوا يحافظوا على علاقاتهم مع بلادهم الأصلية بصورة قوية، غير إن بيبقى عندهم ثروة تانية للبلد اللي مهاجرين ليها زي المعرفة والخبرة والمهارة واللي بتستفيد منها المجتمعات الجديدة اللي بدأوا يعيشوا فيها.

وأثناء ما بيهاجر ناس بدافع الاختيار والتطور وكل الحاجات دي فيه ناس تانية بتهاجر بهدف الهروب وده بيبقي للضرورة فمابيكونش فيه اختيارات قدامهم، ووفقًا للمفوضية السامية للأمم المتحدة لشؤون اللاجئين، فوصل عدد النازحين قسراً حول العالم لـ 79.5 مليون في نهاية سنة 2019، ومنهم كان فيه 26 مليون من اللاجئين (20.4 مليون لاجئ تحت ولاية المفوضية، و 5.6 مليون لاجئ فلسطيني تحت ولاية الأونروا). ونزح 45.7 مليون شخص داخليًا، و 4.2 مليون طالب لجوء، و 3.6 مليون فنزويلي نازحون في الخارج.

موقع الأمم المتحدة قال إن في سنة 2019 وصل عدد المهاجرين الدوليين في جميع أنحاء العالم  272 مليون شخص (وده مقارنة بسنة 2017 فهو أزيد بـ258 مليون شخص) ووصل فيهم عدد المهاجرات لـ 48٪، وتم تقدير عدد الأطفال بحوالي 38 مليون طفل مهاجر، و3 من كل 4 مهاجرين دوليين كانوا في سن العمل، يعني سنهم بيتراوح ما بين 20 و64 سنة، و 164 مليون عامل مهاجر، وقالوا كمان إن حوالي 31٪ من المهاجرين الدوليين بيقيموا في قارة آسيا، و30٪ في أوروبا، و26٪ في الأمريكتين، و10٪ في أفريقيا، و3٪ في البلدان الجزرية، وده حسب ” بوابة بيانات الهجرة العالمية”

وفهم بيانات الهجرة المتاحة بيكون شئ صعب جدا لإن غالبًا بتكون متفرقة بين منظمات ووكالات مختلفة، وبيكون من الصعب مقارنتها، ومركز تحليل بيانات الهجرة العالمي التابع للمنظمة الدولية للهجرة بيتابع بوابة بيانات الهجرة العالمية.

ولو هنتكلم على أعداد المهاجرين الفلسطينين بس فلحد ذكرى النكبة الـ 75 في مايو 2023 كانت ذكرت دكتورة علا عوض رئيسة الإحصاء الفلسطيني أعداد المهاجرين وقالت إن تم تهجير حوالي مليون فلسطيني في سنة 1948 وأكتر من 200 ألف فلسطيني بعد حرب حزيران 1967، ووصل عدد الفلسطينيين الإجمالي في العالم لـ 14.3 مليون نسمة في نهاية سنة 2022، وبكده يبقى اتضاعف عدد الفلسطينيين حوالي 10 مرات من أحداث نكبة 1948، وحوالي نصفهم (7.1 مليون) نسمة في فلسطين و(1.7 مليون في المناطق المحتلة عام 1948)، والتقديرات السكانية  بتشير إن عدد السكان وصل في نهاية 2022 في الضفة الغربية “بما فيها القدس” لـ 3.2مليون نسمة، وحوالي 2.2 مليون نسمة في قطاع غزة، وفي محافظة القدس وصل عدد السكان لـ 487 ألف نسمة، ومنهم حوالي 65% (حوالي 314 آلاف نسمة) بيقيموا في مناطق القدس.

وأشارت سجلات وكالة غوث وتشغيل اللاجئين الفلسطينيين (الأونروا) إن عدد اللاجئين المسجلين وده في ديسمبر 2020، وصل لـ حوالي 6.4 مليون لاجئ فلسطيني منهم حوالي 2 مليون في الضفة الغربية وقطاع غزة، وحوالي 28.4% من اللاجئين المسجلين لوكالة (الأونروا) بيعيشوا في 58 مخيم رسمي تابع لوكالة الغوث الدولية بتتوزع بواقع 10 مخيمات في الأردن، و9 مخيمات في سوريا، و12 مخيم في لبنان، و19 مخيم في الضفة الغربية، و8 مخيمات في قطاع غزة. والتقديرات دي بتمثل الحد الأدنى لعدد اللاجئين الفلسطينيين باعتبار وجود لاجئين غير مسجلين، والأعداد دي مابتشملش العدد اللي  تم تشريدهم من الفلسطينيين بعد سنة 1949 ولا أعداد الفلسطينيين اللي اترحلوا أو اللي تم ترحيلهم سنة 1967 على خلفية الحرب واللي ماكنوش لاجئين أصلا