إزاي الأطفال اللي بيتعرضوا لعنف أسري بيتأثـروا نفس تأثير المحاربين القدامى؟
كلنا عارفين أكيد إن العنف الأسري أو الصراعات العائلية اللي هي خناقة بين الأب والأم بشكل محدد ده بيخليهم يمروا بمشاكل ويتأثروا تأثير كبير لكن مش كلنا عارفين إنها بتكون بنفس قوة تأثر المحاربين القدامى بالحرب.. فـ في الموضوع ده هنشوف إزاي وليه ده بيحصل وإيه الحل بتاعه
حسب sciencedaily وحسب reuters
إزاي التأثير بيكون نفس الشكل؟
في دراسة لجامعة كوليدج بلندن عملوا مسح دماغي بالرنين المغناطيسي عشان يشوفوا تأثير الإيذاء الجسدي أو العنف الأسري لقوا إنه بيزود نشاط جزئين في الدماغ لما يشوفوا المشاهد دي
وعملوا نفس المسح الدماغي لجنود اتعرضوا لمواقف قتالية عنيفة ولقوا إن نفس الجزئين في الدماغ نشطوا ودول اللي مرتبطين برصد التهديدات والباحثون قالوا إن الجنود والأطفال دول تكيفوا عشان يبقوا واعيين أكتر بالخطر في بيئتهم
تفاصيل الدراسة
الدراسة المنشورة في مجلة “كارنت بيولوجي” خضع 43 طفلًا لفحص أدمغتهم باستخدام جهاز التصوير بالرنين المغناطيسي الوظيفي.. واتقارن 20 طفلًا تعرضوا لعنف موثق في المنزل مع 23 طفلاً من أقرانهم المطابقين اللي ماتعرضوش للعنف الأسري كان متوسط أعمار الأطفال اللي اتعرضوا لسوء معاملة 12 سنة واتحولوا كلهم للخدمات الاجتماعية المحلية في لندن
وهم موجودين في جهاز المسح اتعرض عليهم صور وشوش رجالة وستا بتظهر تعابير حزينة أو هادية أو غاضبة.. ومطلوب منهم يحددوا لو كان الوش مذكر أو مؤنت وكانت معالجة المشاعر على الوش عرضية و فالأطفال اللي اتعرضوا للعنف المنزلي زيادة أظهروا في نشاط الدماغ في الفص الجزيري الأمامي واللوزة الدماغية استجابة للوشوش الغضبانة
البروفيسور “بيتر فوناجي” الرئيس التنفيذي لمركز آنا فرويد وأستاذ علم النفس بجامعة كوليدج لندن قال:”لا شك أن بحث الدكتور ماكروري الرائد قد خطانا خطوة مهمة نحو فهم الدمار الذي قد يخلفه تعريض الأطفال للعنف وتؤكد نتائجه المثيرة الآثار المؤلمة لهذه التجارب على نمو الدماغ”
ليه ده بيحصل؟
1- الجنود في ساحة الحرب لازم يكونوا منتبهين لأي تهديد دايمًا عشان يحاولوا يتجنبوه أو يعرفوا يتعاملوا معاه
2- الطفل اللي عايش وسط صراعات بيطوّر نفس الـ hyper-vigilance أو اليقظة المفرطة عشان برضه بيكون حاسس بنفس التهديد تقريبًا
3- واللي معناهم إن الدماغ بيحاول يحميه.. لكن على المدى الطويل بيعمل ضغط نفسي كبير على الطفل خاصةً إنه حتى مش بنفس سن ولا خبرة الجندي اللي بيحارب فتأثيره بيكون أكبر
إزاي نتعامل مع ده ونتجنبه؟
- الاعتراف بالمشاكل هو أول خطوة والإدراك نفسه شيء مهم.. تبقى عارف تأثير العنف الأسري على الطفل عشان يبقى فيه مساحة للحل والسعي إنه يتعمل
- قلل إن الطفل يتعرض إنه يشوف المشادات أو الخناقات العائلية على قد ما تقدر لأنه ملوش ذنب يشوف ده.. أو انقل النقاشات لمكان خاص بعيد عنه
- الدعم النفسي مهم لو الطفل خلاص اتعرض للحاجات دي.. مهم يلجأ الأهل لمتخصص نفسي للأطفال يساعد في إعادة التوازن
- تعليم بدايل صحية واللي تدريب الطفل على التعبير عن مشاعره بدل ما يكتمها أو يخاف وتشجعه على نشاطات تقلل التوتر “رياضة.. رسم وموسيقى” أي نشاط يساعد
- توعية المجتمع مهمة.. نشر الوعي إن “العنف الأسري” مش مجرد مشكلة اجتماعية.. لكنه مشكلة صحية ودماغية كمان
في النهاية الغرض كله من الموضوع هو توصيل الرسالة إن العنف الأسري ضد الأطفال أو الخناقات العائيلة الكبيرة قدامهم بتأثر بشكل كبير أوي في الأطفال فلازم ناخد بالنا كلنا كويس إحنا نموذج عامل إزاي قدامهم وكمان نساعد اللي اتعرضوا لده بالفعل ونشوفهم محتاجين إيه
