إزاي شكل تداول الأخبار اتطور على مر التاريخ!

زي ما بنشوف في الأفلام والمسلسلات القديمة إن لما كان بتحصل أي مشكلة أو أي قرار الحاكم بياخده كان بينتشر في المنطقة أو القرية عن طريق شخص اسمه “منادي” وكان وظيفة المناديين إنهم يخلوا الناس عارفين أخر الأخبار والأحداث وينشروا الأخبار من الحاكم لعامة الشعب وده كان منتشر في العالم كله وكان بسبب إن عدد قليل من الناس بس اللي بيعرفوا يقروا ويكتبوا.

والنهاردة يوم منادي الأخبار.. لكن طبعا مع عمليات التطور في نشر الأخبار اختفى دور الشخص ده وبقى مالوش وظيفة.. وبالمناسبة دي حبينا نقولكوا على التطور اللي حصل في تداول ونشر الأخبار على مر العصور حسب ما قال موقع “BBC” وموقع “racinecountyeye”:

الصحف المطبوعة:

في القرن الـ 15 الميلادي: تم اختراع المطابع وده كان معناه إمكانية كتابة الأخبار ومشاركة النسخة نفسها مع أشخاص كتير.

ووقتها لعبت وسائل الإعلام المطبوعة دور قوي  في تداول الأخبار بشكل أسرع بالنسبة للمجتعات المحلية.. وفيه بعض المدن في بريطانيا كان فيها معدل القراءة والكتابة أعلى شوية وده خلاهم يعملوا أول مطبعة مستمرة في المدينة سنة 1704.. وبسبب رسوم الطوابع سنة 1765 اضطر الناشرين وقتها يدفعوا فلوس أكتر مقابل الورق وبالتالي فيه مجلات وقفت عن العمل خالص.

:الراديو

سنة 1896: تم اختراع الراديو، وده سمح للناس انهم يسمعوا الأخبار في الوقت نفسه اللي بيحصل فيه الخبر أو بعدها بشوية صغيرين جدا ماكنش لازم يستنوا لتاني يوم أو لحد ما الخبر يتكتب ويتطبع ويتنشر.

في القرن العشرين وخصوصا في العشرينيات بدأت تتدخل نشرات الأخبار الإذاعية في وسائل الإعلام وبقى فيه في الراديو كمان أعمال درامية وبث إخباري وبرامج كوميدية وبرامج دينية وبرامج حوارية وحفلات غنائية.. فبقى الناس يفتحوا الراديو عشان يسمعوا الأخبار المهمة ويتسلوا كمان ومع زيادة أهميته بدأ ينتشر في أغلب البيوت.

التلفزيون:

سنة 1927: تم اختراع التلفزيون وده بقى غير المشهد الإعلامي بشكل مفيهوش رجوع عن طريق إنه دمج الحاجات اللي الناس محتاجها من الراديو مع الصور المتحركة..  وده كان معناه إن الناس مش هتقدر تسمع الأخبار بس لا ده هيقدروا يشوفوا صور للأحداث العالمية وهما في بيوتهم لأول مرة.

وفي سنة 1951 ظهر أول برنامج إخباري على التلفزيون كان اسمه “See It Now” وساعد “Edward R. Murrow” إن يكون فيه صحافة تلفزيونية.. وفي سنة 1954 الـ BBC عملت أول برنامج إخباري تلفزيون وبعد كده بدأت تظهر النشرات الإخبارية المسائية ومع مرور الوقت والتطور ظهر الدش وبقى فيه شبكات تلفزيون إخبارية محلية بتعرض الخبر صوت وصورة بث مباشر لحظة بلحظة.

:التواصل الاجتماعي

سنة 1989 : اخترع “Tim Berners-Lee”  شبكة الويب العالمية أو الإنترنت يعني اللي سمحت للناس من كل العالم (بما فيهم الصحف والمذيعين) إنهم يشاركوا المعلومات على صفحات الإنترنت.. وقدر الناس بضغطة واحدة بس يشوفوا ويسمعوا أي حاجة تقريبا.. ده غير التنوع وإنهم يقدروا يدوروا ورا كل خبر أكتر.. وده اللي اتسبب في إن الناس يا بتبقى مرهقة جدا بسبب متابعة الأخبار بشكل زايد عن اللزوم أو بتبطل تتابع الأخبار تمامًأ بسبب إنهم مش قادرين يستحملوا الكم ده من الأحداث والمعلومات.