إزاي تخلي توقعاتك منطقية عشان ماترجعش تزعل

أحيانًا بنعاني من إن توقعاتنا ما بتتحققش خاصة لو كانت عالية أوي تجاه شيء أو شخص أو حتى تجاه فرصة نفسنا تجيلنا في الحياة.. وده بيخلينا نتضايق ونحس بعدم الرضا  وإننا مش هناخد الحاجات اللي نستحقها.. فبالتالي بنبدأ نوطي توقعاتنا في الأرض خالص عشان مانرجعش نزعل.. بس الحقيقة إن ولا ده صح ولا ده
وعلى رأي عمنا ويليام شكسبير لما قال “Expectation is the root of all heartache” يعني من الأخر كده التوقعات هي السبب في كل الأحزان اللي بنمر بيها.. عشان كده في الموضوع ده هنقولك إزاي تخلي توقعاتك منطقية وفقا لموقع verywellmind  وموقع calm

التوقعات في الأساس هي الأفكار اللي بنعتقدها في دماغنا وبنحط على أساسها نتايج.. وعلى الرغم إنها فعلا ممكن تساعدنا ناخد خطوات توصلنا لنقطة لكن ساعات ممكن تخلينا نفكر  بشكل مش منطقي وتمنعنا إننا نشوف الموقف صح وبالتالي هتنزل بينا سابع أرض لما ماتحصلش

ومن عيوب التوقعات كمان إنها بتخلينا نبطل نمتن للي موجود عندنا أو ناخد بالنا منه وبنبدأ نقارن بالحاجات اللي مش عندنا.. وكمان نتوقع أفعال غير حقيقية  وغير منطقية من الناس ممكن ماتحصلش زي إننا نتوقع إن أصحابنا أو أهلنا أو حتى شريك حياتنا هيتصرف بطريقة معينة أو هنشتغل وظيفة أحلامنا أو حياتنا هاتكون زي الأفلام.. والتوقعات دي  مابتطلعش زي ماتخيلنا  لأنها بتبقى أصلا مش لايقة مع الشخصيات ولا الأماكن ولا الواقع اللي بنتعامل معاه بسبب إنها أفكار في دماغنا بس.

بس هل ده معناه إننا نقلل التوقعات اللي عندنا عشان مانزعلش؟
تقليل التوقعات مش حاجة صحية لأنها بتخلينا نقلل من نفسنا ومن قدراتنا ونبطل نحلم.. وبالتالي هنقلل من فرصنا إننا نسعى للأحلام لأننا هنفكر إننا عمرنا ما هنوصل.. ده غير إن التوقعات القليلة هتخلينا نقبل بالأقل معتقدين أنه المناسب
وهيخلينا ندخل في دوامة من اليأس مابتخلصش ونبطل حتى نجرب ونشوف حظنا.. ونضيع مننا فرص كتير .


إزاي بقى تظبط توقعاتك ولا تخليها عالية ولا واطية ؟

-خليك واعي بتوقعاتك وابدأ قيمها إيه فيها منطقي وإيه فيها خيال علمي من إخراجك.. عشان ماتقعش في الفخ ده تاني وترجع تتأثر وتزعل على الحاجات اللي مابتحصلش

-ماتتوقعش إنك لازم تاخد من الناس نفس اللي بتديه.. لو عايز تعمل حاجة اعملها من غير ماتستنى مقابل عشان تقدر تحافظ على علاقاتك.. وافتكر إن كل شخص بيختلف في الطريقة اللي بيعبر بيها.

-خليك ممتن للي معاك كل ماتحس إنك مش مبسوط.. افتكر عيلتك أو صحابك أو شغلك وكل يوم خلي عندك وقت تفكر فيه في الحلو للي عندك.
وماتقارنش نفسك بالناس.. كل واحد ليه حياته وفيها عيوب ومميزات ماحدش يعرفها غيره وطبيعي الناس بتبين الجزء اللي مبسوطين فيه بس وممكن يكون عندهم مواقف كتير صعبة أنت ماتعرفهاش.. فماتفكرش إن الناس مبسوطة أكتر منك من صورهم وخروجاتهم لأن ده هيبقى توقع مش منطقي.

-خلي عندك مرونة على التكيف مع الظروف المختلفة لإن الدنيا حبة فوق وحبة تحت
عشان المرونة هتخليك تقدر تفرق بين التوقعات والواقع.. وكل ماهتعرف توقعاتك كانت مش صح ليه كل ده هيساعدك تتطور في المستقبل وتفكر صح.

-تقبل مشاعرك.. لو لقيت نفسك عندك مشاعر غيرة أو مشاعر سلبية تجاه اللي مش عندك حاول تتقبل مشاعرك بدل ماتنكرها وتبقى غضبان أكتر.. وافتكر إنك زي ما في ناس شايفها أحسن منك في ناس برضه شايفينك أحسن منهم.


وكل ما تلاقي نفسك بتتوقع فكر نفسك بالمقولة دي “Expectations destroy our peace of mind, they are future disappointments, planned out in advance.”
يعني التوقعات بتدمر راحة البال.. وتعتبر خيبات أمل مستقبلية خططنالها من بدري!

فماتنساش تقارن نفسك بنفسك وبس عشان أنت الشخص الوحيد اللي المفروض تتنافس معاه.