إزاي تبقى شخص دبلوماسي
أوقات كتير العصبية والتهور بيضيعوا حقنا وبياثروا على صحتنا وأوقات تانية ممكن يخسرونا ناس عشان مافكرناش في حل أو رد مناسب يلم الموقف وأوقات بسببهم مابنحسبش وقت المناقشة والكلام ولا بنوزن الكلام نفسه.. والحل السحري للمشاكل والأوقات دي كلها هو إنك تدوس على زرار الدبلوماسية في شخصيتك حتى لو أنت شايف نفسك مابتعرفش تبقى دبلوماسي فعادي تتعلم.
وخلينا نتفق في الأول إن الدبلوماسية فن واتطور في البداية أصلا عشان العلاقات بين الدول وتعاملهم في مشاكلهم، وبيكون فيه أشخاص معينة في كل دولة بيقوا مسؤولين عن التعامل مع أشخاص دبلوماسيين زيهم متعينين من الدول اللي بيدخلوا معاها في مشاكل أو صدام وده بدل ما رؤساء الدول نفسهم يتعاملوا في المواقف دي.. الدبلوماسيين السياسيين دول المفروض إنهم بيقوا أشخاص يقدروا يعبروا عن كل حاجة عايزين يقولوها بطريقة أقل إثارة وبيعرفوا يسمعوا أي كلام من غير ما ياخدوه على محمل شخصي وبيكون عندهم صبر وليونة.
ويمكن بنربط لفظ دبلوماسية بالسفارات والعلاقات الدولية لكن في الحقيقة هو بيدل على شوية مهارات مهمة في كل جوانب الحياة اليومية خصوصا في الشغل وفي العلاقات والصداقات ومع الأهل وحتى لو بتشتري حاجة من عند عم ابراهيم بتاع السوبر ماركت اللي تحت بيتكوا.. الدبلوماسية عموما هي إنك تلاقي حلول بتكسب الطرفين.
طيب إيه هي مهارات الدبلوماسية عموما حسب ما قال موقع “shooksvensen” في أحد مقالاته:
1- تسمع كويس جدا اللي الطرف التانية عايزه ومحتاجه
2- تحترم وتقدر الأخرين ووجهات نظرهم
3- نكون صادقين في وجهات نظرنا الخاصة
4- نكون منفتحين عشان نقدر ناخد في اعتبارنا آراء الكل
5- وأخيرًا إنك تبقى مستعد إنك تقدم تضحيات
عشان نكون دبلوماسيين ده محتاج مننا شوية إدارة لعواطفنا خصوصا لو كانت العواطف دي هي اللي مسيطرة وبتقود الكلام والمحادثة.. وغالبا بنبقى بندور على وضع يخلينا نكسب واللي قدامنا يخسر وبنحاول نسيطر على اللي قدامنا.
وعشان نحقق فكرة الـ win-win solutions أو المواقف الكسبانة لكل الأطراف هنحتاج نشغل دماغنا بشكل إداري شوية عشان ده أكتر جزء هيخلينا نحقق الجوانب الأساسية للدبلوماسية.. وده بيكون عن طريق:
1- إدارة عواطفنا ورغبتنا إننا نهاجم الأخرين اللي بيقوا مختلفين معانا بس
2- نهدى عشان نقدر نفكر بدل ما ناخد ردود فعل سريعة
3- نهدي رغبتنا الفطرية في الخناق والانتقام والفوز مهما كان التمن
4- نحاول نبقى مؤدبين ونفضل قاعدين ونسمع حتى لو كام الموضوع صعب وحوافزنا بتقولنا لازم نتصرف بسرعة
الموضوع كله بيتخلص في إنك تبقى واعي كويس للكلام ولمشاعرك ولردود الأفعال وتبقى فاهم الأجزاء العاطفية اللي في دماغك اللي هدفها الفوز والخسارة.. وعموما فيه فايدة كمان جميلة أوي لحل المشاكل بالطرق الدبلوماسية وهي إنك هتحس بالإنجاز والقوة ده غير إن ده هيزود هرمون الدوبامين اللي هيخليك سعيد ومبسوط.
