إزاي تحافظ على نظرك لو بتتعرض لشاشات كتير؟
قولي بصراحة… كام مرة اتقالتلك جملة “يابني سيب الزفت اللي في إيدك ده وريح عينيك شوية”؟
كتير صح؟
النهاردة بقى احنا هفهمك ليه “الزفت” اللي في إيدك ده بيتعبك.. وإزاي تحمي عينك منه أو من أي شاشة تانية؟
مبدأيًا كده.. على حسب كلام الأكاديمية الأمريكية لطب العيون (AAO):
لما بتتعرض لشاشة لفترة طويلة.. عينك بتفضل مركزة تركيز قوي وده بيخلي عضلات عينك نفسها تتعب.. لأن التركيز كله على حاجة واحدة.
التركيز ده بيخليك تِرمش بمعدل أقل من الطبيعي.. وهيعملك جفاف اللي هيقلب معاك بعد كده بزغللة وصداع.
غير إن “الضوء الأزرق” اللي بيطلع من الشاشات على عكس أنواع الضوء التانية.. العين مش بتقدر تفلتره كويس فالجزء الأكبر منه بيعدي من العين وبيوصل للشبكية.
ده بيعمل إجهاد للعين بالذات لو بتتفرج بليل.. وكل ما تزيد المدة اللي بتتعرض لها للشاشات بيزيد التعب.. وممكن يوصل لقصر نظر أو حساسية للضوء.
خلي بالك إن الكلام ده مش بس للموبايلات.. ده لأي نوع شاشات.. لابتوب.. كمبيوتر.. أو حتى تليفزيون.
فعشان تحافظ على عينيك الحلوين دول.. خد بالك من الحاجات دي:
-
إرمش كويس
عشان عينك ماتنشفش.. حاول ترمش أكتر وتركز على إن كل رمشة تبقى كاملة عشان تحافظ على طبقة الدموع الطبيعية في عينك وتفضل مترطبة على طول.
-
خلي الإضاءة مناسبة
لو فيه نور قوي أو انعكاس ضوء داخل عينك وانت باصص على الشاشة سواء من الشاشة نفسها أو من حواليها (شباك أو نور من جنبك).. ده هيرهق عينك أكتر.
فحاول تغير مكان الشاشة أو تقلل إضاءة الغرفة.. واعمل سطوع الشاشة (الـ Brightness) على مستوى مُريح لعينك.
-
ظبط المسافات
الأحسن إن شاشة اللابتوب أو الكمبيوتر تبقى حوالي 25 بوصة “طول دراعك تقريبًا” بعيد عن عينك.. ويفضل تكون باصص تحت شوية من مستوى نظرك.
-
قاعدة الـ 20 – 20 – 20
كل 20 دقيقة من إستخدام الشاشة.. بص على حاجة بعيدة عنك حوالي 20 قدم “6 متر” لمدة 20 ثانية.. ده هيقلل من إجهاد عضلات عينك.
-
القطرة
لو حسيت عينك بتجف بسرعة تقدر تستخدم “قطرات مُرطبة” من الصيدلية هتقللك الجفاف والحرقان.
-
اكشف كل شوية
كل فترة كده مافيهاش حاجة لو اتطمنت على نفسك وزورت الدكتور.. غير إنه لو عندك مشكلة زي قصر أو طول النظر وانت ماتعرفش ده هيخلي التأثير مُتعب أكتر.. فلما تروح وتكتشفها من بدري هتعرف تتعامل معاها إزاي.
فركز بقى فى الكام نصيحة دول عشان احنا بنحبك وعايزين مصلحتك.
