إزاي تتعامل مع ولادك أيام الامتحانات؟

بمناسبة إن امتحانات الثانوية قربت والدنيا بتبقى مكركبة في البيت وفي ضغط وحوارات.. خصوصًا كمان إن الطلبة ساعات بيجيلهم حالة برود ومابيفرقش معاهم.. وفيه اللي بيتوتر ومابيعرفش يذاكر.. وفيه حالات كتير.. بس اللي معروف إن الجو العام بيبقى مكهرب وكـ أهالي محتاجين نتعامل بطريقة معينة عشان نظبط الأجواء ونخلي الدنيا رايقة عشان نساعد ولادنا في الوقت ده.. طب إزاي تتعامل في الفترة دي  لو عندك حد في الثانوية عشان تعديها على خير؟

حسب موقع Webmd 

شوية حاجات تعملها عشان تظبط أجواء البيت:

1- بلاش مشاكل أسرية والخناقات أم صوت عالي دي خصوصًا اللي بتحلو وقت الأكل والمذاكرة بالذات.. نقلل خناقات ونكتر هدوء وأجواء رايقة

2- لما تلاقي ابنك بارد شوية أو عنده شوية تناحة في موضوع المذاكرة مش أحسن حل العصبية.. فا خلينا نروح للهدوء وبلاش انفعالات ونركز إننا نحفزهم ونديهم دفعة لعلها تكون إنطلاقة قوية موت وتجيب نتيجة

3- مهم طبعًا تساعد على تنظيم وقت المذاكرة وتكون على شكل Reminder كده كل شوية تنبهه بس بالراحة عشان مايزهقش.. خلينا نقول يتعاملوا معاملة أطفال لحد ما نعدي اليومين دول على خير

4- طبعًا الموبايل والنت والحاجات اللي بتشتت الدنيا دي محتاجين يبعدوا عنها بس لازم تقنعه إنها بتأثر على التركيز بالسلب فا قوله بس فهمه الأسباب زي ماقولنا خليك فاكر معاملة البيبيز

5- “الريست” حل سحري.. فا عشان تسيطر عليه وتعرف تخليه يعمل اللي إنت عايزه اديله اللي هو عايزه.. اديله شوية ريست وبعدها قوله يذاكر وساعتها هيتقبل الكلام بسهولة ويقوم فعلا وخلي نفسك طوييييييييل عشان نخلص

6- وبما إن أي حاجة مانعرفش نجيبها بنعملها في البيت اعمله “دكتور نفسي” في البيت.. يعني تخفي مشاعرك في الخوف والقلق والتوتر وكمان تبدأ تحتوي الخوف والقلق والتوتر بتوعه وتساعده يتخطاهم ويقدر يمسك نفسه

7- لو الدنيا مكركبة معاك كأهل خالص ومش قادر بقى تتعامل وقلقان ومتوتر يبقى أفضل حل تخليك بعيد وتديله مساحته لحد ماتقدر ترجع لهدوئك وتوازنك وهنا ممكن تقرب منه تاني وتساعده في اللي بيعمله

في النهاية الثانوية عامله ضغط لوحدها من غير مذاكرة ومن غير أي حاجة.. فا حاول قدر المستطاع ماتكونش إنت اللي بتزود الضغط والقرف ده.. بالعكس تكون بتدعم وتحاول تخفف الظروف الصعبة اللي بيحسها الطلبة اللي هم ولادك.. ساعتها النتيجة هتكون أفضل وهنتبسط كلنا