إزاي يبقى عندك نظام غذائي كويس في رمضان؟
ناس كتير في رمضان نظامها الغذائي بيتلخبط، ومواعيد أكلها بتتغير، والدايت بيختلف، ده غير إن فيه ناس بتبقى داخلة رمضان عايزة تخس، وناس تانية عايزة تزيد في الوزن.
منظمة الصحة العالمية نشرت مجموعة كبيرة من التوصيات عن النظام الغذائي الصحي خلال شهر رمضان:
- شرب كمية كبيرة من المياه بين الفطار والسحور. (مش أقل من 10 كوبايات).
- تناول الأطعمة الغنية بالمياه. زي البطيخ في وجبة السحور أو على سبيل التحلية بعد الفطار، والسلطة الخضراء الغنية بالمياه زي الخيار والطماطم. وتجنب شرب المشروبات اللي فيها كافيين زي القهوة والشاي والكولا.
- تناول وجبة فطار صحية ومتوازنة لتعويض مستويات الطاقة.
- الفطار على ثلاث تمرات من الطرق التقليدية والصحية لبداية وجبة الفطار، عشان التمر غني بالألياف، وأكل خضروات كتير لتزويد الجسم بالفيتامينات والمغذيات، واللحوم الخالية من الدهون والفراخ من غير جلد، والأسماك المشوية أو في الفرن للحصول على البروتين الصحي.
- تجنب الأطعمة المقلية أو المُصنعة اللي فيها نسبة عالية من الدهون أو السكر.
- تجنب تناول كميات كبيرة من الحلويات بعد الفطار. ومن الأفضل أكل الفاكهة اللي فيها مياه، زي البطيخ والشمام أو أي فاكهة موسمية تانية.
- تجنب الأطعمة اللي فيها كميات كبيرة من الملح، زي اللحوم المُصنعة والمملحة، والزيتون والمخللات، والأطعمة السريعة، والأجبان المالحة، والأنواع المختلفة من المقرمشات الجاهزة، والصلصات (زي المايونيز والمسطردة والكاتشب).
- الأكل ببطء بكميات مناسبة لاحتياجاتك.
- حاول إنك تتحرك بقدر الإمكان، وخصوصا بعد الفطار، وممكن تتمشى أو تلعب أي نوع من أنواع الرياضة.
أمثلة على وجبة الإفطار:
- شربة خضار
- سلطة خضراء أو أي خضروات
- خضار محشي (كوسة/بتنجان/ورق عنب)
- صدور دجاج مشوية أو في الفرن
- شرب كمية كبيرة من المياه، وممكن تزودلها شرائح ليمون ونعناع
أمثلة على وجبة السحور:
- عيش
- بيضة مقلية بالخضروات أو بيضة مسلوقة
- خضروات
- جبنة
- زعتر وزيت الزيتون
- شاي أعشاب
- شرب كمية كافية من المياه
وكل سنة وانتو طيبين!
