إزاي ترتيبك بين أخواتك بيأثر على شخصيتك!
لو أنت الصغير بين أخواتك لازم الناس تقول عليك إنك متدلع وأخر العنقود وخدت الدلع كله، بس لو أنت الكبير هيقولوا عليك إنك شايل المسؤولية وتعبان منها وأنت اللي شايل مشاكل البيت كله، أما بقي لو الوسطاني هيتقال إنك مظلوم وحقك مهدور بين أخواتك.. بس هل الكلام والأحكام دي حقيقية فعلا ولا كلها حاجات الناس بنتها على نماذج معينة شافوها!
لما دورنا ورا الموضوع ده لقينا إن فيه دكاترة نفسيين كتير ودراسات اتعملت واتكلمت عن الموضوع ده وجابوا فعلا على سؤال هل ترتيبك بين اخواتك بيفرق في شخصيتك وتعاملك مع الحياة؟ سواء كنت الكبير أو الوسطاني أو الصغير.. وحسب دراسة اتعملت في جامعة “إدنبرة” ودراسة في جامعة كامبريدج إن كل ترتيب ليه تأثيره الخاص اللي ممكن يظهر على شخصيتك وسلوكك.
فمثلا لو أنت الكبير بين أخواتك:
غالباً بتكون أنت الشخص المسؤول واللي يعتمدوا عليه في العيلة، وبياخد اهتمام الأب والأم بشكل كبير قبل ما الأخوات الصغيرين ييجوا، وده ممكن يخليك شخص عنده شعور بالمسؤولية والاعتماد على النفس، لكن كمان ممكن يخليك شخص عرضة أكتر للقلق وبيحب الكمال.. الطفل الكبير عادة بيكون عنده طموح كبير وبيبقى عايز يحقق النجاح ويثبت نفسه. والدراسات بتقول إن الكبير غالباً بيبقى متفوق في الدراسة وعنده قدرات قيادية عالية.
وبكده يبقى أهم الصفات في الأخ الكبير:
الطموح
القيادية
اجتماعي
منظم
ذكي
لو أنت الطفل الوسطاني:
فالطفل الوسطاني بيلاقي نفسه دايماً في النص بين الكبير والصغير. وده بيخليه ممكن يحس أحياناً بالإهمال أو إنه مش واخد حقه في الاهتمام، وده بيخليه يطور مهارات اجتماعية عشان يقدر ياخد انتباه اللي حواليه، الأطفال الوسطانيين غالباً بيكونوا مرنين وبيحبوا يهتموا بالناس، وفيه دراسة في جامعة كامبريدج قالت إن الأطفال الوسطانيين ممكن كمان يعانوا من مشاعر زي الغيرة والمنافسة وعشان كده بيكون شاطر في حل المشاكل والتفاوض. الوسطاني بيبقى عايز يثبت نفسه في وسط إخوته وبيبقى عنده مهارات اجتماعية عالية عشان يقدر يتأقلم مع الظروف.
وبكده يبقى أهم الصفات في الأخ الوسطاني:
مستقل
متعاطف
صبور
مرن
بيعرف يندمج في فريق
لو أنت الطفل الصغير:
فغالبا الطفل الصغير بيتمتع بالاهتمام والدلع من الكبار والأخوات، وده بيخليه دايماً يحس إنه محبوب ومميز. بس ده ممكن يخليه شوية بيعتمد على الناس وما يحبش يتحمل المسؤولية. وأحيانًا الصغير بيكون عنده خيال واسع وقدرة على الابتكار والإبداع، لأنه بيشوف الدنيا من زاوية مختلفة عن إخوته الكبار. وأغلب الدراسات بتقول إن الصغير بيبقى عنده ميول فنية أكتر وبيحب المغامرة والتجربة.
وبكده يبقى أهم الصفات في الأخ الصغير:
مرفه
مجازف
مبدع
دمه خفيف
وفيه أمثلة كتير بتأكد كلام الدراسات دي زي مثلا لو بصينا على الشخصيات المشهورة هنلاقي إن “بيل جيتس” كان الطفل الكبير وكان دايماً بيحب يتحمل المسؤولية وهو اللي يدير الأمور. في المقابل، الفنانين والمبدعين زي “ليوناردو دي كابريو” كان الطفل الصغير في عيلته وده انعكس على قدرة في الإبداع وإنه شخص جرئ في التجربة.
وفي النهاية أكيد فيه عوامل تانية بتأثر على شخصيتم زي البيئة اللي اتربيت فيها، وطريقة التربية نفسها، والتجارب اللي مريت بيها في حياتك. بس ترتيبك بين إخواتك بيلعب دور كبير في تشكيل جوانب معينة من شخصيتك، زي الثقة بالنفس، والاعتماد على النفس، والقدرة على التعامل مع الناس.. فالأكيد إن ترتيبك بين أخواتك بيلعب دور مهم في تشكيل شخصيتك بس المهم هو إزاي تستفيد من المزايا اللي ترتيبك بيديهالك وتشتغل على تحدياته عشان تطور من نفسك.
