إزاي الدكتور النفسي بقى جزء مهم جدًا في كرة القدم الحديثة؟

«روحت لعلاج نفسي فترة في برشلونة، بس دلوقتي مبقتش بروح… أنا من النوع اللي بيحتفظ بكل حاجة جوه، وبحل مشاكلي لوحدي»..

ميسي طلع في حوار مع قناة أرجنتينية واتكلم عن أجزاء كتيرة من حياته ماحدش كان يعرفها بعيد عن الصورة اللي الكل متعود يشوفه بيها، اللاعب الهادئ والمتزن.

 ميسي اللي الكل شايفه كأنه مش بيتأثر بحاجة بيقول إنه احتاج في يوم من الأيام لدعم نفسي وإنه بطبيعته مايحبش يشارك مشاعره. وده اعتراف مهم جدًا لأنه جاي من واحد الكل بيتابع خطواته كل أهدافه وكل إنجازاته.

الكلام ده مش بس اعتراف شخصي ده كمان بيورينا حجم الضغوط النفسية اللي بيعيشها أي لاعب كرة قدم في العصر الحديث حتى لو كان من أكبر النجوم في العالم.

الكرة دلوقتي مابقتش 90 دقيقة على الملعب وبس الموضوع بقى أكبر من كده بكتير. اللاعب بيعيش تحت ضغط طول الوقت بجميع أشكاله جماهير و إعلام و مواقع تواصل وأرقام وإحصائيات ومقارنات على طول.

عشان كده الدعم النفسي بقى ضرورة مش رفاهية لو عايزين اللاعب يحافظ على تركيزه ويقدر يتصرف صح في اللحظات المهمة.

وميسي كمان قال إن والده كان دايمًا شريكه الأساسي في الكورة كان بيكلمه بعد كل ماتش أو يقعدوا يشوفوا المباراة سوا ويتكلموا عن كل حاجة حصلت.. الدعم ده لعب دور مهم جدًا في توازنه النفسي لكنه كمان أكد إن الذهاب لطبيب نفسي كان خطوة ضرورية في مرحلة معينة من حياته.

وفي مقابلات تانية ميسي قال إن العلاج النفسي ساعده يفهم نفسه أكتر ويتعامل مع القلق اللي بييجي من المنافسات الكبيرة خصوصًا قبل كوبا أمريكا 2021 وكأس العالم 2022.

علم النفس الرياضي في كرة القدم

علم النفس الرياضي بدأ كفرع أكاديمي في الأربعينيات والخمسينيات مع التركيز على تأثيره على الأداء الرياضي.. في البداية كان دوره محدود في الجامعات والمنتخبات الوطنية  وبالتدريج بقى جزء من الفرق الاحترافية في الثمانينيات والتسعينيات..  دلوقتي الأخصائي النفسي بقى جزء أساسي في الأجهزة الفنية للأندية الكبيرة.. و بيقدم تدريبات ذهنية بعد الإصابات وإعداد نفسي قبل الماتشات لتحقيق أفضل أداء.

 أندية زي مانشستر سيتي وليفربول و بايرن ميونخ وباريس سان جيرمان كلهم بيشتغلوا مع اللاعبين يوميًا مش بس وقت الأزمات.

الدكتور النفسي بيساعد اللاعب على إدارة الضغط و الحفاظ على تركيزه..  التعامل مع الفشل واسترجاع ثقته بعد الإصابات. كل ده بينعكس على الأداء في الملعب وده السبب اللي بيخلي الأندية تستثمر في المجال ده زي ما بتستثمر في اللياقة البدنية.

نجوم أنقذهم الطب النفسي

ميسي مش الوحيد.. كتير من النجوم اتكلموا عن مشاكلهم النفسية بصراحة.

إنييستا واحد من أساطير برشلونة ومنتخب إسبانيا السابق في كتابه قال إنه مر بأسوأ فترات حياته النفسية رغم الفوز بكأس العالم في 2010 والعلاج النفسي ساعده يعدي المرحلة دي .

بوفون الحارس الإيطالي قال إنه كان بيعاني اكتئاب وقلق ولو ما طلبش المساعدة كان ممكن يسيب اللعب.

بوفون في 2008 أصدر كتاب شخصي وقال فيه أنه  مرّ بفترة اكتئاب شديدة سنة 2003 اضطرته يروح لطبيب نفسي وقال إنه عاش 6 شهور سودا من ديسمبر 2003 لحد يونيو 2004 ما كانش حاسس فيها بالرضا ولا السعادة ولا حتى شايف نفسه حارس كويس لدرجة إن رجليه كانت بترتعش وهو بيلعب.

وبوفون اعترف إن الخوف كان مسيطر عليه وقتها، حتى وهو مشارك في يورو 2004 لكن مع العلاج بدأ يحس إنه بيتعافى واحدة واحدة.

وأكد إن الشهرة والفلوس مش دايمًا سبب للسعادة وإن مشاكل الحياة الخاصة وعدم الإحساس بقيمة الحاجات الحلوة ممكن توصل اللاعب للاكتئاب وكشف إن عدم فوزه بدوري أبطال أوروبا كان من الحاجات اللي خلت الشك يدخل جواه.

وقال كمان إن الجماهير غالبًا ما بتهتمش بالحالة النفسية للاعب وإن النجم بيبقى أسير صورته قدام الناس ومطالب دايمًا إنه يبان قوي وناجح كأن مش من حقه يتعب نفسيًا أو يمر بأزمة زي أي بني آدم.

ريتشارليسون مهاجم البرازيل وتوتنهام قال بعد كأس العالم 2022 إنه كان في أسوأ حالاته النفسية والدعم النفسي أنقذ حياته ومشواره الكروي.

الشهادات دي بتأكد إن الصحة النفسية مش بس للأيام الصعبة ده أحيانًا أهم في فترات النجاح الكبيرة.

المدربين والجانب النفسي

النهاردة المدرب مش بس بيهتم بالتكتيك والخطة، ده كمان مسؤول عن الحالة النفسية للاعبين.

بيب جوارديولا قال: «إدارة مشاعر اللاعبين أصعب من أي خطة تكتيكية».

يورجن كلوب  قال: «لو اللاعب منهك نفسيًا أفضل خطة مش هتنقذه».

وزين الدين زيدان كان معروف إنه بيركز على توازن غرفة الملابس خصوصًا لما يكون عنده نجوم كبار في الفريق وده ساعده ينجح في ريال مدريد.

إيه بيقوله الطب النفسي الرياضي؟

الدكتور ستيف بيترز اللي اشتغل مع لاعبين كبار في بريطانيا، قال:

«الأداء العالي محتاج عقل متزن، والضغط الغير مُدار بيخلي اللاعب ياخد قرارات غلط في الملعب».

في دراسات في British Journal of Sports Medicine بتأكد إن اللاعبين اللي بياخدوا دعم نفسي منتظم، أقل عرضة للاكتئاب أسرع في التعافي من الإصابات وأكثر ثباتًا في المستوى.

كرة القدم دلوقتي مش بس لعبة أقدام ده لعبة عقول ونفوس واللي مش مهتم بالجانب النفسي بيخاطر بخسارة مشواره بشكل كبير.