إزاي الوقت له مفعول السحر على المشاكل!

كلنا بنقابل مشاكل بأنواعها في حياتنا وفيه بعض المشاكل والأحداث بتحسسنا إن دي نهاية العالم وأخر الدنيا لكن زي ما أهلنا دايما بيقولوا إن كل مشكلة وليها حل، والحل ده بيبقى طريقة علاج وتعامل مع المشكلة نفسها.. بس الطريقة اللي بنستخدمها تلقائيُا في حل أنواع مشاكل مختلفة في حياتنا هي الوقت وإننا بنسيب نفسنا للوقت.. فا هل الوقت بيشفي كل حاجة فعلاً؟ وهل يقدر يعمل ده لوحده ولا لازم خطوات تانية ومجهود معاه يساعدوه عشان يقدر يداوي الجروح والمشاكل اللي حصلت؟

دور الوقت

لو فكرت في الموضوع هتلاقي إن أغلب المشاكل كانت عبارة عن مدة زمنية بتعدي بيها بكل الخطوات اللي جواها من أول لما المشكلة تحصل وبعدين تستقبلها وتستوعب صدمتها بعدها تفهم انت المفروض تعمل ايه وبعد كده يبدأ يتحل واحده واحده.. وبكده نتفق إنه الوقت عامل مهم في حل المشاكل.

حسب موقع verywellmind الوقت بيساوي الفرصة.. ودي معادلة بتقولك إن التعافي بيعتمد في النهاية على قرار منك كشخص واستغلال الفرصة دي في إنك تكون ظروف الوقت الحالي وظروف المستقبل.. طب يعني إيه؟
لما تعدي بتجربة صعبة الوقت بيسمحلك تفكر فيها كويس وتستفاد منها وكمان يديك مساحة إنك تتخطى المشكلة اللي وقعت فيها.. الوقت كمان بيفتحلك فرصة يبقى عندك معرفة وعلاقات صحية وإنك تتجه ناحية النمو.. وده معناه إنك بتاخد خبرة ومعرفة وساعتها هيكون عندك أشخاص يساعدوك أو يوجهوك بالنصحية للطريق الصح وقت المشاكل.

فيه تفكير بالعقل وفيه بالعاطفة..

استخدامهم العقل والعاطفة مع بعض لإن ده هيساعدك ماتكونش قاسي مع نفسك.. هتقدر تحدد بالظبط أسباب المشاكل وخصوصاً العاطفية ومش هتقسى على نفسك بالحكم.. زي لما العلاقة بينك وبين حد تنتهي فاتسيب المشكلة الرئيسية أو السبب الرئيسي وتنتقد نفسك أو تنتقد الطرف التاني زي مثلا لما بنقول “هي الرجالة كلها كده.. أو الستات كلها كده” أو “هاخد بالي المرة الجاية عشان ماحدش يضرني”.. ده لما هتفكر  بالعاطفة لوحدها أو التفكير بالعقل لوحده إنما لما تدمج الاتنين مع بعض هتلاقي نفسك بتوصل للمشكلة نفسها وبتقدر تناقشها لوحدك أو مع صحابك أو حتى مع مختص وتوصل لنتيجة صح وأفضل.

طيب إزاي الوقت أحيانًا ممكن مايساعدش على العلاج من المشكلة أو تخطيها؟

في كذا نقطة ممكن تخليك ماتتخطاش المشاكل مع الوقت:
1- لو فضلت مركز على حاجة معينة وواقف عندها “إن أنت وشخص انفصلتوا بشكل قاسي”
2- لو حصل خيانة وفضلت شايل كُره وضغينة تجاه الشخص
3- لو حاجة حصلت فعلاً وأنت مصمم تنكر إن هي حصلت
4- إنك ماتقدرش تسامح الشخص اللي غلط حتى لو هو أنت

5- لو مافيش حد تتكلم معاه أو حاجة تعبر بيها عن نفسك.. خصوصا لو “الكتابة”
6- تلجأ لخطوات تكيف أو تشتيت مش صح
7- إنك تشوف عادة سيئة تساعدك تعدي المشاكل دي

وفيه بعض الناس اللي بتحب تحافظ على بعض الجروح اللي حصلت دي عشان ماتنساش الذكرى نفسها حتى لو سيئة.. بمعنى إنه مش عايز ينسى الذكرى حتى لو هي مؤذية فابيفضل فاكر جزء معين مع مرور الوقت وبيفضل حاسس نفس الشعور كأن المشكلة لسه حاصله قريب وده شئ مضر وبيضيع مساحة الوقت إنه يداوي المشاكل دي.

إزاي الوقت بيساعد في عملية الشفاء؟

في ناس الوقت بيساعدها تزيد تحسن وفي ناس تانية الوقت بيساعدها تبقى أسوأ.. 

حسب موقع verywellmind في شوية عوامل بتخلي الوقت يساعدك على التحسن وهي:

1- دمج الدروس اللي اتعلمتها:

في مساحة إنك تعبر عن حزنك بالفن أو تأليف مزيكا بناءً على خبرتك.. وفي طريقة الغلابة اللي زينا ومش فنانين وهي إنك تكتب.. في نوت بوك تبدأ تكتب القصة اللي حصلت أو المشكلة وتعبر بطريقتك وبطريقة تحسسك إنك بتتحسن عشان ماتفضلش مكبوت.

2- كرّم عواطفك: 

وده بيحصل بإنك تدي لنفسك مساحة تعالج مشاعرك بشكل كامل.. لما تتعرض لموقف زي الانفصال أو وفاة شخص قريب منك أو إصابة جسدية ليها تأثير كبير بتحاول تتخلص من كل حاجة بتربطك بالموضوع ده وتتقبل الموضوع عشان تقدر تفتح مجال لـ اللي جاي وإنك تستقبله وأنت كويس وجاهز

3- الدعم:

الإنسان شخص اجتماعي من الدرجة الأولى.. عشان كده افتح مساحة لنفسك تقضي وقت مع الناس اللي بتحبهم وبيحبوك وبتثق فيهم ساعتها هيقدمولك دعم عاطفي في الوقت اللي أنت محتاجه ودول زي صحابك أو أهلك أو حتى حد مختص

4- نشاطات:

لما تكون بتعمل حاجة معينة في يومك ده بيساعدك تبعد عن المشكلة بدل ما تندمج وتعيش فيها وقت طويل عشان كده لو بتعمل هواية معينة أو بتمارس رياضة وساعتها هتعمل ذكريات جديدة تساعدك تحس إنك بتتحسن وبتبقى أفضل

في النهاية أكيد الوقت لوحده مش كفاية إنه يعالج أو يصلح كل مشكلة بتحصل.. زي ماقولنا في حاجات كتير بتساعد إنه يشيل ويبعد المشكلة عنك.. وعشان تأثير الوقت ده يشتغل فأنت بتحتاج توازن بينهم عشان تلاقي نفسك بتتحسن.. بتقضي وقت مع ناس بتحبها بتتكلم مع صحابك وحبايبك أو بتقرأ عن حاجة بتحبها وتجرب حاجة جديدة.. أما بقى لو ماقدرتش تتعامل مع المشكلة لوحدك وحسيت الوقت بيخليك تحس أسوأ فممكن تستعين بشخص متخصص يساعدك فيها.