إزاي تتعلم “ماتشخصنش” الأمور؟

في البداية كده الاهتمام بالطريقة اللي بتقدم بيها نفسك للعالم هو جزء من كونك إنسان.. كلنا عايزين نحس إننا محبوبين من الناس.. لكن فيه فرق بين إنك تكون مهتم بتأثيرك على الناس، وبين إنك تكون مهووس برأيهم لدرجة إن قيمتك ونظرتك لنفسك كلها واقفة على رأيهم ورضاهم عنك.

وإنك تبقى شخص حقيقي وتبقى على طبيعتك معناه إنك تحاول تستغنى عن الرغبة الشديدة في التقدير الخارجي.. عشان ده بيدي مساحة صحية بينك وبين الناس التانيين.. وده عنصر أساسي علشان ماتشخصنش أي موقف وتعكسه على نفسك.

والشخصنة مش بس إنك بتاخد كل حاجة الناس بتعملها بشكل شخصي كأنك محور الكون وإن الناس بتتآمر عليك.. الشخصنة كمان ممكن توصل إنك تحس إن الكون نفسه بيتآمر عليك.. والمشاكل كلها بتحصلك إنت بس والكوكب كله ضدك. 

وحسب موقع YourTango الناس اللي مابياخدوش أي حاجة بشكل شخصي عندهم شوية عادات ممكن نتعلمها كلنا

فإيه العادات دي؟ وإزاي نتعلم مانشخصنش الأمور؟

1-

تقبل نفسك زي ما هي.. حاول تتقبل نفسك على حقيقتها، بكل عيوبها ونواقصها، من غير ما تحكم على نفسك أو تحاول تكون مثالي.. خليك عارف إن السعي للكمال بيأذي، وإن محاولة إنك ترضي الناس كلها مستحيلة.. قبولك لنفسك هيحسن علاقتك بنفسك.. ببساطة، عيش حياتك من غير ما تحاول تثبت أي حاجة لأي حد.

2-

ابني شبكة دعم إيجابية.. حاول تكون دايمًا وسط ناس بتحبك بجد وبترتاح معاهم، وابعد عن العلاقات اللي مالهاش معنى أو هدف.. خليك على طبيعتك في علاقتك معاهم، لأن العلاقات الحقيقية مبنية على الدعم والثقة.. وعلى العكس، اللي بياخدوا كل حاجة بشكل شخصي، دايمًا بيبنوا علاقات على الشك والخوف، وده بيخليهم يحسوا بعدم وجود دعم في أي وقت.

3-

حدد قيمتك بنفسك.. ماتخليش رأي الناس هو اللي يحدد قيمتك.. حاول تبص لمشاكلك من برا وتحاول تشوف حلول عملية مش عاطفية… ودايمًا خليك مقتنع إن قيمتك جاية من نفسك.

4-

سيبك من فكرة إنك تتحكم في كل حاجة مالكش إيد فيها.. وبالتالي ماتحاولش تتحكم في رأي الناس عنك، لأن ده مش بإيدك. خليك طبيعي وماتقلقش من حكم الناس عليك، وده هيحخليك تعيش حياتك بالشكل اللي يريحك.

5-

اطلب توضيح واسأل لو حاجة مش واضحة في الكلام.. لو لقيت نفسك مش فاهم أو حسيت إنك شايف الأمور غلط، اسأل وخد توضيح.. ده هيقلل أي سوء تفاهم، وهيحسن التواصل بينك وبين اللي قدامك.

6-

حافظ على حدودك الشخصية.. اتعلم تعرف حدودك وتحترمها، وحط قواعد لعلاقاتك مع الناس… إنك تحافظ على حدودك مش دايمًا سهل، بس مهم عشان تحافظ على راحتك النفسية وما تحسش بالضغط من الناس.. يعني من الآخر محتاج تتعلم إمتى تقول لأ.

7-

خليك واثق في نفسك.. الثقة بالنفس حاجة أساسية في رحلتك مع عدم الشخصنة.. خليك متأكد إنك تقدر تعتمد على نفسك وقادر تاخد قرارات صح تهتم بيها بنفسك وتحقق اللي إنت عايزه بنفسك.. ومع الوقت هتبقى عارف إنت محتاج إيه ومش محتاج إيه وإيه تقدر تستغنى عنه وإيه مفيش غنى عنه.

8-

حاول تكسر نمط التفكير السلبي.. لما تلاقي نفسك بتفكر بشكل سلبي أو بتجلد ذاتك، حاول تغير الطريقة اللي بتتكلم بيها مع نفسك.. وخلي كلامك مع نفسك لطيف ومشجع.. وممكن تجرب تمرين كده إنك لما دماغك تسوحك وتبدأ تجلد ذاتك.. اقعد اكتب كل الكلام اللي بتجلد بيه نفسك وحاول تعيد صياغته من منظور رحيم بنفسك.. يعني لو كتبت: “أنا فاشل”.. تقدر تغيرها لـ: “أنا فشلت النهاردة بس بكرة ممكن أحاول تاني”

9-

رد على الناس بهدوء وبتركيز إنت بتقول إيه وإمتى.. خد وقتك قبل ما ترد على حد، واسمع اللي قدامك كويس وما تتسرعش في التفسير أو الرد.. الاستماع والتركيز بيساعدوا في تقوية العلاقات بين الناس وبيوسعوا طريقة تفكيرك.. ولو داخل في جدال مع حد خليه يخلص كلامه الأول عشان هو مش هيسمعك طول ماعنده كلام يقوله.. لكن أول ما يخلص كل اللي جواه هيبقى قادر يسمع إنت بتقول إيه.

10-

حاول تتقبل التحديات اللي في الدنيا..عشان التحديات جزء لا يتجزأ من النمو والتطور.. لما تقابلك مشكلة أو لحظة صعبة محتاج تدرك إنها لحظة مؤقتة وهتتعلم منها وهتكبر وتتطور وإن الضربة اللي مابتموتش.. بتقوي

وفي النهاية.. شخصنة الأمور مش هتأذي حد غيرك.. والعكس بقى ولو اتعلمت ماتشخصنهاش إنت هتبقى أكتر حد كسبان.. عشان حتى لو فعلا الناس والكون والكوكب بيتآمر عليك.. إنت مش هيبقى فارق معاك وهتبقى بتتعامل بشخصية “عاطف” في فيلم “الناظر”.