إزاي تكتشف موهبتك؟

المواهب هي الحاجات اللي بتميز كل واحد فينا عن غيره، سواء كانت في الفن أو الرياضة أو العلم أو حتى في التواصل مع الناس.. ومن وإحنا صغيرين بنلاقي نفسنا بنميل لحاجات معينة زي الرسم أو الغناء أو رياضة معينة.. ومع الوقت الحاجات دي بتتحول لمواهب لو ركزنا عليها وطورناها.. وبشكل عام، اكتشاف الموهبة وتنميتها ممكن يكون سر من أسرار نجاحك في الحياة لأنه بيساعدك تعبّر عن نفسك وتبدع بطريقتك الخاصة. 

تعالوا نتكلم شوية عن إزاي تقدر تكتشف موهبتك وتطورها عشان تبقى جزء مهم من حياتك اليومية حسب موقع Indeed 

ممكن في أوقات كتير في حياتك الشخصية أو المهنية تسأل نفسك إيه هي المهارات اللي انت شاطر فيها أو إيه القدرات اللي عندك.. فيه حاجات ممكن تكون عارفها كويس وعارف إنها عندك وحاجات تانية ممكن تكون مواهب مخفية لسه ماكتشفتهاش.. وفكرة إنك تتعلم إزاي تكتشف المهارات دي ممكن يساعدك تطور مواهب جديدة وتستفيد منها في حياتك اليومية سواء على المستوى الشحصي أو المهني.

مهم جدا إنك تعرف إزاي تجاوب على سؤال “أنا شاطر في إيه؟” لأنه هيساعدك تحدد نقط قوتك ومهاراتك وده مفيد ليك وخصوصا لما تكون بتفكر في مسار مهني عايز تمشي فيه.. النجاح عامة محتاج شوية حاجات مع بعض زي ميكس كده من المواهب والقوة والاجتهاد والإصرار.

بالنسبة لبعض الناس.. النجاح هو إن المرتب يبقى كبير.. وبالنسبة لناس تانية النجاح ممكن يبقى إحساس بالرضا عن شغلهم أو إن شغلهم بيعمل فرق.. ولو انت اخترت شغل أو مسار مهني بيعتمد على نقط قوتك ده هيخليك بنسبة كبيرة تحقق نسختك من النجاح اللي انت حاببها وعايزها.

لما تقدر تستخدم مواهبك في تنفيذ شغلك أو مهامك اليومية ده هيخليك يبقى عندك شغف وحافز بشكل بكتير.. لأنك بتعمل حاجة انت بتحبها أو عايز تعملها.. مش مجبور تعملها أو بتعملها بصعوبة.

ولازم تبقى عارف إن مهاراتك ومواهبك ونقاط قوتك مش بس مرتبطة بمهارات بدنية أو فنية أو أدبية زي الرسم والغناء والرياضة والكتابة.. فيه مهارات ومواهب تانية كتير.. على سبيل المثال مش الحصر، إنك تبقى بتعرف تتكلم كويس أو تبقى شخص ذكي اجتماعيا ومحبوب بين الناس أو تبقى بتعرف تكوّن صداقات وتعمل صحاب بسهولة أو ممكن ببساطة تبقى شخص منظم بيحب يعمل جداول وبيجهز كل حاجة من قبلها بشوية حلوين.. كل الصفات دي وغيرها مهمين وليهم قيمة في مكان الشغل أو حتى في الحياة الشخصية.. وفيه مهن كتير بتعتمد على المهارات دي في الشغل اليومي.

طب إزاي تكتشف إنت شاطر في إيه؟ أو إيه موهبتك؟

وده ممكن تعمله من خلال 5 خطوات:

1- ركز في أنشطتك الترفيهية

الحاجات اللي بتعملها بإرادتك عشان انت عايز تعملها أو بتعملها بانتظام غالبا هتكون حاجات بتتبسط وبتستمتع بيها.. وممكن تكتشف إنك موهوب بشكل طبيعي في الأنشطة دي لأنها معتمدة على نقاط قوتك وبتحفزك أو ببساطة بتتبسط وانت بتعملها.. يعني مثلا، لو انت في وقت فراغك بتحب ترسم وتلوّن فده بيقول إن عندك حس فني أو إبداعي.. ولو اشتغلت أكتر على نفسك في الرسم والتلوين هتطور المهارة دي.
كتابة الحاجات أو الأنشطة اللي بتحبها ممكن يساعدك تحدد مواهبك عشان تطورها أكتر.. حاول تفكر بشكل واضح في إيه الحاجات اللي بتفرحك وانت بتعملها واكتبها من غير ما تنتقد نفسك أو تقلل من الحاجة دي مهما كانت بسيطة أو بالنسبالك تافهة.. مفيش صح أو غلط في المرحلة دي من اكتشاف نفسك ومواهبك.

2- حاول تفتكر اهتمامات طفولتك

طريقة تانية لتحديد مواهبك أو مهاراتك هي إنك تفتكر لما كنت طفل كنت بتحب بإيه أو مهتم بإيه.. حاول تفتكر الصفات والمهارات اللي كانت واضحة عندك وانت طفل.. يمكن باباك ومامتك أو مدرسينك أو عيلتك لاحظوا إنك عندك موهبة أو قدرة طبيعية في إنك تعمل حاجة معينة.. زي إنك كنت بتعزف موسيقى حلو أو بتحل مسائل رياضية صعبة أو بتكتب حلو.. أحيانا الناس بيبنوا ويطوروا القدرات الطبيعية اللي اكتشفوها في الطفولة عشان يقدروا يطبقوها في حياتهم الشخصية والمهنية وهم كبار.

3- اهتم وركز في أي مجاملة بتسمعها

لو لسه مش متأكد من المهارات والمواهب اللي عندك.. حاول تركز أكتر في المجاملات اللي الناس بتقولهالك بس أهم حاجة تكون مجاملات صادقة مالهمش هدف منها.. لما تركز أكتر في الناس بتمدحك على إيه ممكن في النهاية تبدأ تلاحظ أنماط أو نوع معين من المجاملات.. ولما ناس كتير تبقى بتمدح فيك نفس الصفة أو المهارة ده ممكن يكون مؤشر على إن الصفات دي مواهب أو قدرات طبيعية عندك.. ممكن حتى تبدأ تكتب ملاحظات صغيرة كل ما حد يمدحك أو يشكرك على حاجة معينة عملتها.. وممكن تسأل الناس أكتر “ليه الحاجة دي عجبتك؟”.. “إيه أكتر حاجة عجبتك فيها؟”.. الطريقة دي ممكن تسهل عليك إنك تعرف انت شاطر في إيه.. يعني مثلا، لو ناس كتير بتمدح أو معجبة بطريقة لبسك أو ديكور بيتك ده ممكن يبقى مؤشر إن عندك موهبة طبيعية في الموضة أو التصميم.. لكن مهم برضه إنك ماتحسسش نفسك بضغط إن طالما الناس بتمدح حاجة معينة فيك إنك لازم تحولها لموهبة بالعافية أو تحول الموهبة لمهنة بالعافية.. مش لازم خالص موهبتك تبقى مهنتك خصوصا لو الموهبة دي مش مناسبة لأهدافك المهنية أو الشغل اللي انت عايز تشتغله.

4- اسأل عيلتك وصحابك

الكلام مع عييلتك أو زمايلك في الشغل أو صحابك طريقة تانية لتحديد الحاجات اللي انت شاطر فيها.. الناس اللي بتقضي معاهم وقت طويل ممكن يكونوا لاحظوا صفات أو قدرات معينة اللي انت نفسك ممكن ماتبقاش شايفها.. ولما تبقى بتدور على شغل حاول ماتنساش نقط قوتك وشغفك والمهارات اللي عندك.. واتأكد إن الشخص اللي بتسأله ده عارفك وفاهمك كويس

5- حاول تحدد الأنماط الشخصية بتاعتك

اكتشاف المواهب ونقط القوة والمهارات بيبقى تحدي كبير جدا لأي حد وخصوصا لو انت مش عارف انت عايز إيه أو بتحب إيه وتعليقات الناس عنك مختلفة ومتناقضة أو آرائهم متعارضة مع اهتماماتك أو الحاجات اللي انت عايزها.. لكن أحيانا ممكن تتغلب على الحيرة دي إنك تركز وتاخد بالك من النمط الشخصي المتكرر بتاعك وتركز في رغابتك الشخصية أكتر وإزاي شغفك مرتبط بالتعليقات اللي الناس بتقولهالك.. وحتى الصفات اللي عندك اللي تبان مختلفة ومالهاش علاقة ببعض ممكن يبقى فيه حاجة بينها مشتركة تحددلك انت شاطر في إيه.. يعني مثلا، لو صحابك قالوا إنك شاطر في انك بتاخد دايما المبادرة أو بتخصص وقت كبير في مساعدتهم، فده ممكن يخليك تفكر إنك تجرب تعمل أعمال تطوعية لأنك ممكن تكتشف بعد كل ده إن ده الطريق اللي بيبسطك وبيحفزك وبيخليك تكبر.

 

ودلوقتي بقى ممكن نقول شوية نصايح عامة لاكتشاف موهبتك أو انت شاطر في إيه:

 

• ماتستعجلش: لما تحاول تحدد نقط قوتك ومواهبك.. ماتحسش إنك لازم تحددها وتعرفها بسرعة.. خد وقتك مفيش ديدلاين.. وادي لنفسك فرصة تعرف نفسك أكتر والحاجات اللي بتحبها ومابتحبهاش. 

• ماتضغطش على نفسك: أحيانا كل حد فينا ممكن يضغط على نفسه عشان يتعلم مهارة أو موهبة مش عنده بشكل طبيعي.. ولما بنلاقي صعوبة في تعلمها بنبدأ نتوتر.. الحياة تجارب.. وتعلم المهارات بياخد وقت.. وممكن تجرب أكتر من حاجة لحد ما تلاقي الحاجة اللي انت بتحبها وشاطر فيها. 

• ماتحسش إنك متحمل عبء: لو لسه مكتشف في نفسك موهبة جديدة.. ممكن تحس بعبء إنك تحول الموهبة دي لمهنة.. لكن حاول تستمتع بالموهبة زي ما هي.. وأكيد ممكن تفكر في تحويلها لمسار مهني بس بعد ما تتأكد إنها فعلا اهتمام حقيقي ليك.

• اخرج من منطقة راحتك أو الـ Comfort Zone: منطقة راحتك بتبقى غالبا أي وضع روتيني انت مرتاح فيه.. لكن لما تحط نفسك في بيئة جديدة أو موقف جديد ممكن تكتشف موهبة جديدة ساعدتك تتأقلم على الوضع الجديد ده.. زي مثلا الناس اللي بتتعلم لغة جديدة لما تسافر برا.

• حاول لحد ما تنجح: الاستمرارية هي واحدة من أهم جوانب اكتشاف انت شاطر في إيه.. كمل في محاولات تعلم موهبة أو مهارة جديدة لحد ما تلاقيها وتحقق اللي انت عايزه فيها.

• واجه وقاوم مخاوفك: ممكن يكون في تجارب عايز تجربها بس متردد أو خايف.. حاول تتغلب على المخاوف دي عشان تقدر تجرب أنشطة جديدة وتكتسب تجارب مختلفة وتقابل ناس جديدة وتكتشف أي مواهب ممكن تكون عندك.

وفي النهاية.. اكتشاف موهبتك هي رحلة شخصية بتبدأ بإنك تتعرف على نفسك أكتر واهتماماتك..  ماتستعجلش ولا تحط على نفسك ضغوط ولا توقعات عالية.. سيب نفسك تكتشف اللي بتحبه بهدوء وبالراحة.. وافتح لنفسك مجال تعيش تجارب الجديدة.. كل موهبة عندك مهما كانت بسيطة في نظرك ممكن تكون هي اللي هتوصلك للنجاح اللي انت بتدور عليه.. فجرب واكتشف لحد ما توصل لمرحلة إنك تخلي موهبتك تبقى جزء من حياتك اليومية.