إزاي تحمي نفسك وماتتسرقش عالنت؟
كلنا لينا الصاحب اللي كل شوية بيتسرق منه الأكاونت…والمشكلة مش بس في ضياع الفولورز والصور لكن الحرامي ممكن ياخد معلومات بنكية أو صور شخصية ويبتزك بيها بأي شكل.
فركز في المقال ده عشان هنقولك إزاي تحمي نفسك عشان ماتبقاش صيدة سهلة.
1. نظن السوء
في العالم الرقمي لازم تشك في كل لينك هيتبعتلك أو هتدوس عليه…ده أنت كمان تشك في صاحبك خصوصاً لو بعتلك إنه محتاج فلوس لأن منتشر اليومين دول إن حد يسرق الأكاونت ويفضل يبعت لكل الناس إنه مزنوق ومحتاج فلوس…فخلي بالك ولو انت جدع أوي يعني اتصل بيه واتأكد مش هتخسر حاجة.
2. التجاهل
- لو حد بعتلك قالك هيجيلك كود وابعتهولي …تجاهُل تام
- لو طلعلك إنك كسبت أيفون، عربية، موتسيكل…تجاهُل تام
- لو طلعلك إن في بنات حسناوات في منطقتك…تجاهُل تام
- لو جالك إيميل واتحط في السبام – الـSpam وانت مش عارف إيه ده…تجاهُل تام (انت أكيد مش هتعرف أكتر من جووجل)
- لو لينك شكله غريب من حد بقالكم كتير ما اتكلمتوش…تجاهُل تام
- لو أميرة هندية اختارتك من 7 مليار بني آدم عشان تحولك مليون دولار تهربهالها برا البلد…تجاهُل تام
3. صعّبها عليهم… في تلات حاجات ممكن تعملها عشان تصعبها على الحرامية.
أولًا: اعمل باسوورد قوي كله أرقام ورموز وحروف كبيرة وحروف صغيرة
تاني حاجة: عشان ماحدش يسرق أكاونتك أو حتى يعرف يدخله شغل ال two-factor authentication يعني المصادقة الثنائية…هي اسمها طويل بس فكرتها بسيطة.. دي بتخلي في جهاز أساسي (غالبًا الموبايل) أي حد يحاول يدخل الحساب بتاعك يجيلك رسالة عالجهاز ده من جوه الأبليكيشن.
تالت نصيحة هي: نزل Google Authenticator…ده أبليكيشن تبع جووجل بيساعدك إن موبايلك يكون هو الجهاز الوحيد اللي يجيلك عليه أي أكواد دخول والكود بيتجدد كل 30 ثانية…ولأن العملية دي كلها بتحصل جوه موبايلك فشبه مستحيل حد ينجح في إنه يدخل الأكاونت حتى لو عارف الباسورد.
(اللي تحت ده شكل الـApp)
أما بالنسبة لللينكات والإيميلات:
- لو شاكك في لينك…ممكن تاخده كوبي بيست في ويبسايت اسمه Virus Total وهو هيقوللك اللينك ده تمام ولا مش تمام.
- لو حد عامل نفسه شركة انت مشترك في خدماتها ركز في اسم الإيميل اللي مبعوت ممكن يكون في خطأ إملائي ومن هنا تعرف إن ده شخص بيضحك عليك…ولو حسيت ان ده فعلاً ممكن يكون البنك أو شركة مهمة اتصل بخدمة العملاء واتأكد منهم .
طب أعمل إيه لو اتعرضت لمشكلة الكترونية؟
لو حد سرق الأكاونت أو جاتلك رسالة مريبة أو حسيت إن حد بيهددك على الإنترنت تقدر تزور موقع “عدة الإسعاف الأولي الرقمي – Digital First Aid” وهناك هتلاقي حلول لسيناريوهات كتير ممكن تقابلك…
كمان تقدر تبلغ الـPlatform اللي حصلك فيها المشكلة زي مركز الخصوصية بتاع ميتا – Meta Privacy Center أو مركز المساعدة الخاص بمنصة إكس – X Help Center.
وفي الآخر حبين نعرّفك على كويز سريع عاملاه جووجل هيعرفك انت سهل يتضحك عليك ولا لأ اسمه “اختبار التصيد الاحتيالي” جربه وقوللنا جيبت كام.
