إزاي ترد على أسئلة ابنك الوجودية؟

كلنا عارفين إن الأطفال أحباب الله.. بس هما عليهم شوية فضول بيخليهم بيسألوا عن كل حاجة حواليهم.. فبيحطك قدام أسئلة عميقة زي “جيت إزاي؟” و”ربنا فين؟”.. وعلى الرغم من هيبتك وردودك الوقورة قدام الناس لكن بتيجي قدام أسئلته دي وتتهته.. لكن ضروري ترد على الأسئلة دي عشان بتساعد في تشكيل وعيه وثقته فيك.. عشان كده هنقولك إزاي ترد على أسئلة ابنك الوجودية

1- بين اهتمامك بسؤاله

حاول ماتتجنبش الإجابة على سؤاله عشان لو ماخدش جواب منك دماغه هتفضل مشغولة بالسؤال وهيبدأ يدور على الإجابة من ناس تانية بره ماتعرفش هيأثروا على معتقداته إزاي.. والرد على أسئلته واهتمامك بيها بيقوي علاقتكم ببعض وهيشجعه يحكي ويتكلم معاك براحته

2- خلي إجابتك بسيطة

جاوب عليه بشكل مباشر وبسيط وحاول كمان تقرأ له من القرآن أو الإنجيل آيات توضح الإجابة على سؤاله وفهمهاله بشويش

3- خليك صريح معاه

لو فيه سؤال مش عارف تجاوب عليه وضحله ده وقوله “مش متأكد إن عندي المعلومة كاملة.. لكن هدور عليها أو اسأل حد خبير وهرجعلك بإجابة.. واتأكد فعلًا إنك تجاوب عليه بعدين

4- جيب ليه قصص مصورة

ممكن تشتري ليه قصص أو كتب مصورة تساعدك على توضيح الإجابة ليه وكمان تساعده إنه يفهم الإجابة ببساطة

5- قسم الإجابة على مراحل

يعني لو سألك مثلًا “أنا جيت منين؟” فقوله الأول بتكون جنين موجود في رحم ماما… وقوله حاول تدور أكتر وره المعلومة وتعالى قولي عرفت إيه تاني.. عشان حتى تقسم المعلومات على مراحل عشان مايتلغبطش

6-  خلي إجابتك تجمع بين الصدق والمعلومات المناسبة

وانت بتجاوب على سؤاله قوله الحقيقة بس بالمعلومات اللي مخه يقدر يستوعبها بس.. أوعى تحكيله حاجة مألفها ومش حقيقية عشان مايحسش إنك بتضحك عليه فمش هيثق فيك 

7- استخدم لغة واضحة

استخدم مصطلحات سهلة في إجابتك عشان يعرف يفهمها بس ماتقولهوش تشبيهات لأنه هيتلغبط.. فمثلًا لو سألك عن الموت قوله إن الموت بيحصل لما الجسم والدماغ بتتعطل بشكل كامل ودي نهاية الحياة وبنروح للسما عند ربنا نعيش معاه في الجنة 

بعد النصايح دي اعتقد مش هتترعب لما ابنك يزنقك بأسئلته الوجودية اللي لازم تستغلها بشكل كويس عشان تبني تفاهم وثقة بينكم.. وكمان هتساعد بشكل كبير في تكوين عقله وتوسيع أفكاره.. خلي الحوار بينكم مفتوح دايمًا عشان لما تحصله حاجة يجيلك انت أول واحد على طول