إزاي المغرب بقت جامدة في الكورة سواء كبار.. شباب أو حتى نساء؟
السنين الأخيرة.. منتخب المغرب طلع من فكرة الظهور المشرف اللي متعودين عليه في الكرة وبقينا نشوف نتائج حقيقية.. فشوفناه بيكسب كأس العالم للشباب وبيوصل نص نهائي كأس العالم للكبار 2022 في قطر وبقينا حاسين إن عادي منتخب عربي يوصل لنهائيات كأس العالم.. فـ إزاي ده حصل؟
إنجازات في آخر كام سنة
إنجازات منتخب المغرب ماكنتش ده بس فهي كسبت كأس أمم أفريقيا للشباب في سنة 2023 وخدت المركز التالت في الأولمبياد سنة 2024 وكسبت كأس أمم أفريقيا للمحليين 2024.. ودي مش كل الإنجازات.. بس هو ده يعني كان صدفة ولا إيه؟
استراتيجية تطوير كرة القدم في المغرب
في سنة 2008 تم تنظيم المناظرة الوطنية للرياضة في الصخيرات بالمغرب واللي اتقال فيها الرسالة الملكية للناس اللي شغالة في الرياضة واللي كانت ضمن “المبادرة الوطنية للتنمية البشرية” الرسالة دي كانت تعتبر نواة استراتيجية كاملة لتطوير الرياضة في المغرب واللي منها طبعًا كرة القدم.. الهدف من الاستراتيجية اللي اتحطت دي كانت تعميم الرياضة وإنشاء بنية تحتية حديثة وإن الرياضة ماتبقاش مقتصرة على المدينة أو الأماكن المتطورة بس وتكون حق للجميع
أكاديمية محمد السادس لكرة القدم
الأكاديمية تم إنشائها في 2010 وفيها طلاب أعمارهم ما بين 12 لـ 18 سنة بتكلفة 16.8 مليون دولار وهي فيها نظام بيجمع بين الرياضة والدراسة وفيها مستويات تعليمية مختلفة ومجمع سكني للطلاب ومطاعم وأماكن ترفيهية وهدفها اكتشاف وتكوين المواهب المغربية من سن صغير.
الأكاديمية دي خرج منها لاعيبة كانوا في منتخب المغرب اللي وصل لنص نهائي كأس العالم قطر 2022 زي يوسف النصيري ونايف أكرد
اكتشاف المواهب
المغرب مش بس بتعتمد على وجود لعيبة كويسين بيلعبوا في نوادي معروفة.. لكنها بتشتغل على اكتشاف مواهب جديدة وده من خلال “الإدارة التقنية الوطنية” التابعة للجامعة الملكية المغربية لكرة القدم وجزء من شغلها العمل مع الفئات الصغيرة والأندية والكوادر وتفعيل السياسات الخاصة بتطوير كرة القدم ومتابعة اللاعبين والناشئين.. فهتلاقيها بتنظم بطولات وماتشات لفئات عمرية صغيرة
المدربين
حتى المدربين كلهم طالعين من التجربة المحلية اللي بيحاول يحققها المسؤولين عن الرياضة في المغرب.. فمثلًا عندنا مدرب منتخب المغرب الكبير “وليد الركراكي” رابع كأس العالم.. ومدرب تحت 20 سنة بطل أفريقيا والعالم “محمد وهبي”.. مدرب تحت 18 سنة “نور الدين نايبت” بطل أفريقيا.. مدرب تحت 17 سنة “نبيل بهاء” بطل أفريقيا.. مدرب تحت 15 سنة “أشرف هنزار”.. كمان من أكتر المدربين الجامدين كان مدرب المنتخب الأولمبي تحت 23 سنة خد أفريقيا وفي أولمبياد باريس حققوا برونزية والرابط اللي بينهم كلهم هو إنهم مدربين محليين ومن الكوادر اللي بيحاولوا يظهروهم في الكورة المغربية وكمان إنهم بيحققوا المشروع ده
تمويل برامج اكتشاف المواهب
مش بس اكتشاف المواهب.. لكن كمان تمويل البرامج دي.. فمثلًا في سنة 2024 تم إنشاء صندوق التكوين الوطني في شراكة ما بين الجامعة الملكية لكرة القدم وشركاء من القطاع الخاص بهدف تعزيز المواهب الشابة وتطوير مراكز اكتشاف المواهب وتأهيل اللاعبين الصغيرين
اللاعبين في أوروبا
الاتحاد المغربي ركز على متابعة المغاربة اللي بيلعبوا كرة ومولودين أو عايشين في أوروبا.. واشتغل على اقناعهم بتمثيل المنتخب الوطني المغربي.. وده اللي خلى في كأس العالم 2022 يبقى فيه 14 لاعب مغربي اتولدوا بره المغرب زي أشرف حكيمي وأمرابط وحكيم زياش بونو حارس مرمى المنتخب.
ستايل اللعب
اللي بيميز المغرب بشكل عام كمنتخب ولاعبين إن ليهم ستايل لعب تقدر تقارنه باللاعبين الأوروبيين وكمان تصنفه بنفس القوة.. كل أو خلينا نقول أغلب اللاعبين في نوادي أوروبية صف أول كبيرة زي باريس سان جيرمان وواتفورد وريال مدريد ومانشستر يونايتد وأندية أوروبية كتير.. فهتلاقي ميكس كورة شمال أفريقيا “الحلوة وفيها سنة كلاحة” مع الاستايل الأوروبي وده بيظهر قد إيه لعبتهم ممتعة وتحب تشوفها وتتابعها
في النهاية تفوق المغرب في كرة القدم دلوقتي مجاش من فراغ أو حظ إن عندهم لعيبة جامدة.. دي كانت خطة وخطوات مدروسة من سنين كتير وعشان كده وعشان مشيوا عليها قدروا يحققوا إنجازات خلتنا نفتخر بالمنتخب المغربي في جميع الأعمار سواء سيدات أو رجال
