إزاي طريقتك في تحية الناس بتدي انطباع للي قدامك
كل تصرف بنعمله الناس بياخدوا انطباع عنه حتى في أبسط التصرفات اليومية اللي زي السلام والتحية اللي لما بتدخل مكان بتقولهم أو بتبدأ مكالمة تليفون بيهم وده بيثبت قد إيه إن حتى كلمة أهلا أو هاي أو صباح الخير أو أي حاجة مش قليلة
فتعالى نقولك كلمة هاي دي بتعمل إيه حسب ما قال موقع “socialsci libretexts” وموقع “frontiersin” في أحد مقالاتهم:
1- تحيتك دي بتساوي أول انطباع عنك:
أول حاجة الناس بتلاحظها عنك هي طريقة سلامك. لو سلمت بحماس وابتسامة الناس هتحس إنك إيجابي ومبسوط. لو كنت رسمي أو متردد، ده ممكن يخليهم ياخدوا بالهم إنك متوتر أو مش مرتاح.
2- لغة الجسد والعيون في تحيتك بيعبروا عنك:
- نبرة الصوت: صوتك ممكن يقول كتير! لو صوتك هادي وراسي وأنت بتسلم على الناس ده بيعكس ثقة وهدوء، أما لو صوتك عالي أو متسرع، ممكن يبان إنك قلقان أو مندفع.
- ونظرة العين: لو بتبص في عين اللي قدامك وأنت بتسلم، ده بيحسسه إنك مهتم ومركز معاه، أما لو عينك بتتهرب، ممكن يبان إنك مش واثق في نفسك أو مش عايز تتكلم.
- الابتسامة: ودي حاجة بسيطة جدًا لكنها أقوى حاجة، الابتسامة الحقيقية بتعمل فرق كبير وبتفتح الباب لأي حوار.
3- الأسلوب المناسب لكل موقف:
- في الشغل: لما تكون في بيئة عمل، خلي تحيتك رسمية شوية زي “أهلاً بحضرتك” أو “صباح الخير”. الطريقة دي بتدي انطباع إنك محترف.
- مع أصحابك: عادي تبقى براحتك فعادي تكون عفوي ومرحب وتقول اللي يعجبك زي إيه الكلام أو إيه يا صاحبي أو عامل إيه؟ من غير ترحيب زيادة لإن ده هيخليهم يحسوا بالراحة.
- مع الناس الغريبة: لو بتقابل حد لأول مرة خليك شخص متوازن عادي وأنت بتسلم عليه لا تبقى رسمي أوي ولا عفوي أوي عشان تبقى طبيعي.
وعموما كل واحد مننا له الطريقة المميزة اللي بيحيي الناس بيها بس لو حاسس إن طريقتك مش عجباك وعايز تخليها مميزة أكتر تعالي نقولك شوية حاجات تخليك مميز أكتر وهم زي:
1- تبقى واضح ما تبقاش بتتمتم بكلامك ولا تهز رأسك كده بس
2- خليك حقيقي عشان الناس بتحس لو كنت بتتصنع
3- لو بتسلم بإيدك خلي السلام قوي بس مش جارح، عشان يبين إنك واثق
وأخيرًا طريقة سلامك أو تحيتك للناس بتعتبر مفتاح لأي علاقة أو تواصل، لو ركزت في الطريقة اللي بتقول بيها “هاي”، هتلاقي إنك بتبني انطباعات حلوة عند الناس بدون مجهود كبير بس افتكر دايمًا إن التفاصيل الصغيرة هي اللي بتفرق بين شخص والتاني.
