إزاي تتكلم مع أولادك عن القضية الفلسطينية

من وقت طفولة جيل التمانينات والتسعينيات وهما بيسمعوا عن أحداث كتير بتحصل في غزة وفلسطين وحضروا أحداث كتير كان فيه منها المقلق جدا عليهم خصوصًا إن التلفزيون وقتها كان المصدر الوحيد للأحداث دي فكان أهلهم بيفتحوا الأخبار دي قدامهم في طفولتهم وده اللي شكل وعي كبير عن الجيل ده بالقضية وتاريخها بالرغم من القلق اللي كان بيدور في دماغهم وقتها.

وعشان أطفالنا دلوقتي بيعرفوا الأخبار قبلنا من السوشيال ميديا وبيتفرجوا على فيديوهات كتير فغالبا بيبقى عندهم أسئلة كتير عن الحروب وهيبقى في المرحلة دي أسئلة كتير بتدور في بالهم عن فلسطين بالذات لو مش فاهمين تاريخ وقصة القضية.. عشان كده تعالى نقولك إزاي لو عندك أطفال توصلهم فكرة القضية الفلسطينية بسهولة زي ما قال موقع “babesabouttown” في أحد مقالاته:

1- في الأول ثقف نفسك:

لو كان عندك أطفال سنهم كبير شوية فأنت محتاج قبل ما تتكلم معاهم يكون عندك معلومات كويسة عن القضية لإنهم هيسألوا أسئلة عميقة شوية.. وبلاش تخوض أي مناقشة معاهم من غير ما تفهم شوية حقايق أساسية وتاريخية فأنت مش محتاج تكون درست تاريخ فلسطيم في الجامعة يعني لكن مفيد يبقى عندك معلومات عن السياق اللي هتتكلم فيه، ولو طفلك سألك على حاجة ماعندكش إجابة عليها خليك صريح معاه وقوله مش عارف واتفق معاه إنك هتدور أكتر على إجابة السؤال ده أو هتدورا مع بعض.

2- اكتشف الأول هما عارفين إيه:

اعرف الأول إيه التفاصيل اللي عرفوها من الانترنت ومن صحابهم ومن المدرسة لإن ممكن تبقى التفاصيل مش صح أو ممكن تبقى مش حقيقية ومحتاجة تصحيح فوري، عشان كده اعرف منهم الأول هما يعرفوا إيه وحاسين بإيه تجاة الموضوع ورأيهم.

3- طور جواهم التفكير عشان يوصلوا للحقيقة بنفسهم:

بلاش تحبط فضولهم أو توصلهم الإجابات السهلة بالمعلقة وشجعهم عن طريق إنك تسألهم أسئلة يفكروا هما فيها ويتخطوا الأخبار والفيديوهات اللي بيشوفوها على السوشيال ميديا.. خصوصا إن ضروري تطور مهارات أطفالك في التفكير النقدي بالذات لو كانت قضايا معقدة.

4- اتأكد من تحيزاتك:

بسبب انتمائك السياسي أو الديني أو العرقي احتمال يبقى ليك أراء قوية عن القضية وده رد فعل بشري طبيعي فعشان كده خليك صريح مع طفلك وقوله سبب رؤيتك للقضية من وجهة نظر معينة، وطبيعي نبقي بنعارض بشدة تجاوزات الاحتلال الإسرائيلي ومتضايق من إن الفلسطينيين بيتعاملوا كلاجئين في بلادهم أو مواطنين من الدرجة التانية.

فلما تتكلم مع أطفالك عن فلسطين وإسرائيل لازم تبقى صريح معاهم ليه أنت حاسس ده بالطريقة دي وحاول ماتخليش تحيزاتك تمنعهم يشاركوا رأيهم في المناقشات المهمة دي عشان هدفك الأساسي إنك تعلمه حاجة أكبر من حياته اليومية مش إنك تخليه يردد كلام مش فاهمة بس.

5- بلاش تتكلم عن موضوع واحد بعينه:

في كلامك مع طفلك حاول تشجعه إنه يدور على وجهات النظر المختلفة والقصص المشابهة ويسمع القصص الحقيقية لكل الأطراف سواء كانت الحكومات أو المدنيين من الطرفين وبكده هو هيوصل للحقيقة بنفسه.

6- خليك مع قيمك:

إنك تشوف وجهات نظر مختلفة ده مش معناه إنك تتخلى عن مبادئك الشخصية، فلما تتكلم مع أطفالك عن فلسطين لازم نتكلم من قيمنا ومبادئنا ونقف مع أفكارنا. 

7- طمن أطفالك إن فيه ناس بيساعدوا:

طمن أطفالك إن فيه ناس عايزين يساعدوا دايما وإننا نقدر نساعد واتكلم بحاجات حصلت بالفعل في الواقع زي التبرعات والمسيرات ورفع الوعي عند المجتمع ودعم الأصدقاء الفلسطينيين، واتكلم معاهم عن الطرق اللي حاول الناس يساعدوا بيها من بداية القضية من زمان.

8- اتعلم أكتر:

طول ما إحنا عايشين بنتعلم فلما هنتكلم عن فلسطين مع أولادنا هيخلينا ندور أكتر ونتعلم دروس أكتر ونعرف عنهم أكتر.. لإن الصراع التاريخي ده ممكن يعلمنا كتير عن الأنظمة العالمية ويفهمنا النزاعات أكتر على الأراضي الجديدة ويعلمنا حاجات أكتر عن تأثير التدخل الأجنبي وصدمات الأجيال