إزالة المنتخب الروسي وفرقه من ألعاب EA وتأجيل الجزء الجديد من Call of Duty وأخبار تانية في الملخص الأسبوعي
صباح الخير أو مساء الفُل حسب وقت قرأتك للموضوع ده، طبعا أنت كجيمر قررت تفصل من الأحداث العالمية والقلق اللي داير بقاله أسبوع وعايز تشوف إيه اللي حصل الأسبوع اللي فات في عالم الجيمز في كل هدوء، ولكن يا عزيزي ويا عزيزتي، القلق ده دخل كمان فيه عالم الجيمز كمان.
عملة لعبة Fortnite أو ما يعرف بالـ V-Bucks قيمتها بقت أعلى من قيمة الروبل قدام الدولار.. إزاي؟
سنت واحد أمريكي ممكن يديك عدد واحد من عملة اللعبة، فحين إن روبل واحد “العملة الروسية” بيساوي 0.0095 دولار أمريكي، يعني أقل من سنت “ده وقت كتابة الموضوع”.
بالرغم إن عملة لعبة فورتنايت هي عملة ملهاش أي قيمة في الواقع، أخرك تشتري بيها حاجات في اللعبة، ولكنها أغلى من الروبل الروسي.
واستكمالا لتأثيرات الغزو الروسي على روسيا نفسها.. شركة EA أعلنت في بيان إنها هتقوم بإزالة المنتخب الروسي وكل الفرق الروسية من لعبتي FIFA و NHL ردا على الغزو الروسي لأوكرانيا.
وقالت الشركة في بيان، إنها بدأت في إزالة المنتخب الروسي وجميع الأندية الروسية من كل منتجات EA Sports بما في ذلك FIFA 22 و FIFA Mobile و FIFA Mobile.
A statement from EA SPORTS FIFA: pic.twitter.com/v3pZvpblgS
— EA SPORTS FIFA (@EASPORTSFIFA) March 2, 2022
وحساب لعبة NHL على تويتر أصدر بيان مشابه، وقاله إنه هيتم إزالة الفرق الروسية والبيلاروسية من لعبة NHL 22 خلال الأسابيع القادمة وأكدوا على دعمهم للشعب الأوكراني.
A statement from EA SPORTS NHL: pic.twitter.com/2uX4h55ok4
— EA SPORTS NHL (@EASPORTSNHL) March 2, 2022
وفي نفس السياق، “ميخايلو فيدوروف” نائب رئيس وزراء أوكرانيا، نشر عبر حسابه على تويتر، بيان بيطالب فيه Playstation و Xbox بحذر الحسابات الروسية والبيلاروسية مؤقتا ووقف مشاركات الفرق واللاعبين اللي من روسيا وبيلاروسيا في أي أحداث خاصة بالرياضات الإلكترونية.
You are definitely aware of what is happening in Ukraine right now. Russia declare war not for Ukraine but for all civilized world. If you support human values, you should live the Russian market! pic.twitter.com/tnQr13BsSv
— Mykhailo Fedorov (@FedorovMykhailo) March 2, 2022
واستكمالا لكلامنا عن لعبة FIFA، الصحفي والمطلع على صناعة الألعاب “توم هندرسون” قال إن FIFA 23 من المتوقع إنه يتوفر فيها ميزة الـ Cross-Play أو ما يعرف بميزة اللعب المشترك بين المنصات المختلفة زي PS و Xbox و PC، وأضاف إنه هيتم إضافة كأس العالم للرجال والسيدات للعبة.. كل ده كلام جميل ولكن ينقصه موعد إصدار اللعبة واللي لسه مش معروف لحد دلوقتي.
Big things are coming to FIFA 23 👀🎮 pic.twitter.com/lsb76osWEE
— FOX Soccer (@FOXSoccer) March 1, 2022
خلونا نطلع من الكلام عن FIFA ونشوف خبر تاني ممكن يكون مش سعيد لفئة كبيرة من الجيمرز ومحبين سلسلة Call of Duty، وهو ‘إن في كلام عن تأجيل الجزء الجديد منها.
تقرير نشره موقع Bloomberg قال إن الجزء الجديد واللي كان من المخطط يتم إصداره السنة الجاية، هيتم تأجيله، وده وفقا لمصادر مُطلعة طلبوا عدم الكشف عن هويتهم، والسبب إن شركة Activision حاسه إنهم بيقوموا بطرح إصدارات جديدة كل سنة وبسرعة.
الشركة بقى ردت وقالت إنه في أجزاء جديدة من اللعبة متميزة ومجانية هيتم طرحها خلال العام الحالي والعام المقبل واللي بعده وإنهم هيشاركوا تفاصيل أكتر لما يجي الوقت المناسب.. وأعتقد إن ده ممكن يكون بينفي الكلام عن التأجيل، لإنه الجزء الجديد اللي اتكلمت عنها الشركة ممكن يبقى الجزء الجديد من Warzone واللي اتقال إنه هيتم إصدارها مع الجزء الجديد من Modern Warfare.. في كل الأحوال نتمنى مايحصلش أي تأجيل عشان الناس محتاجة تتخلص من الجزء الحالي لـ Warzone بسبب مشاكلها اللي مش بتخلص.
