إزاي الوش بيفضح مشاكل صحة الكبد أو الكلى؟
مش كل علامة بتظهر على وشك تبقى من السهر أو الإرهاق.. ساعات الجسم بيختار أبسط طريق يوصلك به رسالة من غير ما يتألم ويعملك دوشة
تغيّر بسيط في الملامح.. انتفاخ مش عادي.. لون مختلف وحاجات كتير بنعدّيها ونقول “عادي” بس الحقيقة إن بعض الإشارات دي ممكن تكون طريقة للجسم بيقولك بيها “في حاجة محتاجة انتباه”
من غير تشخيص ومن غير قلق مالوش داعي.. تعالى نحاول نقرأ ملامح وشنا صح ونفهم إمتى نتطمن وإمتى نعرف إن ممكن يكون في حاجة غلط محتاجة متابعة
1– إصفرار الجلد وبياض العينين
لما الكبد يتعب ومايعرفش يتخلص من مادة اسمها “البيليروبين” يبدأ يتغير لون الجلد ولون البياض في العيون للون الأصفر.. وده لأن الدم كله بيلف في الجسم.. لما مادة البيليروبين تزيد في الدم
بتظهر بسرعة في الأماكن اللي لونها فاتح وحسّاسة.. زي بياض العينين والجلد عشان كده الإصفرار بيبان في الوش قبل أي حتة تانية
لو تمت ملاحظة العَرَض ده هيحتاج لتحليل وظائف كبد ALT – AST ” Bilirubin”
2- انتفاخ الوجه أو حوالين العين (خصوصًا الصبح)
أغلبنا بيفتكر إنه عادي لأنه فعلًا مظهر طبيعي لأغلب الناس أول مابتصحى من النوم مع شوية نكش في الشعر بس أحيانًا بيكون دليل على مشكلة صحية عضوية زي الكلى
الفكرة ببساطة إن الكلى المفروض بتصرّف سوائل وسموم.. فلو مش شغالة بكفاءة السوائل بتتراكم فالانتفاخ يبان.. بس بردو ممكن جدََا الانتفاخ يطلع نتيجة حاجات تانية زي ” ملح زيادة.. قلة نوم أو إرهاق”
فلو الانتفاخ متكرر ومعاه تعب أو تغيّر في البول
عشان تطمن هتحتاج تزور الدكتور تعمل تحليل وظائف كلى “Creatinine – Urea” .. وتحليل بول
3- حكة مستمرة في الوجه من غير سبب واضح
الهرش في الوش غالبًا بيبقى بسبب حاجات عادية جدًا زي حساسية من ميكاب أو كريم.. جفاف الجلد.. تغيير جو.. توتر أو ضغط عصبي.. ودي مالهاش علاقة لا بكبد ولا كلى.
طيب إمتى نربط الحكّة بمشكلة صحية؟
الجسم طول ما هو شغال كويس.. الكبد بينضّف الدم من السموم والكلى بتطلّع الفضلات في البول.. لو واحدة فيهم قصّرت.. السموم بتفضل دايرة في الدم فالجلد يحس بيها فتظهر الحكّة يعني الحكّة هنا مش مرض.. دي نتيجة
يعني لو الحكة مستمرة ومفيش سبب جلدي واضح ومعاها أعراض تانية ساعتها نكشف وفيه تحاليل محتملة نعملها زي وظائف كبد ووظائف كلى
4- تغيّر لون الشفايف أو جفافها الشديد
انتشرت معلومات مغلوطة على سوشيال ميديا إن تغير لون الشفايف دليل على مشكلة في الكلى والحقيقة إنها علامة مضللة “غير مباشرة” فهي ممكن تبقى نتيجة مشاكل في الكلى لو مصاحبة لأعراض تانية مباشرة وواضحة زي تورم حوالين العين مثلًا
ممكن عشان مانتلغبطش هنا نقسمها ببساطة..
شفايف ميالة للون الأزرق.. غالبًا مش كبد ولا كلى دي بتشير أكتر لـنقص أكسجين أو مشاكل تنفس أو أنيميا شديدة
جفاف وتشقق مستمر.. أشهر أسبابه قلة شرب الماية.. نقص فيتامينات أو إجهاد
مشاكل الكلى نادرًا ما تبان من الشفايف لوحدها
5- بقع غامقة أو طفح جلدي مش معتاد
بردو علامة مش أساسية لأن في الواقع:
معظم البقع سببها بيكون إما هرمونات أو كثرة التعرض للشمس أو ضغط نفسي أو مشاكل جلدية.. يعني دي علامة مساعدة مش أساسية
طب ليه ممكن يبقى لها علاقة بالكبد؟
لما الكبد بيتعب الجسم أحيانًا بيحاول يطلع السموم من الجلد فبتظهر البقع الداكنة دي عليه
لو الدكتور شك هيطلب منك تعمل تحاليل وظائف كبد وأحيانًا هرمونات
وفي النهاية وشّنا مش جهاز تشخيص بس أحيانًا بيبقى مراية بتعكس اللي داير جوا الجسم.. مهم إننا مانقلقش من كل علامة بس برضو ولا نتجاهل التغيّرات اللي بتتكرر أو بتفضل موجودة من غير سبب واضح
المتابعة البسيطة والفحص في الوقت المناسب هيغنونا من أي احتمالية لوجود قلق وأفضل من التأجيل
