إزاي تعرف إن أنت بيتم استبدالك؟

أغلبنا متفق إنك الإنفصال المفاجئ أو النهاية المفاجأة للحاجات اللي في حياتنا بيعمل صدمة كبير.. لكن اللي ساعات بيحصل هو إنكار أصلا إن فيه حاجة بتنتهي وعلامات معينة لكن إحنا بنقرر نتجاهلها ونعمل من بنها.. طب إيه هي العلامات دي؟

حسب موقع verywellmind وموقع psychologytoday

في العلاقات العاطفية

1- سوء التواصل

هتلاقيكوا نادرًا مابتفتحوا حوار في حاجة وتتناقشوا فيها سواء الحاجة دي إيجابية ولا سلبية.. وخصوصًا السلبية لأنها بشكل تراكمي كده بتبوظ الدنيا وغالبًا هتيجي نقطة معينة تنهي الموضوع كله

2- أسلوب هجومي

وهنا دي تعتبر المرحلة الأخيرة من سوء التواصل لأنك هتبدأ تلاقي الطرف التاني مش بيتكلم في الموضوع عشان يحله أو يوصل لحاجة وسط لأ هو مجرد بيهاجمك لمجرد الهجوم

3- بتقضي وقت أطول مع حد غير شريكك

العادي إن شريك حياتك تبقى بتمثل جزء كبير من وقته يمكن زي أهله.. فلما تلاقي نفسك مالكش نصيب كويس من وقته واهتماماته بتروح لباقي الأجزاء في حياته هنا دي علامة

4- الطاقة العاطفية شاحة أو قليلة 

ولما تلاقي بقى مافيش مشاعر زي الحب والاهتمام أو يقلوا بشكل كبير لفترة طويلة وكمان اهتمامه يقل بالحاجات اللي أنت بتحبها.. دي كمان علامة 

وفيه جزء كمان يخص النقطة دي وهو إن الطرف التاني يبتدي يحس إنه مش متأكد عايز يكمل في العلاقة أصلا ولا لأ!

5- قلة الثقة وقلة المشاركة

وهنا بتلاقي الشخص اللي قدامك مش واثق فيك ولا حاسس إنه ممكن يعتمد عليك في حاجة أصلا.. في نفس الوقت بيقلل كلام عن نفسه ومش بيشاركك مشاعره وأفكاره لأن دي نقطة مهمة إنكم تحافظوا على بعض

6- قلة الاستثمار في العلاقة

واحد هيسأل هو فيه استثمار في العلاقة؟ هنقوله طبعًا.. لما تلاقي الشخص اللي قدامك بطل يحط مجهود ويستثمر سواء بقى بالمجهود أو الطاقة وكمان الفلوس والأهم الوقت.. دي كمان علامة

مع صحابك

ومن علامات العلاقات العاطفية لعلامات بتحصل مع صحابك واللي في الغالب قريبين من بعض بس هنلاقي شوية فروقات

حسب موقع webmd

1- مافيش احترام

صاحبك المفروض إنه بيوفر دعم وتقدير.. فلما يبدأ يبطل يحترم مشاعرك وكمان يتصرف بشكل مش مقبول دايمًا وكمان مش بيحترمك دي بتكون علامة

2- الحياة مش رايح جاي

لما تلاقي نفسك بتدي أكتر مابتاخد وبتعمل مجهود بشكل مستمر والشخص التاني نادرًا لما يقدم حاجة.. كمان بتكون موجود عشانه دايمًا لكن هو بيكون موجود بمزاجه وممكن مايكونش موجود أصلا.. دي علامة تانية

3- مش على نفس الخط

من مميزات الصحاب إنهم بيفهموا بعض أسرع من الناس العادية ويمكن أسرع من الأهل كمان.. فلما تبدأ تلاقي إنكم مش عارفين تتواصلوا بشكل كويس زي زمان وحاولت واتكلمت في الموضوع أنت وهو وفشلتوا توصلوا لحاجة فالدنيا هنا مش أحسن حاجة وفي الغالب بتبعدوا عن بعض أو هو بيبعد عنك!

4- أنت مش من أولوياته

فيه صداقات بتستمر على الرغم إن أطرافها قليل لما يتكلموا أو يبقوا مع بعض لكن لما الموضوع يبقى واضح إنك مش من أولويات الشخص ده بمعنى إنه مش هيبقى حاطك في باله طول الوقت سواء في الوحش أو الحلو فهنا دي علامة

في الشغل

وبما إن الحياة مش علاقات عاطفية وصحاب بس فهنروح للجزء التالت واللي يعتبر من أهم الأجزاء في حياتنا وهو الشغل.. بس ده مختلف شوية فتعالوا نشوف:

حسب موقع forbes

1- شغلك بيعمله حد تاني

في البداية هتلاقي الشغل العادي اللي كنت بتعمله بقى بيتحط لحد تاني يعمله.. وهنا مش معناها إن بيتخفف عنك ولا حاجة لأ هو في الغالب أنت بيشوفوا هيستغنوا عنك إزاي

2- اجتماعات من غيرك

هتلاقي الاجتماعات المهمة بدأت تتشال منها وغالبًا هيكتفوا إن هم يقولولك الملخص أو هتشوف الحاجات وهي بتتنفذ وخلاص 

3- قلة التفاعل معاك

كمان هيبقى قليل الناس تتفاعل معاك سواء يطلبوا رأيك أو يقولولك رأيهم في الحاجة اللي أنت عاملها وهيعملوا فيها مشغولين 

4- الامتيازات بتروح

في كل مكان بيبقى فيه امتيازات كده حتى لو صغيرة ودي بتقل شوية أو بتقف خالص وماتشوفهاش تاني

5- الـ Tasks التافهة أو البسيطة

لما تبدأ تاخد Tasks أو تشتغل على حاجة هي أصلا مش من مقامك وأقل من العادي بتاعك بكتير

في الآخر أكيد في علامات بتكون موجودة بتدل على وجود مشكلة بس ممكن تتحل.. أما فيه علامات تانية واضحة وصريحة بتقولك إن الموضوع بينتهي وأنت مجرد بتتجاهلها وأنت وأهلك وصحابك والشارع بتاعكوا عارفين إن هي دي علامات النهاية لكن بتقرر تتجاهلها وده بيكون غالبًا بسبب الخوف أو أنت مش حابب تتقبل الواقع أو لمجرد التعود.. بس لازم تاخد بالك في الوقت المناسب وتاخد كمان قرار عشان تعرف تفتح باب جديد لحاجات جديدة