إزاي تتعامل مع رسايل الابتزاز الإلكتروني على السوشيال ميديا!
بعد انتشار حوادث كتير مؤخرا سببها الأساسي هو الابتزاز الإلكتروني بدأت بنات كتير تبقى واعية وعارفة هي المفروض تتصرف إزاي لو حد قرر يبتزها بصور ليها مفبركة أو صور من اكونت بتاعها اتهكر أو صور كانت بعتتهم بمزاجها ولكن بيتم استغلال ضعفها وقلة حيلتها وبيبتزها بالصور دي مقابل إنه هيفضحها أو إنه هيوري الصور دي لأهلها لو ماسمعتش كلامه، ولكن فيه ناس كتير لسه ماتعرفش ممكن يتصرفوا مع المبتز إزاي.
وأوقات نوع الابتزاز بيبقى من شخص مجهول وده لما بنعمل شير لأبليكيشنز زي صراحة و Curious Cat عشان نلعب والناس تبعت لنا عليهم وهما مجهولين ويقولولنا رأيهم فينا مثلا أو يسألونا أسئلة مختلفة، لكن مش كل الناس بتسأل أو بتبعت على الأبليكيشنز دي عشان يقولوا كلام إيجابي أو فضولي فعلا، فيه ناس بتبعت كلام سلبي وآراء سخيفة أو بتستخدم الموضوع للابتزاز اللي بيبقى له أنواع كتير، يعني ممكن يكون ابتزاز عاطفي أو جنسي أو معنوي زي مثلا إن حد يبعتلك تهديد إنه يكشف صور ليك أو فيديوهات أو معلومات عنك، وقتها مابنعرفش نرد نقول إيه، ده طبعا غير المشاعر السلبية اللي بتنعكس علينا.
لو كان المبتز شخص معروف بالنسبة لك أو مش مش معروف فهنقولك شوية خطوات ممكن تتعامل بيها مع الموقف عشان يعدي بسلام وتاخد حقك من الشخص ده:
1- أول حاجة ممكن ترد بيها على الشخص إنك تطلب منه إنه يبطل يضايقك أو يبتزك وخصوصا لو عارفه، ممكن تتكلم معاه على الحقيقة وتقوله إنك عرفته وتطلب منه إنه يبطل يعمل ده في حالة إنه بيجيلك رسايل ابتزاز من شخص مجهول.
2- لو حاسس نفسك مش هتقدر تواجه، تجنب الرسايل دي تماما، وماتردش على الشخص ده بأي شكل خصوصا لو ردك هيكون فيه أي نوع من الشتايم.
3- احتفظ بـ”سكرين شوت” للرسالة اللي جتلك، ولو فيه أكتر من رسالة احتفظ بيهم كلهم لإن ده هيساعدك تجمع معلومات عن الشخص اللي بيضايقك، وممكن كمان توري الرسايل دي لشخص قريب منك ويفضل يكون من حد من العيلة أو شخص ذو سلطة وتوضح له إنك بتتعرض لتنمر أو ابتزاز إلكتروني.
4- لو ينفع تعمل “بلوك” للشخص ده اعمل كده طبعا، واقطع أي وسيلة تواصل معاه وماتخليش فضولك يجبرك تتعامل معاه، لكن لو ماتعرفش هو مين وهو شخص مجهول حاول تبطل تستخدم الأبليكيشن ده، المهم تتأكد إن مش هيوصل لك أي رسايل تضايقك من الشخص ده تاني.
5- قول لشخص من صحابك أو من أهلك إنك بتتعرض لتنمر أو ابتزاز لإنه ممكن يقدملك مساعدة ازاي تتصرف مع الشخص ده.
6- لو وصلت للشخص ده ممكن ببساطة جدا تقدم بلاغ عنه لمباحث الإنترنت أو فيه أكتر من طريقة للإبلاغ عن جرائم الابتزاز الإلكتروني وأولها هو الاتصال بالخط الساخن 108 وده مخصص لجرائم الابتزاز أو رقم 0224065052، أو الاتصال برقم 0224065051 للتواصل مباشرة مع إدارة تكنولوجيا المعلومات، أو ممكن تروح أقرب قسم وتقدم الأدلة عن المبتز أو تعمل بلاغ في الإدارة الخاصة بمكافحة جرائم الحاسبات الموجودة بمقر وزارة الداخلية المصرية أو كمان ممكن يتم إرفاق بيانات المبتز وتحميلها على الموقع الإلكتروني اللي خصصته وزارة الداخلية لاستقبال البلاغات عن الجرائم الإلكترونية.
7- من النصايح المهمة برضه إنك لازم تتجنب إنك تنشر على السوشيال ميديا صور أو فيديوهات حساسة ليك أو شخصية أوي، وبلاش تكتب كلام خاص بيك على السوشيال ميديا من الأساس.
8- في النهاية لو اتعرضتي أو اتعرضت لتجربة قاسية زي دي ومش قادرين تنسوها بسهولة أو سابت جواكوا آثار متعبة فحاولوا تتكلموا مع دكتور نفسي في أقرب وقت عشان تقدروا تتخطوا المشكلة دي.
