إزاي تعيش في نعيم الجهل وماتحسش بأي ذنب؟

بعد ما العالم بقى قرية صغيرة.. وكل المعلومات والأخبار في كل حتة في العالم بقى سهل الحصول عليها ورؤيتها في نفس اللحظة اللي حصلت فيها.. الإنسان بقى يعاني من فرط المعرفة وبيتمنى لو فضل عايش في نعيم الجهل..

 بس برضه علشان العالم بيجري بسرعة وكل حاجة متاحة بسهولة.. الجهل بقى نوع من أنواع الفشل.. فكرة إنك تكون مش عارف حاجة دي في حد ذاتها معناها إنك مقصر ومش أحسن حاجة عامة..

في مقالة اتنشرت على مجلة ” Current Opinion in Psychology” بتتكلم عن تعمد الجهل وفوايده على صحتك العقلية وقرارتك وعدالتك في الحكم على الأشياء..

طيب ليه ممكن الناس تتعمد إنها تبقى جاهلة؟

بيقول الكاتب “Sean Fath” إن الناس ممكن تتجنب معرفة المعلومات لدوافع عاطفية أو اجتماعية أو معرفية.. يعني مثلًا..

1- تعمد الجهل لتبرير القرارات الأنانية: هنا الشخص بيختار إنه مايركزش أو يعمل مش واخد باله من معلومات واضحة عشان مايحسش بالذنب بضرر قراراته دي على اللي حوليه.. 

2- تعمد الجهل عشان ترتاح من جحيم المعرفة: ساعات لما بتعرف كل التفاصيل عن كل حاجة حواليك بتتعب.. بيبقى الأسهل إنك ماتكونش عارف.. فدماغك هترتاح وحاجات كتير هتبقى أسهل.. منها قراراتك واختياراتك لحاجات لو عرفت فيها كل التفاصيل هتشغلك بدون أي فايدة

وده بيخليك تاخد قرارات متسرعة لمجرد بس إنك تريح دماغك

طيب الجهل ممكن يبقى مفيد إزاي؟

بالرغم من إن العلم نور وكل حاجة بس الجهل ساعات كتير بيكون أحسن..

1- الجهل ممكن ينظم مشاعرك.. لما تقرر إنك ماتدورش ورا كل حاجة وماتسمعش كل الأخبار الحزينة اللي في الدنيا وماتعرفش كل المخاطر الاقتصادية في العالم.. أكيد هتحس إن مشاعرك أحسن وإنك مش قلقان وخايف طول الوقت..

2- الجهل بالمعلومات اللي مش ضرورية هيخليك تحكم على الأشياء بعدل أكبر.. يعني مثلًا لو انت هتقابل حد لأول مرة.. ومافضلتش تدور على كل معلوماته وجاي منين وعمل إيه.. ده هيقلل توقعاتك منه وفكرتك المسبقة عنه وتحكم عليه بناءً على اللي هتشوفه منه فعلًا 

طب ليه رغم الفوايد دي الجهل بيعتبر حاجة صعبة؟

1- الفضول قاتل.. صعب على الإنسان إنه يحس إن في حاجة فايتاه وإن عنده نقص في حاجة زي المعلومات مثلًا والأخبار

2- الرغبة في الثقة.. في شعور جمعي عندنا إن كل ما زادت المعلومات عند الشخص كل ما زادت ثقة الشخص في نفسه وقراراته.. بس الحقيقة إن كتر المعلومات بتزود التشويش وبتصعب القرارات 

بس مش أي حد يقدر يبقى جاهل بذكاء.. إنك تعرف تختار المعلومة اللي تعرفها والمعلومة اللي تتجاهلها بشكل مايأثرش عليك دي موهبة كبيرة..

عشان الفضول مايجركش معاه لحاجات مالهاش لازمة.. اسأل نفسك..

هي المعلومة دي مهمة بالنسبالي؟ هو ده الوقت المناسب اللي أعرف فيه الكلام ده؟ هو أنا محتاج الكلام ده فعلًا عشان اخد القرار؟

لو الإجابات لأ.. يبقى كمل يومك واستمتع بنعيم الجهل..

وفي الآخر مش بنقولك خليك جاهل.. بس حاول تركز على توزيع طاقتك ووقتك وعقلك.. ولو بتعاني من فرط التفكير فانت محتاج تعرض نفسك على دكتور يساعدك في حاجة زي دي.