إزاي تعرف الحاجة اللي مضايقاك وتتعامل معاها؟

أحيانا بنحس إن إحنا متضايقين بس مابنبقاش عارفين نحدد إحنا متضايقين بسبب إيه أو بنبقى فاكرين إن إحنا متضايقين من غير سبب.. بس غالبًا كل حاجة بيكون ليها سبب.

وقبل ما نعرف سبب الحاجة اللي مضايقانا.. محتاجين نعرف المشاعر المختلفة للغضب أو الضيق.. حسب موقع Real Life Counseling فيه 4 مراحل للغضب بنحس بيهم بالترتيب وبتصاعد مشاعر الضيق أو الغضب:

1- الضيق – Annoyed

2- الإحباط – Frustrated

3- العدوانية – Hostile

4- الغضب – Enraged

وحسب موقع Psychology Today فيه 5 أسباب شائعة ومعروفة بتخليك تتضايق:

1- التعدي على حدودك الشخصية: 

لو حد عمل معاك موقف شخصي فيه انتهاك لمساحتك الشخصية، ومن أكتر الحاجات اللي بتضايق هي لو حد انتهك حدودك الشخصية.. فأنت محتاج تحط حدود ولو حد قرب يتخطاها محتاج تعرف إن ده سبب مضايقتك قبل ما تاخد أي رد فعل.

2- وقتك مش ملكك: 

من أكتر الحاجات اللي بتضايق هو إنك تحس إن وقتك مشغول وماعندكش وقت تعمل حاجة، وإنك ساحل نفسك في أكتر من حاجة في نفس الوقت ومش لاقيلهم وقت.. فأنت محتاج تحمي وقتك وتحاول تنظمه وتقسم أولوياتك كويس عشان تبطل تضايق.

3- فيه حاجة معينة مش عارف تعملها: 

وده معناه إنك محتاج تلاقي طريقة تانية أو أسلوب تاني تعمل بيه الحاجة اللي عايز تعملها، ومضايقتك في الموقف ده ممكن تبقى حافز عشان تحل المشكلة اللي بتواجهها وبتبدأ بأنك تسأل نفسك: إيه اللي أنا ممكن أعمله مختلف عشان أحسن الوضع اللي أنا فيه وأعمل الحاجة اللي عايز أعملها بس مش عارف أعملها أو بعملها بشكل مش عاجبني.

4- فيه حاجة خارجية معينة معصباك:

لو فيه حاجة خارجية معينة معصباك وأنت عارف الحاجة دي.. فبدل ما تسيبها تعصبك أو تفضل تشتكي منها أو العصبية تكبر وتزيد.. اعترف لنفسك وللي حواليك إن الحاجة دي فعلا معصباك.. وممكن تحول شكوتك لطلب وتشوف إيه اللي هيحصل.

5- بتعاني من المثالية أو الكمال:

من أكتر الحاجات اللي ممكن تضايقك أو تعصبك لما تبقى حاطط معايير عالية أو توقعات عالية والحاجة اللي قدامك أو الشخص اللي قدامك مايقدملكش المعايير أو التوقعات دي.. أو لما تبقى متخيل العالم بطريقة معينة ومايبقاش شبه اللي في دماغك.. وده بيبقى عبارة عن 3 حاجات:

• أنت مش راضي عن نفسك وعايز تبقى مثالي: فمحتاج تقلل توقعاتك أو معاييرك المثالية وتفكر نفسك باستمرار إن مفيش حاجة بتطلع كاملة أو مثالية وإنك مش شخص مثالي.. أنت إنسان.. الكمال لله وحده.

• لو الحاجة أو الشخص اللي قدامك مش عارف يرتقي لمعاييرك وتوقعاتك، فأنت ممكن تتكلم معاه بمنتهى الصراحة والوضوح عن توقعاتك واللي أنت مستنيه منه أو تحاول تشوف الموضوع من وجهة نظره هو أو إنك تقرر إنك تتخلي عن توقعاتك ومعاييرك في الشخص ده.

• ولما تحس إن العالم مكان قاسي ومش عادل ومش منظم.. ففكر نفسك علطول إن كل ده حقيقي وواقع: العالم مكان قاسي وغير عادل ومش منظم.. وأنت كل اللي عليك إنك تركز في أنك تبقى شخص أحسن والعالم بتاعك أنت أحسن.

وأخيرا، المرة الجاية اللي تلاقي حاجة مضايقاك، اقعد مع نفسك شوية.. وفكر ليه الحاجة دي مضايقاك وممكن تعمل إيه عشان تبطل تضايقك واستكشف مشاعرك أكتر وحاول تفهم نفسك أكتر.. وممكن تستخدم 4 خطوات: التعرف على الحاجة اللي مضايقاك – سمّي الحاجة اللي مضايقاك – فكر في الموضوع بشكل عميق واستكشف جوانب الموضوع كلها – حاول تتقبل الوضع أو حاول تغيره.