إزاي الصوت بيأثر على صحتك الجسدية والنفسية؟

“لما وصلت القاهرة حسيت جهازي العصبي هينفجر من الدوشة”.. جملة قالها حد من سكان المحافظات.. وفعلًا فرق الدوشة والأصوات فرق السما من الأرض.. لما تروح مكان هادي زي الريف بتحس براحة بال مش طبيعية وكأن كل الدوشة اللي جوا دماغك اتعملها mute.. فتعالوا كده نعرف تفاصيل أكتر عن إزاي الصوت بيأثر على صحتك الجسدية والنفسية

حسب  psychologytoday وموقع imotions وموقع medicalxpress

في دراسة اتعملت سنة 2023 على أثر تعرض طلبة جامعيين لأصوات مختلفة زي أصوات الطبيعة وأصوات زحمة المدينة على أدائهم وهم بيشتغلوا.. لقوا إن أدائهم كان أعلى لما اتعرضوا لأصوات الطبيعة

1- إزاي الدوشة بتأثر على نومنا؟

شارلوت كلارك أستاذة علم الأوبئة في جامعة “سانت جورج” بتقول إننا بنسمع الأصوات في ودانا حتى وإحنا نايمين علشان كده بنصحى من النوم لو سمعنا أي دوشة وده ممكن يخلي فيه مشاكل صحية كتير تحصلنا.. وقالت إن الدوشة اللي بتحصل وقت النوم بتغير في مستويات ضغط الدم وبتزود ضربات القلب وكمان الضوضاء العالية بتضيق الأوعية الدموية للدماغ وده عامل خطر للإصابة بالخرف

2- وإيه تأثير الصوت على صحتنا؟

الأصوات اللي تردداتها عالية بتحفز الجهاز العصبي فبيزود معدل ضربات القلب وهرمونات التوتر زي الكورتيزون في مجرى الدم.. علماء “إمبريال كوليدج لندن” لقوا إن الناس اللي بتعيش قرب المطارات بيكونوا معرضين أكتر إنهم يدخلوا المستشفى بسبب مشاكل في القلب .. والدوشة مش بس بتأثر على القلب لكن كمان بتأثر على صحة العقل.. فيه دراسة دنماركية اتنشرت في مجلة BMJ الطبية بتقول إن الناس اللي بتتعرض لضوضاء مرورية عالية خطر إصابتهم بالزهايمر بيزيد بنسبة 27%

الجسم كمان لما بيتعرض لدوشة الطرق بتبدأ تحس بالانزعاج والدوشة ده بيكون استجابة جسمك للتوتر.. فالجسم بيفرز هرمونات قلق ليها دور في زيادة وزنك وطبعًا دي حدوتة تخوف بالنسبة لك وبالنسبة لنا كلنا

3- طب إزاي ترددات الصوت بتُستخدم في العلاج والتشافي؟

زي ما فيه أصوات معينة بتأثر بشكل سلبي على صحتنا العقلية والجسدية.. فيه ترددات صوتية معينة بيتم استخدامها للعلاج والتشافي وده المعروف باسم العلاج بالصوت.. زي مثلًا تردد 432 هرتز اللي تردده زي التردد الطبيعي للكون وبيقدر يخلي الجسم يتوازن ويبقى تمام.. فبيستخدموا آلات معينة بتحسن الحالة النفسية وكمان بتساعد في علاج بعض الأمراض الجسدية زي توتر العضلات 

4- الموسيقى وتأثيرها على حالتك النفسية:

الموسيقى كمان اللي بتسمعها بتأثر على جهازك العصبي.. فيه دراسات بتوضح إن الموسيقى ليها تأثير أكبر من أدوية القلق وتقنيات الاسترخاء اللي بتعالج القلق والتوتر.. بس برضه مش كل الموسيقى ليها تأثير كويس على أعصابك.. فمثلًا الدكتورة كاترينا ماكفيران باحثة في جامعة ملبورن عملت دراسة على مجموعة من الشباب اللي بيسمعوا موسيقى الـ heavy metal بشكل متكرر لقت إنهم معرضين أكتر للاكتئاب عن غيرهم 

وفي الآخر نحب نقولك إن ذوقك الموسيقي اللي مالوش ملامح شوية هادي على شوية مهرجانات هيجنن جهازك العصبي وهيأثر عليه وأنت مش ناقص.. فحاول تاخد بالك من الأصوات اللي بتتعرض ليها عشان تحافظ على نفسك